Vachpeam Thaun Prosn
Bori khobor porgottchem kam kednam somptolem?
Jezun sanglolem: “Soglea raxttrank govai mellche khatir Rajeachi bori khobor akʼkhea sonvsarant porgott zatoli, ani tea uprant xevott ietolo.” (Mt. 24:14) Hea versant, toxench 6-vea ani 13-vea versant “xevott” hea utrak uzar kelʼlem Grik utor teʼlos, tea vellak suchit korta, jednam Armageddonant Soitanachea sonvsaracho purnn toren nas zatolo. (Prok. 16:14, 16) Hacho orth, Armageddon suru zaunchea thoddeach vella poilim bori khobor porgottop ami bond kortolim. Tor amchea somzonnent atam bodol zala.
Poilim amchi somzonni asli ki vhodd sonkoxtt suru zata tednam, mhunnche Bollixtt Babilonacho nas zata tednam bori khobor porgottchem kam bond zatolem. (Prok. 17:3, 5, 15, 16) Tor vhodd sonkoxtt suru zalea uprant bore khobrek kan diunk Jehova lokank anik sondhi diuncho na mhunn ami somzotalim. (Iz. 61:2) Toxench, vhodd sonkoxtt suru zaunchea poilim jim Jehovak visvaxi asat, tinch tea sonkoxtta thaun salvar zatolim mhunn ami chintʼtalim. Karonn ami tankam tea Judevam sangata sor kortalim, jim 607 K.X.A.-ant Jeruzalemachea nisonttona thaun salvar zalʼlim. Tannim tea nisonttona poilim Jehovachi bhokti kelʼli ani noxtteponnacho dves kelʼlo dekhun tim salvar zatolim mhunn tancher kuru ghatlolo. (Ez. 5:11; 9:4) Punn ami oxem sor korunk zaina. Karonn Matev 24:14-nt Jezun mhunnttlolim utram dakhoun ditat ki Armageddon suru zaunchea thoddeach vella poilim pasun lokank sot apnnaunk ghoddie sondhi astoli.
Matev 24:14 vixim amchea somzonnent bodol zala dekhun, Prokasovnni 16:21-a vixim pasun amchea somzonnent bodol korcho poddla, zoim jhelachea fatram vixim sanglam. Tea bhair, him donui versam ami bariksannen topastat tednam tim eka-mekak zuddlolim asat mhunn kollon ieta. Koxim? Ek mhunnttlear, lok bore khobrek koxe toren kan ditat tea vorvim. Apostl Paulun mhunnttlem ki bori khobor “salvar zatoleam pasot . . . jivitacho pormoll zaun asa.” Punn Devachea dusmanam pasot ti vaitt khobor vo “mornnacho vas” zaun asa. (2 Kor. 2:15, 16) He lok Rajeachea sondexacho dves kortat. Karonn hea sondexa vorvim sogleank kollon ieta ki jea sonvsaracho te mog kortat to sonvsar noxtto asa, to Soitan choloita, ani tacho beginuch nas zauncho asa.—Ju. 7:7; 1 Ju. 2:17; 5:19.
Dusrem mhunnttlear, jhelache fator poddlolean “khubuch luksonn” zatolem mhunn Prokasovnni 16:21-ant sanglam. Hacho orth, hea sondexacho khor porinnam astolo mhunn kolltta. Tem mhunnttlear, Jehovachem nanv poilim poros chodd lokank kollon ietolem. (Ez. 39:7) Tor tea vellar, mhunnche Bollixtt Babilon nas zalea uprant, pormollit vasak ek munis voddon ieta toso thoddo lok bore khobrek voddon ietolo kai? Ghoddie ieit. Karonn Bollixtt Babilon nas zatolem mhunn Jehovachim Sakxi zaitea vorsam thaun sangtalim mhunn tanchea ugddasak ieit vo tednam tankam kollon ieit. Ani tem purnn zata tem polloun tim bhavarth dovrunk xoktat.
Ejipttant kitem ghoddlem tea vixim chintat. Jehova Ejipttacher dha khast haddttolo mhunn Moizesan poilinch xittkailolem. Tor tem soglem ghoddon ailem tednam ghoddie Izraelit naslolea zaiteamnim Jehovacher visvas dovorlo. Taka lagon, Jehovan ‘Ejipttachea devank khast lailea’ uprant, Izraelitkaram sangata Izraelit naslolea ‘jinʼnosvar vo veg-vegllea torechea lokanchi ek vhodd urponz’ geli mhunn Bible sangta.—Sutt. 12:12, 37, 38.
Bollixtt Babilon nas zalea uprant pasun Kristache bhav prithumer astole. Tor tea vellarui sot apnnaitat tankam, makhloleank tenko diunk sondhi astoli. Tannim toxem kelear Jezu tankam menddram mhunn lekhtolo. (Mt. 25:34-36, 40) Punn Armageddon suru zaunchea thoddeach vella poilim soglim makhlolim sorgar voitolim dekhun, tankam anik fuddem hi sondhi aschina.
Amchea somzonnent bodol zala dekhun Jehovacho vhodd mog ani doia anik chodd dison ieta nhoi? Khorench, “konnanchoch nas zalʼlo taka naka. Tachea bodlek, sogleank poschatap korunk sondhi mellʼlloli taka zai.”—2 Ped. 3:9.