Dukh Sosunk Tumi Kitem Korunk Zata? Tumi Kitem Korunk Zata?

Dukh sostana kitem korchem tea vixim amkam zaiti mahiti mellonk xokta. Thoddi mahiti amkam khub boreak poddttoli, punn thoddi kainch faideachi na oxem disot. Oxem zata karonn, dor ek munis veg-vegllea toren dukh korta. Tor, thoddeank ji mahiti boreak poddtta ti ghoddie dusreank boreak poddona.

Punn hantuntli mahiti choddxea lokank faideak poddlea ani ti eka adlea zannvaiechea pustokant, mhunnttlear Bible-ant melltta. Toxench, dukh sosunk zaite counselor vo solʼle diupi, osleoch vatto uzar korunk sangtat.

1: GHORCHEANCHI ANI IXTTANCHI MODOT GHEIAT

• 

  Thodde counselor vo solʼlo diupi manun ghetat, ki dukh sosunk ghorcheam ani ixttam sangata vell sarop khub gorjechem zaun asa. Thodde pavtti, amkam ekttinch ravonk zai oxem disot. Tor, oslea vellar amkam konnui modot korunk sodhtat tednam ami ghoddie tancher bejar zait. Ani oxem konnakui zaunk xokta.

• Tumi soglo vell dusream sangata ravonkuch zai oxem chintinakat. Punn tumkam tanchi gorozuch na, oxem-i chintinakat. Karonn magir ghoddie tumkam tanchi goroz poddot. Sodʼdeak tumkam kiteachi goroz asa vo na tea vixim tankam mogan sangat.

• Ekttinch ravop chukichem nhoi. Punn dusream sangata vell sarop pasun gorjechem.

TOTV: “Eklo aslolea poros dog zann aslear odik borem . . . Zor eklo sokla poddlo, dusreachean taka uklum ieta.”​—Upodexok 4:9, 10.

2: BHOLAIKEK BOREAK PODDTTA TOSLEM JEVONN JEIAT ANI EXCERCISE KORAT

• Tumi bholaikek boreak poddtta toslem jevonn jevtat tednam, tumchem dukh unnem zaunk xokta. Veg-veglle torechi bhaji, follam ani chodd chorob naslolem jevonn jeiat.

• Khub udok ani bholaikek boreak poddtta toslo juice pieiat.

• Tumkam bhuk lagona zalear pasun, ilʼlem-ilʼlem korun jeiat. Tumi vitamin-achim vokhdam gheunk sodhtat zalear, tea vixim tumi dotora lagim vicharunk zata.a

• Walking vo dusreo exercise kelear, nirax kortat toslim chintnam pois korunk tumkam modot zatoli. Tumi exercise kortat tednam, tumchea jivitant atam zalʼlea bodlava vixim chintunk tumkam vell mellttolo. Vo nirax kortat toslim chintnam pois korunk dusrem kitem chintunk tumkam modot zaunk xokta.

TOTV: “Khoinchoch munis aplea kuddicho dves korina. Punn to ti posta ani ti moladik mhunn lekhta.”​—Efezkarank 5:29.

3: GOROZ TITLI NHID KADDAT

• 

  Nhid khub gorjechi. Khas korun dukh kortat tim khub thoktat dekhun tankam nhid chodd gorjechi.

• Soro ani caffeine asta tosle drinks chodd pienakat, karonn tim ghetlear nhid poddonk kotthin zaunk xokta.

TOTV: “Monak xanti asun, thoddench aslear odik borem donuim hatamnim kamak gulʼl zaun vareak dhorunk tachea fattlean dhanvche poros.”​—Upodexok 4:6.

4: TUMKAM KITEM BOREAK PODDTTOLEM TEM KORAT

• 

  Zannim aplea mogacheank mornnant hogddaileant tim veg-vegllea toren dukh kortat. Tor, tumchea dukhantlean bhair soronk tumkam kitem boreak poddtta tem tumi tharaiat.

• Zaitea zannank aplem dukh dusreank sanglolean modot zata. Punn thoddim zannam dusreank sangonk sodhinant. Dusreank aplem dukh sanglear tem unnem zatolem vo na tea vixim zannaranchem veg-vegllem chintop asa. Tor tumi tumchem dukh eka lagxilʼlea ixttak sangonk sodhtat, punn oxem korunk tumi fattim-fuddem zatat zalear, tumkam koxem bhogta tem thoddem-thoddem korun sangonk survat korunk zata.

• Thoddea zannank roddlolean tanchem dukh unnem zata ani thoddim zann chodd roddonastana pasun dukhantlean bhair sortat.

TOTV: “Kalliz aplem dukh borem somzota.”​—Mhonnʼnneo 14:10.

5: VAITT SONVOIM-EO APNNAINAKAT

• 

  Aplem dukh pois korunk thodde zann khub soro pietat vo drugs ghetat. Oxem kelolean, tanchem dukh thoddeach vella pasot ghoddie unnem zait. Punn tacho vaitt porinnam tankam magir bhogcho poddtta. Tor tumchem dukh unnem korunk boreo vatto uzar korat.

TOTV: “Ami amchea kuddintlem ani monantlem mhellemponn pois korunk amkanch xudʼdh korum-ia.”​—2 Korintkarank 7:1.

6: TUMCHEM DHEAN BOREA VOSTUNCHER DOVRAT

• Zaitim zannam thoddea vella pasot dusrea zagear voitat, vo oslim kamam kortat, jea udexim tankam aplem dukh pois korunk modot zata. Thoddeamnim aplem dhean dusrea vostuncher dovorlolean tim aplem dukh unnem korunk pavleant.

• Tumchem dukh unnem zaunk tumi novim ixttam korunk zatat vo tumchea adlea ixttam sangata vell sarunk zata vo dusrem novem kitem-i xikonk zata.

• Vell voita toso, tumi ghoddie him kamam chodd ani chodd korunk lagtolim ani sovkas-sovkas korun tumchea kallzak pekovnni mellttoli.

TOTV: “Dor-eke vostuk ek vell asa, . . . ek vell roddunk ani ek vell hansunk; ek vell dukh korunk ani ek vell nachunk.”​—Upodexok 3:1, 4.

7: TUMI THARAILOLIM KAMAM CHUKOINASTANA KORAT

• 

  Tumi kitem korunk tharailam, tem zata title begin korat.

• Tumi tharailʼlea pormonnem nhidtat ani dusrim kamam kortat zalear, zata title begin dukhantlean bhair soronk tumkam modot zatoli.

• Tumi borea kamamnim bizi ravlim zalear, tumchem dukh unnem zaunk tumkam modot zatoli.

TOTV: “Kiteak, jitlo kall Dev tachem kalliz khuxalkaien bhorta tednam taka vell sorta tem kollchench na.”​—Upodexok 5:19.

8: VHODDLE NIRNNOI ROKDDECH GHENAKAT

• Aplea mogacheank mornnant hogddaitat tednam zaitim zannam rokddech vhoddle nirnnoi gheupak voitat, zaka lagon uprant tim dukhi zatat.

• Zata zalear, vhoddle nirnnoi, zoxem, ghor vo kam bodolchea poilim, ani tumchea mogachea munxancheo vostu dusreank diunchea vo bhair uddounchea poilim thoddo vell gheiat.

TOTV: “Mhenot gheun vavr korpiacheo ievzonno soglleo follabhorit; uttavollaien vavurtoleacho soglo vavr nirfoll.”​—Mhonnʼnneo 21:5.

9: TUMCHEA MOGACHEANK UGDDASAK DOVRAT

• 

  Zaitim zannam aplea mogacheank ugddasak dovrunk thoddim panvlam ghetat. Oxem kelolean tankam modot zata.

• Tumi tanche fottu vo tumkam tancho ugddas ieta tosleo vostu ektthaim korunk zatat. Vo eke diary-nt tumi tanchea sangata astana ghoddloleo ghoddnneo vo tanchea vixim kitem borem dista tem boroun dovrunk zata.

• Tim uzar kortalim teo thoddeo vostu tumi samballun dovrunk zatat. Uprant, tumchem dukh unnem zait voita toxem teo vostu pollounk vell kaddunk zata.

TOTV: “Gelʼle dis niallat.”​—Dusri Somurt 32:7.

10: BHONVPAK VOCHONK VELL KADDAT

• Tumi sutti gheun bhonvpak vochonk zata.

• Chodd dis sutti gheunk mellona zalear ek vo don disa pasot hiking korunk, vo long drive-ak vochonk zata.

• Thoddo vell pasun tumi tumchea sodanchea kamam poros kitem vegllem kelem zalear dukh sosunk tumkam modot zaunk xokta.

TOTV: “Ieiat, ami konn na toslea zagear vochon visov gheum-ia.”​—Marku 6:31.

11: DUSREANK MODOT KORAT

• 

  Dusreank modot korunk tumi sartat to vell tumkam boreak poddtta mhunn kednanch visronakat.

• Tumi ghoddie oslea soireank vo ixttank vollkhotat astolim zannim aplea mogacheank mornnant sanddleat, ani tankam bhuzvonnechi goroz astoli. Tor survatek tumi osleank modot korunk zata.

• Tumi dusreank bhuzvonn ditat ani modot kortat tednam tumkam khuxalkai mellttoli, ani ‘jieun kainch faido na,’ oslem chintop pois kortolim.

TOTV: “Gheunchea poros diunk chodd khuxalkai melltta.”​—Itihas 20:35.

12: JIVITANT KITEM CHODD GORJECHEM TEM ZANNAM ZAIAT

• Tumi dukh kortat tea vellar, tumchea jivitant kitem chodd gorjechem tem chintunk tumkam sondhi melltta.

• Tumchem jivit tumi koxem jietat tea vixim chintunk vell kaddat.

• Kitem chodd gorjechem tem zannam zalea uprant goroz te bodlav korat.

TOTV: “Porob monoitolea ghorant gelolea poros dukhachea ghorant vochop odik borem; Kiteak thoim monxacho xevott dista, ani okherek zonn ekleak moronn ravta mhunnon zannovta.”​—Upodexok 7:2.

Hem mat khorem ki tumi kitem-i kelear tumchem dukh purnn toren kabar zaunchemna. Punn hea lekhant dilʼleo suchounneo ani osleo her suchounneo pallʼllolean zaiteank faido zala. Dukh unnem korunk sogleo suchounneo hea lekhant na tem khorem. Punn, hantuntleo thoddeo tori suchounneo pallʼllean tumkam thoddi bhuzvonn melllonk xokta.