Jefthachi Promise

Izraelitkar porot Jehovak soddun khottea devanchi bhokti korunk suru kortat. Amonitkar Izraelitkaram add zhuztat tednam te khotte dev tankam kainch modot korinant. Zaitim vorsam poriant Izraelitkar trasant astat. Xevottak tim Jehovak sangtat: ‘Ami patok kelam. Please, amchea dusmanam thaun amkam salvar kor.’ Izraelitkar sogleo murteo moddun uddoitat ani porot Jehovachi bhokti korunk suru kortat. Tim sodankal trasant urlolim Jehovak naka aslem.

Ammonitkaram add zhuzonk Jeftha nanvachea eka zhuzariak fuddari mhunn nemtat. Jeftha Jehovak sangta: ‘Tum mhaka zhuzant modot korta zalear, hanv mhojea ghora voitolom tednam, mhaka mellonk zo sogleam-von poilo ghorantlo bhair sorta, taka hanv tuka ditolom.’ Jehova Jefthachem magnnem aikota ani taka zhuzant zoit dita.

Jeftha aplea ghora pavta tednam, sogleant poilim tachea ghorantlean tachi dhuv taka mellonk ieta. Tem tachem eklench bhurgem aslem. Tem khuxalkaien nachot ani tamborin vazoit taka mellonk ieta. Atam Jeftha kitem kortolo? Jehovak dilʼli promise tachea ugddasak ieta ani to mhunntta: ‘Mhojea dhuve, koslem mhunn dukh tunvem mhaka dilem! Hanvem Jehovak promise kelea ani ti purnn korunk tuka povitr tombunt seva korunk Shilont dhaddchem poddttolem.’ Tachi dhuv taka sangta: ‘Tunvem Jehovak promise kelea zalear ti purnn kor. Hanv voitolem. Punn fokot mhoji ek vinoti asa, don mhoineam pasot mhojea ixttinneam sangata mhaka dongrar vochonk di.’ Uprant, Jefthachi dhuv jivitbhor visvaxiponnan povitr tombunt seva korta. Dor vorsak, ticheo ixttinneo tika mellonk Shilont voitaleo.