Gideon Midianitkarank Haroita

Thoddea vella uprant, Izraelitkar porot Jehovak soddun khottea devanchi bhokti korunk lagtat. Tednam Midianitkar Izraelitkaranchim zonvaram chorunk lagtat ani tanchim xetam piddʼddear kortat. Oxem te sat vorsam porian tankam tras ditat. Dekhun Izraelitkar dholimnim ani dongrancher pollon voitat. Tim apleak salvar kor mhunn Jehova lagim vinoti kortat. Dekhun Jehova aplea eka devdutak Gideon nanvachea eka tornnattea lagim dhaddtta. To devdut Gideonak sangta: ‘Ek bollixtt zhuzari zaunk Jehovan tuka vinchun kaddla.’ Punn Gideon taka vicharta: ‘Hanv Izraelitkarank koso salvar korunk xoktam? Hem kam korunk tor hanv purto na.’

Jehovan apleak vinchla mhunn Gideonak koxi khatri zali? Tannem vulacho ek kuddko zomnir dovrun Jehovak sanglem: ‘Sokall mhunnttlear zor ho vulacho kuddko dhovan volo zata ani zomnin sukhi urta, tor tunvem mhaka Izraelitkarank salvar korunk vinchla mhunn hanv zannam zatolom.’ Dusrea sokallim vulacho kuddko dhovan sarkoch volo zala punn zomin samki sukhi asa tem Gideon polloita. Uprant to Jehovak sangta: ‘Faleam sokallim vulacho kuddko sukho dovor punn zomin voli kor.’ Ani sokallim toxench ghoddtta tem Gideon polloita tednam taka purnn khatri zata ki Jehovan Izraelitkarank salvar korunk taka vinchun kaddla. Tor Gideon aplea soinikank ektthaim korun Midianit lokancher zhuz korunk toiar zata.

Jehova Gideonak sangta: ‘Hanv Izraelitkarank zoit ditolom. Punn tuji soin khub vhodd asa. Tor zoit mellʼllea uprant tumkam distolem ki tumchea bollan tumkam zoit mellʼllam. Dekhun bhirant dista tankam aplea ghora vochonk sang.’ Tednam 22,000 soinik aplea ghora voitat ani fokot 10,000 urtat. Punn Jehova sangta: ‘Tuji soin azunui vhodd asa. Tankam vhalla kodden vhor ani udok pivonk sang. Zo soinik zagrut ravon udok pieta ani dusman ie-it kai mhunn nodor dovorta, tankanch dovor ani urloleank ghora dhadd.’ Fokot 300 munis zagrut ravon udok pietat. Tednam Jehova Gideonak promise korta ki hech thodde munis Midianachea 1,35,000 soinikancher zoit vhortole.

Tea ratik, Jehova Gideonak sangta: ‘Atanch tumi Midianitkarancher akromonn korat!’ Tednam Gideon aplea munxank xingam ani matieche budkule ani tanchea bhitor ujeache torch vhoronk sangta. To tankam mhunntta: ‘Mhaka polloiat, ani hanv kortam toxench tumi-i korat.’ Gideon aplem xing vazoita ani matiechem aidon foddun ujeacho torch bhair kaddtta. Ani to mottʼttean mhunntta: ‘Jehovachi tolvar ani Gideonachi!’ Tednam urlolea 300 munis toxench kortat. Hem polloun Midianitkar ekdom bhietat ani pixeam bhaxen hevtten-tevtten dhanvonk lagtat. Hea goddboddant, te eka-mekak marunk lagtat. Oxea toren, porot ek pavtt, Jehovan Izraelitkarank tanchea dusmanancher zoit dilem.