Poixe Bore Toren Koxe Khorch Korunk Zatat

Kuttumbacheo gorzo purnn korunk amkam poixeanchi goroz asa. (Mhonnʼnneo 30:8) Bible sangta, “duddu monxachi rakhonn korta.” (Upodexok 7:12) Kazari sangateank poixeam vixim ulounk kotthin zaunk xokta, punn poixeank lagon tumchea kazari jivitant oddchonneo ieunk dium nakat. (Efezkarank 4:32) Poixe koxe khorch kortolim tea vixim tharav ghetana zoddpeamnim eka-mekacher visvas dovrunk zai ani mellon vavrunk zai.

1 KITEM KORTOLIM TEM THARAIAT

BIBLE KITEM SANGTA: “Tumche bhitorlo konn-ui ek gopur bandunk sodit zalear, to sompounk goroz titlo khorch korunk apnna lagim zait ki na, hacho adim-poilo bosun odmas korcho na gai?” (Lukas 14:28) Poixe koxe khorch kortolim tea vixim tumi sangata mellon tharav gheunk zai. (Amos 3:3) Tumkam kitem-kitem gheunk zai ani tumi kitle poixe khorch korunk xoktat tem tharaiat. (Mhonnʼnneo 31:16) Poixe asat mhunn tumkam goroz na ti vost tumi gheunkuch zai oxem na. Rinn gheum nakat, tumchea lagim asa titlech poixe khorch korat.—Mhonnʼnneo 21:5; 22:7.

TUMI KITEM KORUNK ZATA:

• Mhoineachea xevottak tumchea lagim poixe urle zalear tea poixeanchem tumi kitem kortolim tem sangata mellon tharaiat

• Poixe unne poddttat zalear khorch unno korunk tumi kitem korunk zata tem tharaiat. Udharonnak, bhair jevchea bodlek jevonn ghorant randat

2 UKTEPONNIM ULOIAT ANI SARKE THARAV GHEIAT

BIBLE KITEM SANGTA: “Nhoich Deva mukhar punn monxanche-i nodrek sarkem asa tem korunk ami vavurtanv.” (2 Korintkarank 8:21) Tumi kitlem zoddttat ani kitlem moddttat tea vixim khoreponnim tumchea sangatea lagim uloiat.

Poixeam vixim vhoddle nirnnoi ghetana eka-meka lagim uloiat. (Mhonnʼnneo 13:10) Poixeam vixim ukteponnim uloitat tednam kazari jivitant xanti samballunk tumkam adar zatolo. Tumkam melltta to pagar fokot tumchoch nhoi punn tumchea kuttumbacho mhunn chintat.—1 Timotak 5:8.

TUMI KITEM KORUNK ZATA:

• Dor eklean kitle poixe moddunk zata tem sangata mellon tharaiat

• Poixeam vixim oddchonn ieum porian ulounk ravonakat, tea vixim poilinch uloiat