Vaittponn ani Koxtt Devan Kiteak Kaddunk Nam?

1. Vaittponn koxem suru zalem?

Soitanan poili fott marli tedna thaun vaittponn suru zalem. To ek boro devdut aslo, punn “kednanch sotant riglo na.” (Juanv 8:44) Ekleach Devak favo asli ti bhokti apleak mellchi oxem taka dislem. Soitanan, poili ostori Evek fott marun Devachem aikunche bodlek, aplem utor aikunk tika bhuloili. Evechem aikun, Adanvan-ui Devachi adnea moddli. Oxem kelʼlean, koxtt ani moronn sonvsarant bhitor sorlem.​—Utpoti 3:1-6, 19 vachat.

Devachem utor moddunk Soitanan, Evek suchoilem tedna, tannem Bhov-Vortea Devachea raz-odhikara add, kam korunk suru kelem. Zaito lok, Devachi razpodvi nakarun, Soitanak sangat ditat. Dekhun, Soitanak “hea sonvsaracho odhikari” mhunnttla.​—Juanv 14:30; 1 Juanv 5:19 vachat.

2. Devache rochnnent kitem chuk asli kai?

Devache rochnnent koslich chuk nam, tea khatir munxanim ani devdutanim Devacheo adnea purnn ritin pallunk zatat. (Dusri Somurt 32:4, 5) Borem vo vaitt vinchun kaddpachi svotontrtai diun Devan amkam rochleant. Tea vorvim ami Devacho kitlo mog kortat tem dakhounk amkam ek bori sondhi melltta.​—Jakob 1:13-15; 1 Juanv 5:3 vachat.

3. Aiz porian Devan vaittponn kiteak dovorlam?

Jehovan thoddeach kalla khatir munxank aplea raz-odhikara add vochunk dileat. Kiteak zait? Deva xivai munxanim raj cholounk kitlo-i proitn kelear, tankam faideachem zaunchem nam mhunn dakhounk Tannem toxem kelam. (Upodexok 7:29; 8:9) Aiz 6,000 vorsam zalim, munxakullacho itihas hache vixim govai dita. Zhuzam, kirmeo, onʼneai ani duens, munxanchean kaddunk zaunk nam.​—Jeremias 10:23; Suttka 9:16 vachat.

Munxanchi razvottki nhoi, punn Devachem Raj apnnaitoleank boreponn melltolem. (Izaias 48:17, 18) Veginnuch, Jehova munxanche soglle sorkar kaddun uddoitolo. Devachea Odhikara khala ravunk sodtat teach lokank he prithumecher ravunk mellttolem.—Izaias 11:9.​—Daniel 2:44 vachat.

Devan Azunui Dukh-Tras Kiteak Kaddunk Na? ho viddeo polloiat

4. Devan sonsnikai dakhoilʼlean amkam kosli sondhi asa?

Apleak faido asa zalearuch munis Devachi seva korta, oxem Soitan dakhounk sodta. Hem tachem mhunnop fott mhunn tumchean dakhounk zata kai? Tumchean zata! Devan sonsnikai dakhoilea dekhun amkam Devachem raj zai vo munxachem raj zai, tem dakhounk amkam soglleank sondhi melltta. Amchea jivitachi chal dakhoita, ami kitem vinchun kaddlam tem.​—Job 1:8-12; Mhonnʼnneo 27:11 vachat.

5. Amkam Devachi razvottki zai, hem ami koxim dakhoitolim?

Bible khore bhokte vixim jem sangta tem xinkun ani tea pormonnem jieun, amkam Devachi razvottki zai mhunn ami dakhoitat. (Juanv 4:23) Rajkoronn ani zhuzam thaun Jezu kuxin ravlo, ami-i toxem kelear Soitanacho odhikar ami nakartat mhunn dakhoitolim.​—Juanv 17:14 vachat.

Vaitt ani pozddeo korneo korunk Soitan amcher khub probhav ghalta. Osleo korneo ami nakartat tedna amche ixtt ani soirim ghoddiek amcheo moskoreo korit vo virodh korit. (1 Pedru 4:3, 4) Tedna ami kitem kortolim? Devacho mog kortoleancho sangat ami dovortolim kai? Ami Devachi bori budh ani mogacheo adnea apnnaun, tea porim choltolim kai? Oxem kelear, koxtt ani dhumalle ailear, munis Devak visvaxi ravunk xokona, hem soitanachem mhunnop, fott mhunn ami dakhoitolim.​—1 Korintkarank 6:9, 10; 15:33 vachat.

Dev munxakullacho mog korta dekhun beginnuch tanche vele koxtt ani vaittponn To kabar kortolo. Je lok hem sot manun ghetat, tankanch he prithumecher sasnak jieunk mellttolem.​—Juanv 3:16 vachat.