Devan Sorg Ani Prithum Rochli

Jehova Dev amcho Rochnnar zaun asa, mhunnttlear, tannench sogleo vostu rochleat. Jeo vostu amkam distat ani jeo vostu amkam disonant teo pasun. Sogleant poilim, Jehova Devan zaitea ainzank vo devdutank rochle. Devdut mhunnttlear konn te tumi zannant? Devdut Jehova bhaxenuch distat. Zoso Jehova amkam disona toxe te-ui amkam disonant. Jehova Devan, jea devdutak sogleant poilo rochlolo, tannench noketram, planets ani dusreo sogleo vostu rochunk Jehovak modot keli. Tantuntlo ek planet amchi hi sobit prithum, zoim ami ravtat.

Tea uprant, munxank ani zonvarank ravonk Devan hi prithum toiar keli. Tannem prithumer suriacho uzvadd poddoso kelo. Toxench tannem zaite dongor, nhoim-eo ani doria kele.

Uprant Jehovan kitem kelem? Jehovan sanglem: ‘Atam hanv tonn, lhan zhaddam ani vhodd zhaddam rochtam.’ Tednam veg-vegllim follam, fulam ani bhaji-palo utponn zaunk laglo. Uprant Jehova Devan soglim zonvaram rochlim. Zoxim suknnim, nustim ani zomnir bhonvpim zonvoram. Lhan zonvaram, zoxe sonxe ani vhodd zonvaram zoxe hotʼti. Tuka khoinchem zonvar avoddtta?

Uprant Jehovan poilea devdutak sanglem: ‘Ami munxank rochum-ia.’ Munxam zonvaram thaun vegllim asat. Tim ulounk xoktat, hansonk xoktat ani magnnem korunk xoktat. Toxench, tim noveo vostu-i toiar korunk xoktat. Ani tim hea prithumecho ani zonvarancho samball korunk xoktat. Devan rochlolo poilo dadlo konn aslo tem tum zannam? Chol ami polloum-ia.