Tim Jehova Add Gelim

Izraelitkaram oronnʼnneant astana, Kora, Dathan, Abiram, ani 250 munxam Moizesachea add voitat. Tim taka mhunnttat: ‘Tumchem chodd zalem! Tuka amcho fuddari ani Aronak mha-iadnik mhunn konnem nemla? Jehova fokot tumcheach sangata na, to amchea sogleam sangata asa.’ Hem aikon Jehova khub dukhi zata. Karonn, tim tachea add gelim!

Kora ani tachea sangateank Moizes sangta: ‘Tumi faleam povitr tombu koddem, tumchea dhumpanneant dhump ghalun haddat. Ani Jehova dakhoun ditolo ki tannem konnak vinchla.’

Dusrea disa, Kora ani 250 munxam Moizesak mellonk povitr tombu koddem voitat. Thoim te apunn iadnik zalʼlea bhaxen dhump zolloitat. Tednam Jehova Moizes ani Aronak sangta: ‘Tumi dogui, Kora ani tachea munxam thaun pois sorat.’

Kora povitr tombu koddem voita. Punn Dathan, Abiram, ani tanchi famil thoim vochona. Jehovan Izraelitkarank sanglem ki tannim Kora, Dathan, ani Abiram-achea tombu thaun pois sorchem. Tednam tim rokddinch pois sortat. Dathan, Abiram ani tanchi famil aplea tombuchea bhair ubim astat. Okosmat, zomin futtʼtta ani tankam sogleank gillun uddoita! Povitr tombu lagim, Kora ani tachea 250 munxancher uzo ieta ani tancho nas zata.

Uprant, Jehovan Moizesak sanglem: ‘Dor eka kullachea mukhelea koddlean tancho danddo ghe, ani tancher tanchem nanv boroi. Punn Levi kullachea danddeacher Aronachem nanv boroi. Uprant, te sogle dandde povitr tombuchea bhitor dovor. Hanv jea munxak vinchun kaddttolom tachea danddeacher fulam fultolim.’

Dusrea disak, Moizes tea mukheleanche dandde bhair haddun tankam dakhoita. Polloit zalear Aronachea danddeacher fulam fulʼlolim astat. Toxench, tacher piklole badam pasun astat. Hea toren, Jehova khatri korun dita ki tannem Aronak mha-iadnik mhunn vinchun kaddla.