Ami Devache Ixtt Koxe Zaum Ieta?

1. Dev soglleanchim magnnim aikota kai?

Sogllea lokank, aplea lagim magnnim korunk Dev apounnem dita. (Stotram 65:2) Torui, soglleanchim magnnim to aikona vo Taka manvonant. Udharonnak, zo munis aple bailek vaitt ritin vagoita, tachim magnnim Dev aikun ghena. (1 Pedru 3:7) Tech porim, Izrael porza vaittponn korit ravli tedna Devan tanchim magnnim aikunk nam. Torui astana, khor patok adartat toslea munxanim apli chuk manun gheun mon bodolʼlear, tanchim magnnim Dev aikota. Deva lagim magnnem korop mhunnttlear khoreaninch ek soeg zaun asa.​—Izaias 1:15; 55:7 vachat.

Dev sogleanchi magnnim aikota kai? ho viddeo polloiat

2. Ami koxe porim magnnim korunk zai?

Magnnem amche bhoktecho ek bhag zaun asa, dekhun ami fokot amchea Rochnnara, Jehova koddech magunk zai. (Matev 4:10; 6:9) Jezun amchea patkam passot aplem jivit dilem dekhun Jezuchea nanvan magnnem korunk gorjechem. (Juanv 14:6) Boroilʼlim magnnim ani portun-portun tinch-tinch utram uzar korun kelʼlim magnnim Jehovak manvonant. Magnneant ami amchim chintnam ani bhavnam kollit kelʼlim Taka zai.​—Matev 6:7; Filipkarank 4:6, 7 vachat.

Monantlean kelʼlim magnnim passun amcho Rochnnar aikota. (1 Samuel 1:12, 13) Khoinchea-i vellar, zoxem sokallim utthlea uprant, ratchem nidʼdche adim, jevnnachea vellar ani kosle-i sonkoxttant, amchim magnnim To aikota.​—Stotram 55:22; Matev 15:36 vachat.

3. Ami mellun ieunk kiteak gorjechem?

Aiz ami jietanv tea kallar Devak lagim sorunk kotthin, karonn lokancho bhavart Devacher unno zala ani hea sonvsaracher xanti haddtolo mhunn Tachi bhasavnni, te sot mandinant. (2 Timotak 3:1, 4; 2 Pedru 3:3, 13) Tea khatir eka-mekak urbha diunk, bhav-bhoinnamcho sangat amkam gorjecho.​—Hebrevank 10:24, 25 vachat.

Devacho mog kortolea lokam sangata mellon ailear amkam Devache ixtt zaunk bori modot melltta. Eka-mekachea bhavarta udhexim ghott zaunk, Jehovachea Sakxeancheo zomati amkam ek bori sondhi ditat.​—Romkarank 1:11, 12 vachat.

4. Ami Devache ixtt koxe zaum ieta?

Jehovache ixtt zaunk, Bible-ant xinkleant tea vixoiancher ami niall korunk zai. Jehovachim kortubam, tachi budh ani tacheo bhasaunneo, Tache vixim amkam kitem kolloitat tem ami chintun pollounk zai. Tachea vortea moga ani zannvaie vixim ami chit diun niall kelear, amchim kallzam Tachea upkaran bhortolim.​—Joshua 1:8; Stotram 1:1-3 vachat.

Devacher visvas ani bhavart dovorlearuch, amchean tache ixtt zaum ieta. Amcho bhavart eka zhadda sarko. Zoxem ek zhadd vaddonk, udok ghalun, sodanch ximpchem poddta, tech porim amcho bhavart ghott korunk ami Bible-achem ginean ghei-it ravunk zai. Taka lagun amcho bhavart kiteacher adarit asa, te vixim ami chintun pollounk gorjechem.​—Matev 4:4; Hebrevank 11:1, 6 vachat.

5. Devachi ixttagot zhoddlear amkam koxem boreak poddta?

Jehova aplo mog kortolea lokanchi kallji gheta. Tancho bhavart ani sasnachea jivitacho bhorvonso moddun uddoitat toslea sogllea oddchoneam thaun To tankam samballta. (Stotram 91:1, 2, 7-10) Amchi bholaiki ani khuxalkai piddʼdear kortat tosle jivitache chali thaun pois ravunk, To amkam xiddkaunni dita. Amkam boreak poddta tosli jivitachi chal Jehova amkam xinkoita.​—Stotram 73:27, 28; Jakob 4:4, 8 vachat.