Bhokti Korunk Ek Povitr Tombu

Moizes Sinai dongrar aslo tednam, Jehovan taka ek khas tombu bandunk lailo, zoim Izraelitkaram Jehovachi bhokti korunk xoktalim. Hea khas tombuk povitr tombu mhunnttlam. Tim dusre kodden voitat tednam ho tombu tim aplea sangata vhoronk xoktalim.

Jehovan sanglem: ‘Povitr tombu bandunk, lokamnim jem kitem diunk zata tem tankam diunk lai.’ Izraelitkaramnim, bhangar, chandi, tambem, hire ani zaiteo moladik vostu dileo. Toxench tannim vul, borem lugott, zonvarachem chambddem ani her vostu dileo. Tim itleo vostu haddunk laglim ki Moizesak tankam sangchem poddlem: ‘Puro, atam amkam anik vostu nakat.’

Tombu bandunk zaitea lokamnim veg-vegllea toren modot keli. Thoddeamnim sutam toiar kelim ani thoddeamnim tim sutam vinnun lugott toiar kelem. Thoddeamnim tea lugttancher dizain kele. Dusreamnim moladik fator bosounchem kam kelem, toxench bhangracheo ani lakddacheo vostu toiar keleo. Him soglim kamam korunk Jehovan tankam bori zannvai dili.

Jehovan sanglolem teach bhaxen lokamnim povitr tombu bandlo. Tea tombunt Povitr bhagak, Bhov Povitr bhaga thaun vegllo korunk ek sobit poddʼddo toiar kelo. Bhov Povitr bhagant babulachea lakddan ani bhangran toiar kelʼli korarachi arkpett asli. Izraelitkaramnim Jehovachem aikotolim mhunn promise kelʼli ani korarachi pett tankam hem ugddas korun ditali. Korar mhunnttlear kitem tem tum zannam? Ti ek khas torechi promise. Povitr bhagant divo, mez ani dhump zollounk vedi asli. Angnnant tambeachi baxi ani ek vhoddli vedi asli.

Povitr tombunt seva korunk Jehovan Aron ani tachea putank iadnik mhunn vinchun kaddle. Tannim tea tombuchi dekhrekh korunk zai aslem ani thoim Jehovak bolidanam bhettounk zai aslim. Aron mha-iadnik aslo, ani fokot toch Bhov Povitr Bhagant vochonk xoktalo. To thoim vorsak ek pavtt voitalo. Thoim to aplea, aplea familichea ani akʼkhea Izrael raxttrachea patkam pasot bhogsonnem magonk bolidan bhettoitalo.

Ejiptta thaun tanchi suttka zaun ek vorsa uprant, Izraelitkaramnim povitr tombu bandun sompoilo. Atam tanchea lagim Jehovachi bhokti korunk ek zago aslo.

To Povitr tombu polloun Jehova khub khuxal zalo ani tannem ek kup tacher dovorlem. Tem kup tacher astalem tea meren, Izraelitkar thoinch ravtale. Punn zoxem-zoxem tem kup fuddem voitalem tednam tim pasun thoinchean vochonk lagtalim. Tim Povitr tombuchem soglem saman nikllaun ani tem gheun kupa fattlean voitalim.