Jehova Samson-ak Bollixtt Korta

Zaitim Izraelitkaram portun murti-puza korunk laglolim. Dekhun Jehovan tancho des Filistevkaranchea tabeant vochonk dilo. Punn thoddim Izraelitkaram azunui Jehovacho mog kortalim. Tantuntlo ek munis aslo, Manoah. Taka ani tache bailek bhurgim naslim. Ek dis Jehova aplea devdutak Manoahche baile-xim dhaddtta. To tika sangta: ‘Tuka ek put zolmotolo. To Izraelitkarank Filistevkaram thaun soddoitolo. To ek Nazirit zatolo.’ Nazirit konnak mhunnttale tem tum zannam? Te Jehovache khas sevok asle. Naziritank aple kens katrunk porvangi nasli.

Uprant, Manoahk ek put zolmota ani to taka Samson mhunn nanv dovorta. Samson vaddon vhoddlo zata toso, Jehova taka khub bollixtt korta. To koslench hotʼtear nastana, eka xinvak pasun marun uddounk xoktalo. Eka vellar, 30 Filistevkarank Samson ekloch marun uddoita. Haka lagon, Filistevkar tacho dves kortat ani taka marunk sodhtat. Dekhun eke rati Samson Gaza xarant nhidlolo astana, sokall zatanch taka marun uddounk te xarachea dara-xim vochon ravtat. Punn ratiam modem Samson uttʼttha ani xarachea dara-xim vochon tem dar vonttintlem umttun kaddtta. Uprant tem dar aplea bhuzancher gheun to Hebron dongrachea tengxe meren voita!

Samsonak Delaila nanvachi ek vokhol asli. Tor Filistevkar Delaila lagim voitat ani tika sangtat: ‘Ami Samsonak dhorun jailint ghalunk sodhtat. Dekhun to itlo bollixtt kiteak asa ti tunvem khobor kaddli zalear ami tuka zaite poixe ditole.’ Delailak poixeanchi as asli, dekhun te sangtat toxem korunk ti toiar zata. Ti Samsonak to itlo bollixtt kiteak asa mhunn vicharta. Survatek Samson tika sangona. Punn ti taka porot-porot vicharta, dekhun Samson bejar zaun tika to gutt sangon dita. To sangta: ‘Hanv ek Nazirit, ani mhoje kens kednanch katrunk nant. Punn mhoje kens katorle zalear mhoji xokti voitoli.’ Samsonan aplo gutt sangon kitli vhoddli chuk keli nhoi?

Delaila rokddich Filistevkarank sangta: ‘Mhaka tacho gutt kollʼllo!’ Ti Samsonak aplea manddier nhidoita ani tache kens katrun gheta. Uprant ti oxi bob marta: ‘Samson, Filistevkar aileat!’ Samson uttʼttha tednam, tachi xokti geli mhunn taka kollon ieta. Filistevkar taka dhortat, tache dolle kaddttat ani taka jailint ghaltat.

Ek dis hozaramnim Filistevkar, tancho dev Dagon-achea mondirant ektthaim zatat. Te vhoddlean mhunnttat: ‘Amchea devan Samsonak amchea hatant dilo! Samsonak bhair haddat! Ami tachim fokannam korum-ia.’ Te taka don khambeam modem ubo kortat ani tachim fokannam korunk lagtat. Samson tednam Jehovak ulo marta ani mhunntta: ‘Jehova, please mhaka mhoji xokti porot ek pavtt di.’ Atam mhunnosor Samsonache kens porot vaddlole. To aple sogle xokten mondirache donui khambe dhuklun uddoita. Tednam ti akʼkhi bildding kosllon poddtta ani tantunt aslole sogle lok mortat. Toxench, Samson pasun morta.