Jehovacho Dut Hezekiak Salvar Korta

Izraelachem dha kullachem raj, Assiriechea Somrazan aplea tabeant kelʼlem. Atam, Assiriecho raza Sennakerib Judachem don kullanchem raj aplea tabeant korunk sodhtalo. Tor, to ek-ek korun Judachea xarancher zoit vhoronk lagta. Taka chodd korun Jeruzalem xar aplea tabeant korunk zai aslem. Punn Jehova Jeruzalem xarachi rakhonn korta mhunn Sennakeribak khobor nasli.

Jeruzalemacher holʼlo korcho nhoi mhunn Judacho raza Hezekia Sennakeribak zaite poixe dita. Sennakerib te poixe gheta, punn torui to apli bolixtt soin Jeruzalemacher holʼlo korunk dhaddtta. Assiriekar disan-dis lagim ie-it asat tem polloun xarantle lok bhietat. Tednam Hezekia tankam sangta: ‘Bhienakat. Assiriekar bollixtt asat, punn Jehova amkam tanchea-von bollixtt kortolo.’

Lokanchim fokannam korunk Sennakerib aplo munis, Rabshakek Jeruzalemant dhaddtta. Rabshake xarachea bhair ubo ravon vhoddlean mhunntta: ‘Jehova tuka modot korunk xokchona. Tumi Hezekiachim utram aikon fosonakat. Oslo konnui dev na zo tumkam amchea hatantlean salvar korunk xokta.’

Kitem korchem tem Hezekian Jehova kodde vicharlem. Jehovan taka sanglem: ‘Rabshakechim utram aikon bhienaka. Sennakerib Jeruzalemacher zoit vhoronk pavchona.’ Uprant Sennakeriban Hezekiak thoddeo chitteo dhaddleo. Tea chittinim oxem boroilolem aslem: ‘Jehova tuka vanchounk xokchona, dekhun har manun ghe.’ Hezekian magnnem kelem: ‘Jehovah, please amkam vanchoi, jea udexim tunch khoro Dev mhunn sogleank kollon ietolem.’ Jehovan taka sanglem: ‘Assiriecho raza Jeruzalemant bhitor ieunchona. Hanv mhojem xar rakhtolom.’

Apunn rokddoch Jeruzalem xar jikhon ghetoloch mhunn Sennakeribak khatri asli. Punn eke rati, xara bhair tache soinik tombu ghalun ravtale thoim Jehovan aplo ek dut dhaddlo ani tea devdutan 1,85,000 soinikank jivexim marle! Raza Sennakeribache sogleam-von bollixtt soinik pasun moron gele. Taka atam har manun aplea ghora porot voichem poddlem. Jehovan promise kelʼli toxi, tannem Hezekia ani Jeruzalem xarak rakhlim. Tum tea vellar Jeruzalemant aslo zalear, tum Jehovacher patieta aslo kai?