Devan Dilolem Moladik Dennem

1, 2. (a) Ek dennem tuka khub moladik kednam zata? (b) Devan diloli soddvonn khub moladik dennem oxem ami kiteak mhunnonk zata?

TUMKAM dilolea denneam modlem, khoinchem dennem sogleant borem oxem tumi mhunnttolim? Eka denneak borem mhunnonk, tem mharoguch asonk zai oxem na. Tem mellʼllolean, tumi khuxal zatat, vo tem tumchea gorjek upkarta zalear, tem tumkam sogleam poros chodd moladik zata nhoi!

² Tumkam mellʼllolea soglea denneantlem, ek dennem khas asa. Ani tem amkam, Jehovan dilam. Devan amkam zaiteo vostu dileat, punn sogleant moladik dennem mhunnttlear, aplea putachea bolidana udexim diloli soddvonn. (Matev 20:28 vachat.) Devan diloli hi soddvonn khub moladik dennem oxem ami kiteak mhunnonk zata? Karonn hi soddvonn dilolean amkam jivitant khuxalkai ani modot mellonk xokta. Hea odheai-ant ami hachea vixim anik chodd zannam zatolim. Khorench, Jehova Devak amcho kitlo mog asa tem soddvonnechea hea manddavollintlean sarkem kollon ieta.

AMKAM SODDVONNECHI KITEAK GOROZ ASA?

3. Soddvonn kiteak zai asli, ani Devan diloli soddvonn moladik mhunn kollttolem zalear ami kitem zannam zaunk zai?

³ Jehova Devan munxank, patkantlean ani mornnantlean salvar korchea pasot soddvonnechi manddavoll keli. (Efezkarank 1:7) Ti kiteak zai poddli tem somzonk, Eden bagent kitem zalʼlem tem ugddasak haddchi goroz asa. Adanvan patok korun kitem hogddailem tem zannam zalearuch, Devan diloli soddvonn kitli moladik tem amkam kollon ietolem.

4. Devan Adanvak sompurnn jivit diun rochlolo mhunnttlear kitem?

⁴ Jehovan Adanvak sompurnn jivit diun rochlolo. Hacho orth, tacher kednanch duens ieunchem naslem, to zanntto zauncho naslo, ani kednanch morcho-i naslo. To sompurnn munis aslolean, Jehova Deva thaim tacho ek khas sombond aslo. Ani takach lagon, Bible-ant Devak, Adanvacho “bapui” mhunnttla. (Lukas 3:38) Hachea voilean, ek bapui ani puta modem asta toso ghott sombond, Jehova ani Adanva modem aslo mhunn kollon ieta. Jehova, Adanva lagim uloitalo, ani taka khuxalkai haddtta toslim kama-i ditalo. Toxench, tannem kitem korchem ani kitem korchem nhoi, tem-ui Jehova taka kolloitalo.—Utpoti 1:28-30; 2:16, 17.

5. Devan Adanvak ‘aplea sarkoch’ rochlo mhunnttlear kitem?

⁵ Jehova Devan Adanvak ‘aplea sarkoch’ rochlolo. (Utpoti 1:27) Punn, to pollounk Deva sarko distalo oxem amchean mhunnonk zaina. Karonn ami odheai 1-ant xikleant tachea voilean, Jehova Dev ek Atmo, ani to dixtti poddona mhunn ami zannam zalim. (Juanv 4:24) Taka rogta-masachi kudd na. Devan, Adanvak aplea sarko rochlolo hacho orth, tannem taka mog, zannvai, neai ani podvi, he aple gunn diun rochlolo. Adanv, anik eke ritin aplea bapai sarko aslo. Tachean, apleak kitem korunk zai ani kitem korunk naka tem tharaunk zatalem. Devan taka, ek mexin zoxem bottonacher chalu vo bond zata toso rochunk naslo. Punn tachean, borem ani vaitta modem vinchun kaddunk zatalem. Adanvan, Devachi adnea pallpacho nirnnoi ghetlolo zalear, to hea prithumer sodankal jieunk xoktalo.

6. Devachi adnea moddun Adanvan kitem hogddailem ani haka lagon tachea sonsticher koslo porinnam zalo?

⁶ Devachi adnea moddun Adanvan patok kelem dekhun taka moronn favo zalem. Tannem kelʼlea patkak lagon, Devan taka dilolem sompurnn jivit, ani her besanvam tannem hogddailim. (Utpoti 3:17-19) Oxe toren tannem apleacheruch nhoi punn aplea borabor, aplea akʼkhea sonsticherui moronn haddlem. Hachea vixim Devachem utor mhunntta, “Eka monʼxa udexim patok hea sonvsarant bhitor sorlem ani patka udexim moronn; ani oxem sogllea monʼxank moronn pavlem, kiteak soglleamnim patok kelem.” (Romkarank 5:12) Adanva udexim soglea munxakullacher patok ailem. Tannem apleak ani aplea soglea sonstik, patkachea ani mornnachea gulamponnant ‘viklim’ mhunn Bible sangta. (Romkarank 7:14) Adanv ani Even, zannam zaun Devachi adnea moddli mhunnttoch, tankam moronn favo aslench. Punn, tanchea sonste vixim kitem, amchea vixim kitem?

7, 8. Soddvonneche don orth kitem?

⁷ Munxakullak, patkantlean ani mornnantlean salvar korunk lagon Jehova Devan soddvonnechi manddavoll kelʼli. Hea soddvonnent don vostu mellon asat. Ek mhunnttlear, farik kortat tem mol. Udharonnak, konnem-i eka bhurgeak chorun vhelo zalear, taka soddounk mol farik korchem poddtta. Bible-a pormonnem tacho dusro orth mhunnttlear, koslem-i luksonn bhorun kaddtta tem mol. Udharonnak, Bible-ant Suttka 21:22, 23-ant sanglam toxem, eka munxa lagim opghat ghoddlo zalear, tannem luksonn zalam tea munxak titlench mol farik korunk zai.

⁸ Punn, Adanvan kelam tem luksonn bhorun kaddunk, titlench mol koxem farik zatolem? Amkam hea patkachea ani mornnachea gulamponnantlean koxe toren soddounk zatolem? Hachea vixim Jehovan kitem kelem, ani tachea udexim amkam kitem melltta tem polloum-ia.

AMKAM SODDVONN DIUNK JEHOVAN KITEM KELEM?

9. Adanvan hogddailolem sompurnn jivit porot mellonk kiteachi goroz asli?

⁹ Adanvan hogddailolem sompurnn vo patok naslolem jivit porot melloun gheunk, khoincheach patki munxachean zaina. (Stotr 49:7, 8) Tem jivit porot mellttolem zalear, toslench sompurnn jivit diunchi goroz asli. Karonn Devachea utrant sanglam toxem, tachea niti pormonnem, “jivak jiv” diuncho kaido aslo. (Dusri Somurt 19:21) Toxem zalear, Adanvan hogddailolem sompurnn jivit porot koxem mellttolem? Hem sompurnn jivit melloun ghetolim zalear, anik eka sompurnn munxan aplem jivit diun, zai aslem titlench “soddvonnechem mol” farik korchi goroz asli.—1 Timotak 2:6.

10. Soddvonn diunk Jehovan kitem kelem?

¹⁰ Amkam soddvonn diunk Jehova Devan kitem kelem? Aplea sompurnn ainzam modlea, eka ainzak tannem prithumer dhaddlo. Punn, Jehova Devan, khoinchea-i ainzak vinchun kaddunk na. Tannem aplea, ekleach mogachea putak dhaddun dilo. (1 Juanv 4:9, 10 vachat.) Ani to put aplea khuxen, aplem sorginchem ghor soddun hea prithumer ailo. (Filipkarank 2:7) Ami hea pustokachea odheai 4-ant xikleant toxim, Jehova Devan, vizmit korun aplea putacho, mhunnttlear Jezucho jiv Maria nanvache eke ostorechea kusveant ghatlo. Ani Devache povitr xokte udexim zolmololo dekhun, to sompurnn aslo. Sonvsarantlea munxanchem patok taka lagonk na.—Lukas 1:35.

11. Ekleachea bolidana udexim lakʼkhamnim lokank soddvonn koxi mellonk xokta?

¹¹ Punn, eklea munxachea bolidana udexim, lakʼkhamnim lokank soddvonn koxi mellonk xokta? Poile suvater, hea soglea lokancher patok koxem ailem tem ami ugddasak haddum-ia. Adanvan patok korun aplem sompurnn jivit hogddailem tem tumkam ugddas astolo. Oxem kelem dekhun, to aplea sonstik tem jivit diunk pavonk nam. Tannem tancher fokot patok ani moronn haddlem. Punn Jezu, zaka Bible-ant ‘nimanno Adanv’ mhunnttla, to sompurnn aslo, ani tannem kednanch patok korunk naslem. (1 Korintkarank 15:45) Taka lagon, amkam salvar korunk Jezun, Adanvacho zago ghetlo, oxem amchean mhunnonk zata. Tannem kelʼlea patkachem mol farik korunk Jezun, Devachi adnea manun aplo jiv bolidan kelo. Oxem korun, Adanvachea sonstik, Jezun ek bhorvonso dilo.—Romkarank 5:19; 1 Korintkarank 15:21, 22.

12. Trasanchea vellar visvaxi ravon Jezun kitem dakhoun dilem?

¹² Jezu morchea adim, taka kitle tras sosche poddle tea vixim Bible bariksannen sangta. Taka chabkani marlo ani lakddar umkallaun, tacho jiv kaddlo. (Juanv 19:1, Itihas 10:39; Chodd Mahiti, hantunt pan 234-236 polloiat) Jezuk itle tras kiteak sosche poddle? Trasanchea vellar, Jehovak konnuch visvaxi ravonk xokona, mhunn Soitanan davo kelʼlo. Tannem kelʼlea prosna vixim, ami fuddlea odheai-ant chodd zannam zatolim. Soglea trasamnim visvaxi ravon Jezun, Soitanak boro zobab dilo. Jezu sompurnn aslo ani tachean apleak zai tem korunk zatalem, torui astana, to Devak visvaxi ravlo. Oxe toren, Soitanan kitle-i tras haddlear pasun, ek munis Devak visvaxi ravonk xokta, hem Jezun aplea udharonnantlean dakhoun dilem. Aplea putachem visvaxiponn polloun, Jehova Devak khorench kitli khuxalkai zali astoli nhoi!—Mhonnʼnneo 27:11.

13. Amchi soddvonn koxi zali?

¹³ Amchi soddvonn koxi zali? Jezu zolmon 33-avea vorsa, Nisan mhoineachea 14 tarker, Jehovan, aplea sompurnn vo patok naslolea putacher moronn ieunk dilem. Hea toren, Jezun “ekech pavttin” aplea kuddichem bolidan dilem. (Hebrevank 10:10) Jezu moron tisrea disa, Jehovan taka porot jivont kelo. Sorgar voitoch, Adanvachea sonstik soddvonn diunk, tannem aplem bolidan Deva mukhar dovorlem. (Hebrevank 9:24) Munxakullak, patok ani mornnachea gulamponnantlean soddvonn diunk, Jehovan Jezuchem bolidan manun ghetlem.—Romkarank 3:23, 24 vachat.

JEZUN DILOLEA BOLIDANA UDEXIM TUMKAM KITEM MELLTTA?

14, 15. ‘Patkanchem bhogsonnem’ mellonk ami kitem korchi goroz asa?

¹⁴ Ami patki, torui astana, Jezuchea bolidanak lagon amkam zaitim besanvam mellttat. Devan dilolea sogleant moladik dennea udexim, amkam atam ani fuddarak mellttolea, thoddea besanvam vixim ami zannam zaum-ia.

¹⁵ Patkanchem bhogsonnem. Ami opurnn zalʼlean, sarkem tem korunk amkam khub vavurchem poddtta. Ek-ek pavtt ami utramnim vo amchea korneamnim patok adartat. Punn, Jezun amchea pasot dilolea bolidanak lagon amkam ‘patkanchem bhogsonnem’ mellonk xokta. (Koloskarank 1:13, 14) Tem bhogsonnem mellchea pasot, ami kallzant thaun amchi chuk manun gheunchi goroz asa. Toxench, Jezun dilolea bolidanacher bhavarth dovrun, Jehova Deva lagim, ami khaltikaien bhogsonnem magonk zai.—1 Juanv 1:8, 9 vachat.

16. Ami nitoll ontoskornnan Jehovachi bhokti kiteak korunk xokta ani oslem ontoskornn amkam asop kiteak gorjechem?

¹⁶ Deva mukhar ek nitoll ontoskornn. Ek munis patok korta tednam, tachem ontoskornn to guneanv-kari mhunn dakhoita. Ani haka lagon, to munis apunn kainch valoracho nhoi oxem somzota. Punn Jezun dilolea bolidana udexim, amkam bhogsonnem mellonk xokta. Ani tachea adarit, ami patki asunui, Jehova Dev amkam ek nitoll ontoskornn dita. (Hebrevank 9:13, 14) Hea pasot, Jehova lagim uktea monan ulounk amkam sompem zata. Ani, ami tachea lagim kednam-i magnnem korunk xoktat. (Hebrevank 4:14-16) Ontoskornn nitoll dovorlem zalear, amkam monachi xanti ani jivitant khuxalkai mellttoli.

17. Jezun dilolea bolidana udexim amkam koslim besanvam mellonk xokta?

¹⁷ Sobit bag zalʼle prithumer sasnak ravcho bhorvonso. “Patok dita to muxaro moronn” mhunn Romkarank 6:23 sangta. Teach vachpant fuddem, “Dev dita tem funkeachem dennem amchea Somia Jezu Kristachea ekvottant Sasnnik Jivit”, mhunn boroilolem asa. Hea pustokachea odheai 3-ant, prithumer zatolea sobit bagent amkam mellchim asat tea besanvam vixim ami zannam zalim. (Prokasovnni 21:3, 4) Jezun dilolea bolidanak lagon, fuddarachea besanvam sangata, amkam sasnik jivitui mellonk xokta. Ani tem mellttolem zalear, ami Jezun dilolea bolidanache upkari asat mhunn dakhoun divop gorjechem asa.

TUMI UPKARI MHUNN KOXEM DAKHOUNK ZATA?

18. Jezuchea bolidanak lagon ami Jehovache kiteak upkari asonk zai?

¹⁸ Soddvonnechi manddavoll kelʼlea pasot ami Jehovache upkari asonk zai. Oxem kiteak zait? Konnui amkam aplo vell, mhenot vo poixe uzar korun ek dennem dita zalear, tannem dilolea denneacho valor vaddtta. Dennem diupi amcho itlo mog korta tem polloun, ami khub khuxal zatat. Toxench, amchi soddvonn Jehova Deva koddlean, ek moladik dennem zaun asa. Aplea ekleach putak diunk Jehovak khub kotthin aslem. Torui astana, Jehovan taka amchea soddvonne pasot dilo. Juanv 3:16 mhunntta, “Devan aplea ekleach putak dilo, itlo tannem sonvsaracho mog kelo.” Jehova amcho kitlo mog korta tem amkam soddvonne udexim kollon ieta. Toxench, tantuntlean amkam Jezucho-i mog dison ieta, karonn tannem khuxen amchea pasot aplo jiv dilo. (Juanv 15:13 vachat.) Jehova ani tacho put amcho mog kortat mhunn, tannim dilolea denneam voilean amkam khatri zata.—Galasiekarank 2:20.

19, 20. Devan dilolea denneache tumi upkari mhunn koxe dakhoitole?

¹⁹ Devan dilolea denneache tumi upkari mhunn koxe dakhoitole? Sogleant poilim, tem dennem diupi, Jehova Devachi tumi vollokh gheunk zai. (Juanv 17:3) Oxem korunk, Bible tumkam hea prokaxona udexim modot kortolo. Jehova vixim jitlim tumi zannam zatolim, titlo tachea pasot tumcho mog vaddttolo. Ani hoch mog tumkam, taka manta tea pormonnem cholonk, modot kortolo.—1 Juanv 5:3.

²⁰ Jezuchea bolidanacher bhavarth dovrat. Jezu vixim sanglam, “Putacher bhavarth dovortat tanche sovem sasnnik jivit asa.” (Juanv 3:36) Jezucher bhavarth asa mhunn ami koso dakhounk zata? Oslo bhavarth utramnim dakhoilo mhunn zaina. Jakob 2:26 sangta, “Bhavarth kornniam vinnem melolo zata.” Khoro bhavarth “kornnianim”, mhunnttlear amchea kamamnim dakhounchi goroz asa. Jezucher bhavarth asa mhunn dakhounk, ami fokot ulounuch nhoi punn ami kitem-i kortat tednam pasun tachea dekhin cholonk zai.—Juanv 13:15.

21, 22. (a) Dor vorsa Jezuchea ugddasachea disak ami kiteak hajir ravonk zai? (b) Fuddlea don odheai-ant amkam kitem zannam zaunk mellttolem?

²¹ Dor vorsa zata tea Somiachea Rat Jevnnachea somarombak hajir zaiat. Jezu zolmon 33-avea vorsa, Nisan mhoineachea 14 tarker, sanjechea vellar eka khas somarombachi survat zali. Bible taka, “Somiachem Rat Jevonn” mhunntta. (1 Korintkarank 11:20; Matev 26:26-28) Hea khas somarombak, Kristachea mornnacho, ugddasacho dis oso-i mhunnttla. Jezun sompurnn jivit diun dilolea soddvonnecho, aplea apostlamnim ani her kristanvamnim ugddas dovorcho mhunn, tannem ho somaromb suru kelʼlo. Tannem mhunnttlem: “Mhozo ugddas korun oxench tumi korat”. (Lukas 22:19) Ho somaromb amkam, Jehovan ani Jezun soddvonne udexim dakhoilolea mogacho ugddas korun dita. Dor vorsa, Jezuchea ugddasachea disak hajir ravun, tannim dilolea soddvonneche ami upkari mhunn amchean dakhounk zata.a

²² Jehova Devan kelʼli hi soddvonnechi manddavoll khorench sogleam poros chodd moladik dennem zaun asa. (2 Korintkarank 9:14, 15) Meleat, tea lokank pasun hea denneacho faido mellttolo. Hem koxem zaunk xokta, tem amkam fuddle don odheai dakhoitole.