Jezebel Ranniek Khast Melltta

Raza Ahab-achem raj-mahal Jezreel-ant aslem. Aplea mahalachea zonelantlean bhair polloitana taka Naboth-acho drakxancho mollo dixtti poddttalo. Ahabak to mollo zai aslo, dekhun to Nabotha koddlean tacho mollo vikto gheunk proitn korta. Punn Naboth taka to mollo vikina. Karonn, Devachea kaidea pormonnem tannem aplem daiz vikunk zainaslem. Tor, Naboth sarkem tem korta dekhun Ahab taka resped dita kai? Na. Ahab khub ragan bhorta. To itlo bejar zata ki to khavop-jevop soddun dita ani aplea bed-rumantlo bhair sorona.

Ahabachi bail, mhunnche noxtti Ranni Jezebel taka sangta: ‘Tum Izraelacho raza, tuka zai tem tunvem gheunk zata. Hanv tuka ti zomin gheun ditolim.’ Ti xarachea mukheleank chitti boroita ani tankam sangta ki tannim Nabothacher Devacho opman kela mhunn boglantt ghalchem ani taka fatraun jivexim marcho. Te mukheli, Jezebelan sanglam toxench kortat. Uprant Jezebel, Ahabak mhunntta: ‘Naboth melo, tor tacho drakxancho mollo atam tuzo zalo.’

Nabothachi kainch chuk nasli, tori Jezebelan taka jivexim marlolo. Toxench, tinnem Jehovachi bhokti kortolea zaitea lokank jivexim marlole. Ti murti-puza, toxench zaitim vaitt kamam kortali. Tichim soglim vaitt kamam Jehovan polloilolim. Tor Jehova vogich ravtolo kai?

Ahab melea uprant, tacho put Jehoram raza zata. Tednam, Jezebel ani tichea familik khast lavunk Jehova Jehu nanvachea munxak dhaddtta.

Jehu aplem roth gheun Jezebel ravtali thoim Jezreelant voita. Jehoramak khobor melltoch to aplem roth gheun Jehuk mellonk ieta ani taka vicharta: ‘Soglem borem asa nhoi?’ Tednam Jehu sangta: ‘Tuji avoi Jezebel vaitt kamam korta tea meren soglem borem koxem astolem?’ Hem aikon aplem roth gheun Jehoram thoinchean pollon vochonk proitn korta. Punn Jehu aplo bann tacher marta ani to thoinch morta.

Uprant Jehu, Jezebelachea raj-mahalant voita. To ieta mhunn tika kollʼllea uprant, ti make-up korta, aple kens ugoita ani voilea zonelar ravon tachi vatt polloita. Jehu ieta tednam, ti taka khub vaitt utram uloita. Jehu tichea kuxin aslolea chakrank vhoddlean mhunntta: “Tika sokol uddoiat!” Tednam te Jezebelak zonelantlean sokol uddoitat ani ti zomnir poddon morta.

Tea uprant, Jehu Ahabachea 70 putank jivexim marta ani akʼkhea desa thaun Baalachi bhokti kaddun uddoita. Jehova soglem zannam ani sarkea vellar to vaitt lokank koxi khast laita tem tunvem polloilem?