Ek Vhodd Zhuzari Ani Ek Lhan Cheddum

Syria-chi soin, eka lhan Izraelit cheddvak, tachea famili thaun pois Syriant vhortat. Thoim Naman nanvacho ek senapoti aslo. Ani tem lhan cheddum tache bailechi seva korta. Tachea bhonvtonnim konnuch Jehovachi bhokti korpi naslim. Tori tem lhan cheddum Jehovachi bhokti korta.

Namanak ek bhirankull katichem duens aslem. Ani dekhun taka soglo vell tras sosunk poddttale. Tor tem lhan cheddum taka modot korunk sodhtalem. Ani dekhun tem Namanache bailek sangta: ‘Hanv Izraelant eka munxak vollkhotam, zo tujea ghovak modot korunk xokta. To Jehovacho ek provadi zaun asa ani tachem nanv Elisha. To tujea ghovak boro korunk xokta.’

Tea lhan cheddvan sanglolem tem Namanache bailen, Namanak sanglem. Boro zaunk Naman kitem-i korunk toiar aslo. Dekhun to Izraelant, Elishak mellonk tachea ghora voita. Taka dislolem ki Elisha taka khub manan lekhtolo mhunn, punn tachea bodlek, Elisha taka mellonk pasun vochona. To aplea sevokak dhaddun, Namanak oso sondex dita: ‘Voch ani sat pavtti Jordan nodint budd mar tednam tum boro zatolo.’

Hem aikon Naman ekdom bejar zata. To mhunntta: ‘Ho provadi aplea Devak ulo korun ani mhojer hat dhorun mhaka boro kortolo mhunn mhaka dislolem. Punn tachea bodlek to mhaka, Izraelachea nodint budd marunk sangta. Punn hanv thoim kiteak vochom? Syria-nt tor hache poros boreo nodeo asat.’ Oso Naman ragar zaun Elishachea ghorantlo bhair soron voita.

Tednam Namanache sevok taka somzaitat: ‘Boro zaunk tum kitem-i korunk toiar asa nhoi? Hea provadean tuka jem korunk sanglam tem sompem asa, tor tum kiteak korina?’ Tednam, Naman tanchem aikota ani Jordan Nodi lagim vochon, tantunt to sat pavtti budd marta. Satve pavtti to budd marun voir sorta tednam, to sarkoch boro zata. Uprant, upkar attounk to porot Elishak mellonk voita, ani to taka sangta: ‘Jehovach khoro Dev mhunn atam mhaka kollon ailem.’ Tuka kitem dista? Naman boro zaun porot ghora pavlo tednam, tea lhan Izraelit cheddvak koxem dislem astolem?