Sabathachea Disak Jezu Vizmit Korta

Farizev Jezucho dves kortale ani taka dhorunk te koslem tori karonn sodhtale. Jezun Sabath disak konnakuch borim korchim nhoi mhunn Farizev sangtat. Punn ek sabathak, Jezu eka kuddʼddea munxak rosteacher bhik magta to polloita. To aplea xisank sangta: ‘Devachi xokti hea munxak koxi modot kortoli tem atam polloiat.’ To apli luti gheta ani matient melloun tacho ek lep toiar korta. Ani to lep te munxachea dolleank laita. Uprant Jezu taka sangta: ‘Voch ani Siloam tolleant tuje dolle dhui.’ To munis toxem korta tednam, jivitant poilech pavtt to pollounk xokta.

Hem polloun lok ojap zatat. Ani te mhunnonk lagtat: ‘Ho toch munis nhoi, zo rosteacher boson bhik magtalo? Kai ho anik konn, zo tacheach sarko dista?’ Tednam to munis mhunntta: ‘Zolma thaun kuddʼddo aslom to hanvuch!’ Lok taka vichartat: ‘Atam tum koso pollounk xokta?’ Apnnak kitem ghoddlem tem tannem lokank sanglem tednam lok taka Farizevam mukhar vhortat.

To munis Farizevank sangta: ‘Jezun ek lep korun mhojea dolleank lailo ani mhaka vochon dhui mhunn sanglem. Hanvem toxem kelem tednam mhojea dolleamnim hanv pollounk xoklom.’ Farizev mhunnttat: ‘Jezu Sabath disak, lokank boro korta zalear tacher Devachi xokti na.’ Punn dusre mhunnttat: ‘Tacher Devachi xokti na zalear, to konnakuch boro korunk xokchonaslo.’

Farizev tea munxachea avoi-bapaik apoun vichartat: ‘Atam tumcho put koso pollounk xokta?’ Hem aikon tachim avoi-bapui bhietat. Karonn konnui Jezucher visvas dovortat zalear taka sobha-ghorantlim bhair kaddttolim mhunn Farizevamnim sanglolem. Tor tim sangtat: ‘Amkam khobor na, takach vicharat.’ Uprant Farizev taka porot anikui prosn vichartat, ani xevttak to oxem sangta: ‘Mhaka khobor asa tem soglem hanvem tumkam sanglam. Torui tumi mhaka kiteak prosn vicharit ravtat?’ Hem aikon Farizev ragar zatat ani tea munxak bhair ghaltat.

Uprant Jezu tea munxak mellonk voita ani taka vicharta: ‘Tuka Mesiasacher bhavarth asa kai?’ Tednam to munis sangta: ‘Mesias konn to hanv zannam aslom zalear, hanv khoreaninch tacher bhavarth dovortam aslom.’ Jezu taka sangta: ‘Hanvuch to Mesias.’ Tor Jezun tea munxak koxi modot keli tem tunvem polloilem? Tannem fokot tache dolle bore korunk nant, punn tannem taka bhavarth dovrunkui modot keli.