Jehoiada Dhir Dakhoita

Jezebelak, Athalia nanvachi dhuv asli, ji ticheach bhaxen khub vaitt asta. Athaliachem kazar, Judachea raza sangata zalʼlem. Ticho ghov morta tednam, ticho put raj korunk lagta. Punn ticho put melea uprant, ti svota Judachi ranni zata. Raza zaunk xoktale tea dor eklea dadleak ani cheddeak ti jivexim marun uddoita. Ti aplea natvank pasun jivexim marta. Hea toren, ti razachea akʼkhea ghoranneak jivexim marunk proitn korta. Dekhun soglim tika khub bhietalim.

Athalia jem korta tem ekdom vaitt mhunn Mha-Iadnik Jehoiada ani tachi bail Jehosheba zannam aslim. Tim aplo jiv dhokeant ghalun, Athaliachea eka natvak salvar kortat. Tachem nanv aslem Jehoash. To khub lhan aslolean tim taka mondirant lipoun vaddoitat.

Jehoash sat vorsancho zalo tednam, Jehoiadan soglea odhikareank ani Levitank ektthaim korun sanglem: ‘Mondirachea darachi rakhonn korat ani konnakuch bhitor vochonk dinakat.’ Tea uprant, Jehoiadan Jehoashak Judacho raza mhunn nemlo ani tachea mathear mukutt ghatlo. Judachea lokamnim vhoddlean mhunnttlem: ‘Razak lamb auk mellom!’

Ranni Athalia lokancho bovall aikun modirant dhanvon voita. Thoim ti novea razak polloun bob marta: ‘Ghat kelo! Ghat!’ Tednam, thoim aslole odhikari tika dhorun thoinchean bhair vhortat ani tika jivexim martat. Punn tika lagon lokancher zalʼlea vaitt probhavachem kitem zatolem?

Jehoiada desantlea soglea lokank Jehova sangata ek korar korunk modot korta. Tea korarant apunn fokot Jehovachich bhokti kortolim mhunn tim promise kortat. Jehoiada lokank Baalachem mondir moddun uddounk ani murteancho churo korunk laita. Toxench, Jehovachea mondirant kam korunk Jehoiada iadnikank ani Levitank nemta, jea udexim tim porot Jehovachi bhokti korunk xoktat. Konnui oxudʼdh munis mondirant bhitor sorona zaunk tannem mondirachea dara lagim rakhonndar dovorle. Tea uprant, Jehoiada ani te odhikari, Jehoashak raj-mahalant vhorun taka xinvasonacher bosoitat. Khub tempa uprant tankam noxtti ranni Athalia ani Baalache bhokte thaun suttka mellʼlli mhunn Judache lok khub khuxal zatat. Atam tim porot Jehovachi bhokti korunk xoktalim. Tor tunvem polloilem, Jehoiadan dhir dakhoilo mhunn kitlea lokank faido zalo to?