6
Job Aplem Promannikponn Samballta
Deva fuddem Soitanan Jobachea promannikponnacher proxn kele, punn Job Jehovahk visvaxi ravlo
ZORUI TOR, Devachem utor pallʼlun kottin porikxea ailear ani kainch sonvsarik faido mellonk na zalear, konnui monis Devak visvaxi ravunk xoktolo? Ho proxn Job mhonnllolea monxa vixim upraslo anik tacho zababui meulo.
Israel porza Egyptantuch astana, Job Abrahamancho ek soiro, Arabia mhunnttat thoim ravtalo. Itlem mhonnosor, sorginche devdut Deva fuddem ektthovle, ani fittur Soitanui tanche modem aslo. Sorginchea zomati hujir Jehovahn, Job aplo visvaxi chakor mhonn khatren kolloilem. Khoreponnim, Jehovahn sanglem, Joba sarko promannik monis anink konnuch na. Soitanan sanglem ki Dev axirvad dita ani rakhta mhonnonunch, Job Devachi seva korta. Soitanan aninkui sanglem ki Joba lagim asa titleim sogllem kaddun gheit zalear to Devak xiraptolo.
Devan poili Soitanak Jobachi guirestkai, bhurgim ani uprant tachi bolaiki vaitt korunk porvangi dili. Soitanacheo tallnneo noko zavun, Jobak kainch sozmonk na, Devan apleacher heo porikxea kiteak ieunk dileat teo. Torui punn Job Devacher kednanch xinʼnunk na.
Jobache tin khotte ixtt taka mellonk aile. Tanchim zaitim bhaxonna zalʼlim Job pustokant boroilʼlim melltat, Devan taka gupit kelʼlea patkachi khast lailea mhonn hea monxanim Jobak khotti khatri diunk proitn kelo. Tannim anikui sanglem ki Dev aplea chakrancher dhadoxi zainam, vo tancher visvas dovornam. Joban tanchi khotti sozmonni nakarli. Visvasan, apunn morosor aplem promannikponn soddchonam mhonn Joban sanglem!
Punn Joban apunnuch odhik nitivont mhonn sozmonn chuk keli. Elihu nanvacho ek tornatto tanchi soglli bhasabhas aikotalo. To, Job ani tachea khotte ixttam lagim uloilo. Job Devak mann diunk chuklo dekhun, Elihun Jobak xiddkailo ki monxachi vakhanni korchea poros Sorvpodvedar Jehovah Devachi vakhanni korunk chodd gorjechem. Jobachea khottea ixttankui Elihun khor xiddkavnni dili.
Uprant Jehovah Dev, Joba lagim uloilo ani tachi chintnam nittaier ghatlim. Zaitim ochorianchim rochnnam dakovun, Jehovahn Jobak, Devachea vhoddpona mukhar monis kitlo lhan to niallunk vollokh dili. Joban khaltikaien Devachi xiddkavnni manʼnun ghetli. ‘Jehovah ekdom konnvallo ani doiall’ dekhun, Jobachi bholaiki portun dili, adlea poros dupett girestkai, ani portun dha bhurgeancho axirvad dilo. (Jakob 5:11) Jehovahk promannik ravun, Joban Soitanchea aropancher zoit vhorun dakoilem ki monis khor porikxea ailear dekhun Devak visvaxi ravunk xokta.
—Job Pustokacher adarlelem asa.