Ek Novo Fuddari Ani Don Dhirvont Bailo

Joshuan zaitim vorsam Jehovachea lokank vatt dakhoili ani 110 vorsacho astana to melo. To jivo aso poriant, Izraelitkaram Jehovachi bhokti kortalim. Punn to melea uprant tim Kananit lokam bhaxen murti-puza korunk laglim. Izraelitkarank Kananacho raza Jabin tras korunk lagta tednam Jehova tem addaina, karonn tim tachem aikonaslim. Punn tim roddon Jehova lagim modot magtat tednam Jehova tankam ek novo fuddari dita, zachem nanv aslem Barak. To tankam Jehova koddem porot ieunk modot korta.

Debora nanvachi ek provadin, Barakak apoun haddtta. Ti taka Jehovacho oso sondex dita: ‘Tum tujea borabor 10,000 munxank gheun Kishon vhalla kodde voch. Anik thoim Jabinachea soinikam add zhuz kor. Thoim tuka Jabinacho senapoti, Sisera-cher zoit mellttolem.’ Tednam Barak Deborak sangta: ‘Tum mhojea borabor ailearuch hanv thoim voitolom.’ Debora sangta: ‘Hanv tujea borabor ietolim, punn Sisera tujea hatant morcho na. Jehovan sanglam ki ek bail taka jivexim martoli.’

Zhuzachi toiari korunk Debora, Barak ani tachi soin Tabor mhunnttat tea dongrar voitat. Siserak hi khobor melltta tednam, to aplim zhuzachim rotham ani soin gheun falkeant ieta. Tednam Debora Barakak sangta: ‘Aichea disa, Jehova tuka zoit ditolo.’ Barak ani tache 10,000 munis, Siserachea bollixtt soina add zhuzonk dongra voile nettan denvon ietat.

Uprant, Jehova Kishon nodint buddtti ieum-xi korta. Siserachim zhuzachim rotham matient rombtat. Tednam Sisera aplem roth thoinsoruch soddun dhanvonk lagta. Barak ani tachi soin Siserache foujek haroitat, punn Sisera pollon voita! To Jael nanvachea eke bailechea tombunt lipon ravta. Jael taka pieunk dudh dita ani pangrunk ek chador dita. To khub thoklolo asta dekhun taka rokddich nhid poddtta. Tednam Jael ek hatoddi ani tombuk uzar kortale toslo vhoddlo khillo gheun avaz korinastana Sisera lagim voita. Ani hatoddi gheun to khillo tachea tokler marta. Sisera thoinsoruch morta.

Barak Siserak sodhit-sodhit, Jaelachea tombu lagim pavta. Tednam Jael aplea tombu bhair ieun taka mhunntta: ‘Bhitor ieo. Tum sodhtalo to munis ho polloi hanga asa.’ Barak bhitor vochon polloit zalear, taka Sisera thoim melolo dista. Barak ani Debora gitam gaun Jehovachi vakhannʼnni kortat karonn Jehovan Izraelitkarank tanchea dusmanancher zoit dilem. Fuddlea 40 vorsam meren, Izraelitkarank tanchea dusmanamnim anik tras diunk nant.