Ruth Ani Naomi

Izraelant bhuk poddli tednam, Naomi nanvachi ek bail, aplea ghova ani don putam sangata Izrael soddun Moab ganvant voita. Uprant, thoim Naomicho ghov morta ani tiche dogui put Moabit cheddvam lagim kazar zatat. Ek cheddvachem nanv aslem Ruth ani dusreachem aslem Orpa. Punn dukhachem mhunnttlear, thoddea vella uprant, Naomiche dogui put mortat.

Izraelant atam porot jevonn mellonk laglam mhunn Naomik khobor melltta tednam, ti thoim porot vochonk tharaita. Ti bhair sorta tednam, Ruth ani Orpa pasun tichea borabor voitat. Punn vatter Naomi tankam sangta: ‘Tumi dogaim khub boreo bailo ani sunno zaun asleo. Atam tumi porot kazar zalʼlim mhaka zai. Dekhun Moabant tumchea ghora porot vochat.’ Punn tea bailamnim sanglem: ‘Ami tuzo mog kortat! Ani amkam tuka soddun vochonk naka.’ Naomi tankam aplea ghora vochat mhunn porot-porot sangot asli. Xevottak, Orpa aplea ghora voita, punn Ruth vochona. Tednam Naomi Ruthak sangta: ‘Polloi, Orpa aplea lokam ani aplea devam lagim porot voita. Tum-ui tichea borabor tujea avoi-chea ghora voch.’ Punn Ruthan mhunnttlem: ‘Hanv tuka soddun voichemna. Tuje lok mhoje lok zatole, ani tuzo Dev mhozo Dev zatolo.’ Ruthachim him utram aikon Naomik koxem dislem astolem mhunn tuka dista?

Ruth ani Naomi Izraelant pavlim tednam thoim zovachi lunvnni chalu asli. Ek dis, Boaz nanvachea munxachea xetant Ruth poddlolim konnsam ektthaim korunk voita. Boaz Rahabacho put aslo. Ruth ek Moabitkar bail asonui ti Naomik soddun vochonk na mhunn Boazak kollon ieta. Dekhun, Boaz xetant kam korpeank lunvnni kortana chodd konnsam soddat mhunn sangta, jea vorvim Ruthak tim ektthaim korunk mellttolim.

Teach sanjer, Naomi Ruthak vicharta: ‘Aiz tunvem konnachea xetant kam kelem?’ Ruth sangta: ‘Boaz mhunnttat tachea xetant hanvem kam kelem.’ Tednam Naomi mhunntta: ‘To tor mhojea ghovacho soiro. Tum her tornnattea bailam sangata thoinch kam kor ani thoim tum surokxit astolem.’

Lunvnni kabar zaisor, Ruth Boazachea xetant kam korit ravlem. Ruth khub vavr korpi ani bori bail asa mhunn Boazan polloilem. Tea kallar, bhurgem nastana ek dadlo morta zalear, tacho ek soiro tache baile lagim kazar zatalo. Tor, Boaz Rutha lagim kazar zata. Tankam ek put zolmota, zachem nanv Obed aslem. Obed uprant Raza Davidacho xapai zata. Naomichim ixttam khub khuxal zaun tika mhunnttat: ‘Poilem Jehovan tuka Ruth dilem, zannem tuzo sangat soddunk na. Ani atam tuka ek natu dila. Jehovachi vakhannʼnni zaum.’