Bhasailolo Mesias

MESIASAK vollkhonk Jehovan, zaitea provadeam udexim tacho zolm, tachem porgottnnechem kam, ani tachea mornna vixim sangon dovorlolem. Heo sogleo bhasaunneo Jezu Krista udexim ghoddon aileo. Teo itlea bariksannen ani sarke ritin ghoddleat tem polloun khorench ojap dista. Teo koxeo ghoddon aileo tem somzonk, tacho zolm ani tachea bhurgeponna vixim sangloleo bhasaunneo polloum-ia.

Mesias Davidachea sonstintlean ietolo mhunn Izaias provadean kolloilolem. (Izaias 9:7) Ani toxench zalem, Jezu Davidachea kullantlean zolmolo.—Matev 1:1, 6-17.

Mika nanvachea provadean, ho put “Bethlehema Efrata” hea ganvant zolmotolo, ani fuddarak to Raza zaun Raj choloitolo mhunn sanglolem. (Mika 5:1) Jezu zolmochea vellar Israelant, Bethlehem nanvachim don xaram aslolim. Poilem xar Nazaretachea kuxik, ani dusrem Jeruzalemachea kuxik, Juda hea prantant aslem. Jeruzalemachea kuxik aslolea Bethlehemak, adim Efrata mhunnttale. Bhasailolea pormonnem Jezu heach ganvant zolmololo!—Matev 2:1.

Anik eka bhasaunnent, Devachea putak “Ejiptantlo apoun bhair” haddttole mhunn sanglolem. Lhan astana, Jezuk Ejiptant vhelolo. Ani Herod melea uprant, taka Ejiptantlean porot tea xarant haddlolo. Oxe toren hi bhasaunni ghoddon aili.—Hosea 11:1; Matev 2:15.

Pan 231-acher, “Bhasaunni” hachea sokol dilolea vachpamnim, Mesiasa vixim mahiti boroiloli asa. Heo bhasaunneo koxeo ghoddleo tem zannam zaunk “Ghoddon ailem” hachea sokol polloiat. Oxem kelʼlean, Devachea utracher tumcho bhavarth anik ghott zatolo.

Bible-antleo heo bhasaunneo, Jezu zolmochea xemboramnim vorsam adim boroun dovorloleo. Tanchea vixim Jezun mhunnttlem, “Moizesachi somurt, Provadi ani Stotram, hantunt mhoje vixim jem boroilolem asa tem sogllem, Devachea khuxe pormannem, sompadon ieunchem aslem.” (Lukas 24:44) Tumi, tumchea Bible-antlean heo bhasaunneo vachun polloilea uprant, teo khorench bariksannen ghoddon aileo hachi tumkam khatri zatoli.