Jezu “Adnea Pallunk Xiklo”

Jezu sodanch Jehovacheo adnea pallttalo. (Ju. 8:29) Tor Bible oxem kiteak sangta ki Jezu “zaitem dukh sosun adnea pallunk xiklo”?—Heb. 5:8.

Jezun sorgar kednanch onnbhovunk na, toslea poristhitincho taka hea prithumer fuddo korunk poddlo. Udharonnak, tachim avoi-bapui Dev-bhirantichim munxam aslim khorim, punn tim opurnn aslim. (Luk. 2:51) Toxench, taka noxtte dhormik fuddari ani sorkari odhikaream koddlean khub tras sosunk poddle. (Mt. 26:59; Mk. 15:15) Tea bhair, taka vollvolleanchem moron sosunk poddlem. Bible sangta: “Tannem apnnakuch khalto kelo, ani moro poriant, hoi, trasanchea khambear moro poriant tannem Devacheo adnea pallʼlleo.”—Filp. 2:8.

Jezu ek poripurnn Raza ani amcheo oskotaieo somzon gheta toslo Mha-iadnik zaunk pavlo. Karonn prithumer astana, eke nove toren to Jehovacheo adnea pallunk xiklo. (Heb. 4:15; 5:9) Hea karonnak lagon to Jehovak chodd valoracho zalo. Tor ami pasun kotthin poristhiti vellar Jehovak visvaxi ravtat tednam, taka chodd valorachi zatat ani aplem khoinchem-i kam korunk to amkam uzar korunk xokta.—Jak. 1:4.