Uzo Pettlolem Zhadd Zollona!

Moizes 40 vorsam Midianant ravlo. To kazar zalo ani taka bhurgim zalim. Ek dis to Sinai dongra lagim aplea menddreank rakhtalo tednam, tannem kitem tori ojapachem polloilem. Eka zhaddak uzo pettlolo, punn tem zhadd lason kabar zainaslem. Oxem kiteak zata kai mhunn Moizes pollounk fuddem sorta, tednanch tea zhaddantlean taka ek avaz ieta: ‘Moizes! Anik fuddem ieum naka. Tuji zotim kadd, karonn tum eka povitr zagear ubo asa.’ Ho avaz konnacho aslo? Ho avaz eka devdutacho aslo, zaka Moizesa lagim ulounk Jehovan dhaddlolo.

Moizes bhieun aplem tondd dhampta. Jehova taka sangta: ‘Hanvem Izraelitkaranche tras polloileat. Hanv tankam salvar kortolom. Ejiptta thaun bhair haddun hanv tankam eka borea desant vhortolom. Tankam Ejipttantleant bhair kaddunk hanv tuka thoim dhaddttolom.’ Hem soglem aikon Moizes kitlo ojap zalo astolo nhoi?

Moizesan vicharlem: ‘Tuka konnem dhaddla mhunn lokamnim vicharlear, hanv kitem sangom?’ Devan sanglem: ‘Abrahamacho Dev, Izakacho Dev, ani Jakobacho Dev, Jehovan apnnak dhaddla mhunn tankam sang.’ Tednam Moizesan vicharlem: ‘Punn, torui te aikonant zalear hanv kitem korum?’ Jehovan Moizesak khatri dili ki to taka modot kortolo. Tannem Moizesak tachi boddi sokol zomnir uddoi mhunn sanglem. Tednam ti boddi ek sorop zata! Ani Moizes tea sorpache xempddek dhorta tednam to sorop porot ek boddi zata. Uprant Jehova taka sangta: ‘Tum oxem korun tankam dakhoitolo tednam, hanvench tuka dhaddla mhunn tankam kollon ietolem.’

Moizes sangta: ‘Mhojean sarkem ulounk zaina.’ Tednam Jehova taka promise korta: ‘Kitem ulounk zai tem hanv tuka sangtolom. Ani tuka modot korunk tujea bhavak, Aronak hanv tujea sangata dhaddttam.’ Tor Jehova aplea sangata asa hem zannam zaun, Moizes aplea bail-bhurgeank gheun Ejipttak vochonk bhair sorta.