Vachpeam Thaun Prosn

Stotr 12:7-antlim utram ‘dublleank’ nhoi (vers 5) punn ‘Sorvesporachea utrank’ lagu zatat (vers 6), oxem thoddim kiteak chintʼtat?

Bhonvtonnchim versam vachlea uprant, hea versantlim utram lokank lagu zatat mhunn kolltta.

Stotr 12:1-4-ant amkam oxem vachunk melltta: “Bhoktivont monis atam nanch!” Ani fuddem Stotr 12:5-7-ant oxem mhunnttlam:

Vers 5-ant Jehovan “dublleam” vixim kitem sanglam tem amkam kolltta. Tem mhunnttlear, to tankam salvar kortolo.

Ani Vers 6-ant “Sorvesporachim utram kitt-naxilʼlim nirbhel utram” oxem mhunnttlam. Toxench tim “ujeant ghalun nitoll kelʼlea rupea sarkim” asat oxem sanglam. Khorench, Jehovachea utram vixim amkam oxench bhogta.​—St. 18:30; 119:140.

Atam fuddlea versant, tem mhunnttlear Stotr 12:7-ant kitem mhunnttlam tacher dhean diat. Thoim sanglam: “Sorvespora, Tujea gopant amkam ballgun dovor; he pinddkechea hatantlim amkam sodam rakhun dovor.”

Vers 6-ant ‘Sorvesporachea utram’ vixim sanglam dekhun, vers 7-ant jem sanglam tem Jehovachea utrank lagu zata, oxem thoddim chintʼtat. Tem mhunnttlear, Jehova aplim utram ballgun vo samballun dovorta, oxem thoddeank dista. Bible-acher bondi ghalunk, toxench tacho nas korunk virodheamnim khub vavr kelear pasun, Jehovan aplem utor aiz meren samballun dovorlam mhunn ami zannant.​—Iz. 40:8; 1 Ped. 1:25.

Punn vers 5-ant jem sanglam tem-ui khorem zaun asa. Tem mhunnttlear, Jehovan ‘dublleank’ ani ‘goribank’ modot kelea ani tankam salvar keleant, ani to toxem korit ravtolo.​—Job 36:15; St. 6:4; 31:1, 2; 54:7; 145:20.

Tor vers 7-ant sanglam tem konnank lagu zata?

Hea Stotracher bariksannen dhean dilʼlean, tem Jehovachea utrank nhoi, punn lokank lagu zata mhunn kolltta.

Stotr 12-chea survatechea versamnim Davidan oslea ‘bhoktivont munxamʼ vixim sanglam, zankam noxttea lokamnim fott marun naddleant. Punn hea toren vaitt uloitolea noxttea lokam add Jehova panvl ghetolo mhunn amkam fuddlea versamnim vachunk melltta. Tor Jehovachim utram xudʼdh asat dekhun, aplea lokank salvar korunk to panvl ghetoloch mhunn hea stotrantlean amkam khatri melltta.

Hea pasot vers 7-ant, noxtteamnim fosoilʼlea hea dublleam munxank Jehova rakhtolo mhunn sanglam.

Hebrev Bhaxent Boroilʼlea Pustokancheo jeo kopi patieupa sarkeo asat, tantunt hea versant “tankam” hem utor uzar kelʼlem asa. Ani Grik Septuagint-ant hea versant don pavtti “amkam” hem utor uzar kelʼlem asa. Tor him utram dubllim ani gorib aslolea Devachea visvaxi sevokank lagu zatat mhunn kolltta. Hea pasot vers 7-achea xevottak, Dev aplea visvaxi sevokank “he pinddkechea hatantlim,” mhunnche vaitt kamam kortolea noxtteanchea hatantlim rakhtolo mhunn sanglam. (St. 12:7, 8) Hebrev Bhaxent Boroilʼlea Pustokanchea eka Aramaik bhaxantorant vers 7-ant oxem sanglam: “Tum, SOMIA, nitivontanchi rakhonn kortolo, tum tankam hea noxttea pinddkentlean sodankal samballun dovortolo.” Tor hantuntlean, Stotr 12:7-ant jem sanglam tem Devachea utrank lagu zaina mhunn spoxttponnim kollon ieta.

Hea karonnak lagon, ‘bhoktivont munxank’ bhorvonso melltta ki Jehova tanchea pasot panvl ghetoloch!