Jehovachi Ujea Sarki Soin

Siriecho raza, Ben-hadad, porot-porot Izraelacher holʼlo kortalo. Punn dor ek pavtt, hea vixim provadi Elisha adim fuddench Izraelachea razak xittkaitalo ani hea toren to salvar zatalo. Dekhun Ben-hadad, Elishak dhorun haddunk tharaita. Jednam taka kolltta ki Elisha Dothan xarant asa, taka dhorun haddunk to apli soin thoim dhaddtta.

Siriechi soin ratchi Dothan-ak pavta. Dusrea sokallim, Elishacho sevok utthon polloit zalear, eke vhodd foujen xarak veddo ghatla tem taka dista. To bhieun bob marun Elishak sangta: ‘Atam ami kitem korchem?’ Elisha taka sangta: ‘Tanchea poros amchea sangata chodd zann asat.’ Teach vellar, Jehova Elishachea sevokak xarachea sorvbhonvtonnim dongrancher aslole ghodde ani ujeachim zhuzachim rotham polloum-xem korta.

Siriechi soin Elishak vhoronk proitn korta tednam, Elisha magnnem korta: ‘Jehova, please hea lokank kuddʼdde kor.’ Tea soinikank dixtti tor poddttalem punn okosmat apunn khoim asat tem tankam somzona zalem. Tednam Elisha tankam sangta: ‘Tumi chukon hea xarant pavleat. Mhojea fattlean ieiat. Tumi sodhtat tea munxa koddem hanv tumkam vhortam.’ Te Elishachea fatta-fatt vochon Samariek pavtat, zoim Izraelacho raza ravtalo.

Izraelachea raza mukhar pavle tednam, apunn khoim pavle tem Siriechea soinikank kollon ieta. Punn tednam mhunnttlear khub vell zalʼlo. Izraelacho raza Elishak vicharta: ‘Hanv tancho jiv kaddum?’ Elisha hi sondhi aplea dusmanacho bodlo gheunk uzar korta kai? Na. Tachea bodlek, Elisha mhunntta: ‘Tancho jiv kaddinaka. Tankam jevonn di ani uprant tankam vochom di.’ Tea pasot, raza tea soglea soinikank ek vhoddlem jevonn korta ani tankam aplea ghora porot dhaddtta.