Jezuk Dhorun Vhortat

Jezu ani tache apostl Kidron vallhantlean Zoitunanchea dongra lagim voitat. Te thoim modiam ratik pavtat. Ani tea ratik mollbar akʼkho chondrim distalo. Uprant, te Gethsemanichea bagent voitat. Jezu tankam sangta: “Hangach ravat ani zagrut ravat.” Uprant, matso fuddem vochon, Jezu dimi ghalun Jehovak magnnem korun sangta: ‘Bapa, tuka zai toxem zaum.’ To khub dukhi asta dekhun Jehova eka devdutak dhaddun Jezuk ghottai dita. Jednam Jezu porot aplea apostlank mellonk voita, te tigui thoim nhidlole taka mellttat. To tankam mhunntta: ‘Uttʼtthat! Ho nhidpacho vell nhoi! Dusman ieun mhaka dhorun vhorpacho vell pavlo.’

Thoddea vellan, Judas thoim pavta. Tachea borabor tolvar ani dandde gheun ek vhodd zomo ieta. Jezu thoim mellttolo mhunn Judasak khobor asli. Karonn te zaite pavtti tea bagent voitale. Jezuk vollkhonk to tankam modot kortolo mhunn Judasan soinikank sanglolem. Tor, Judas Jezu lagim voita ani taka mhunntta: ‘Nomoskar Rabbi.’ Ani uprant to Jezuk umo dita. Tednam Jezu taka mhunntta: ‘Judas, tum mhozo umo gheun mhaka dhorun ditolo?’

Uprant Jezu fuddem vochon tea zomeak vicharta: “Tumi konnank sodhtat?” Te taka sangtat: “Nazaretkar Jezuk.” Tednam Jezu tankam mhunntta: “To hanvuch.” Tednam te munis fattim sortat ani zomnir poddttat. Porot Jezu tea lokam lagim vicharta: “Tumi konnank sodhtat?” Porot te taka sangtat: “Nazaretkar Jezuk.” Tednam Jezu tankam mhunntta: ‘To hanvuch mhunn hanvem tumkam sanglam. Tor mhojea xisank vochonk diat.’

Thoim kitem ghoddtta tem Pedruk kolltta tednam to apli tolvar kaddtta ani Mha-iadnikachea eka sevokacho kanuch katrun uddoita. Tea sevokachem nanv aslem Malkus. Punn Jezu tea munxacho kan boro korta ani Pedruk sangta: ‘Tuji tolvar porot zagear dovor. Tum tolvarin zhogoddxi zalear, tum tolvarin mortolo.’ Tednam soinik Jezuk dhorun tache hat bandtat ani sogle apostl pollon voitat. Uprant to zomo Jezuk, mukhel-iadnik Anasa lagim vhortat. Annas Jezuk zaite prosn vicharta ani uprant Jezuk Mha-iadnik Kaifasachea ghora dhaddtta. Punn apostlanchem kitem zalem?