Jezu Bara Apostlank Vinchta

Jezun porgottnnechem kam suru korun atam sumar dedd voros zait ailʼlem. Atam tannem ek mhotvachem kam korchem aslem. Tannem aplea xisam modlea thodde zannank Kristi sobhent fuddakar gheunk vinchunk zai asle. Ani to tankam anik zaiteo vostum xikoupacho aslo. Punn tankam vinchun kaddunk taka Jehovachi modot zai asli. Dekhun to ekttoch eka dongrar voita ani rat-bhor magnnem korta. Sokall zatoch to aplea thoddea xisank apoita ani tantuntlea 12 zannank aple apostl mhunn vinchun kaddtta. Tanche modlim konnachi nanvam tuka ugddas asa? Tanchim nanvam zaun asat Pedru, Andre, Jakob, Juanv, Filip, Bartholomev, Thomas, Matev, Alfevacho put Jakob, Tadev, Simanv, ani Judas Iskariot.

Jezu voita thoim te 12 zann tachea sangata voitale. Porgottnni koxi korchi tem Jezun tankam xikoilem. Uprant Jezun tankam svota porgottnni korunk dhaddle. Noxttea dutank kaddunk ani duentank borim korunk Jehovan tankam xokti dili.

Jezuk tea 12 zannancher visvas aslo ani to tankam aple ixtt mhunnttalo. Apostl xikop naslole ani sadhe lok mhunn Farizev chintʼtale. Punn hea apostlank Jezun tankam dilʼlem kam koxem korchem tem xikoilʼlem. Jezuchea jvitachea mhotvachea vellar te tachea sangata asle. Zoxem, to morchea poilim ani toxench to jivont zalea uprant. Jezu bhaxen 12 modle choddxe zann Galilie thaun asle. Tantuntle thodde kazari asle.

Apostl opurnn asle ani chukeo kortale. Thodde pavtti, te chintinastana uloitale ani chukiche nirnnoi ghetale. Toxench thodde pavtti te pasiensan vagonk nant. Tanchea modem konn vhoddlo tea vixim te zhogddim pasun kortale. Punn te bore munis asle ani Jehovacho mog kortale. Dekhun Jezu sorgar gelea uprant, tannem tanchech udexim Kristi sobha suru keli.