Hana Eka Puta Khatir Magnnem Korta

Izraelant Elkana nanvacho ek munis aslo. Taka don bailo asleo. Ekleachem nanv Hana ani dusreachem Penina. Punn to Hanacho chodd mog kortalo. Hanak ekui bhurgem naslem, punn Peninak zaitim bhurgim aslim. Dekhun, ti sodanch Hanak challoitali. Dor vorsak, Elkana aple familik gheun Shilont aslolea povitr tombunt bhokti korunk voitalo. Ek pavtt, thoim astana tannem polloilem ki tachi mogachi bail Hana khub dukhi asa. To tika sangta: ‘Please roddonaka, Hana. Hanv tujea sangata asam nhoi. Hanv tuzo khub mog kortam.’

Uprant, Hana ek dis magnnem korunk voita. Ti roddon-roddon apleak modot kor mhunn Jehova lagim vinoti korta ani taka oxi promise korta: ‘Jehova, tum mhaka ek put dita zalear, hanv taka tujea sevent dhaddttoli ani to jivitbhor tuji seva kortolo.’

Hana roddon-roddon Jehova lagim magnnem kortali. Punn tichim utram aikonk ienaslim, fokot tiche vontt haltale. Mha-iadnik Eli-n hem polloilem tednam, taka dislem ki ti soro pielea mhunn. Hana sangta: ‘Na, mhojea dhonia, hanvem soro pivonk na. Mhojem kalliz dukhan bhorlam. Ani tea vixim hanv Jehova lagim uloitali.’ Elik kollon ieta ki to tika somzonk chuklo mhunn, dekhun to tika sangta: ‘Jem tunvem maglam tem Dev tuka dium.’ Hem aikon Hanak borem dista ani ti thoinchean voita. Ek vorsa bhitor, tika ek put zolmota ani ti taka Samuel mhunn nanv dita. Apleak put zolmolo mhunn ti kitli khuxal zali astoli nhoi!

Jehovak kelʼli promise Hana visronk na. Samuelan dudh pieupachem soddlea uprant, Hana rokddich taka Jehovachi bhokti korunk povitr tombunt vhorta. Ti Elik sangta: ‘Heach bhurgea khatir, hanvem Jehova lagim magnnem kelʼlem. Hanv mhozo ho put Jehovak ditam. To jivitbhor Jehovachi seva kortolo.’ Uprant, Elkana ani Hana dor vorsak Samuelak mellonk voitalim ani tachea pasot hat naslolo ek novo kott vortalim. Jehovan Hanak anik tin put ani don dhuvo dileo.