Josiak Jehovachea Kaideancho Mog Aslo

Josia atth vorsancho astana Judacho raza zalo. Tea disamnim, thoincho lok jadu kortale ani murti puza kortale. Josiak 16 vorsancho aslo tednam Jehovachi bhokti sarke ritin koxi korchi tea vixim to xiklo. To 20 vorsancho aslo tednam tannem desantleo sogleo murteo ani vedeo moddun uddoileo. Ani to 26 vorsancho zalo tednam Jehovachem mondir sarkem korunk tannem manddavoll keli.

Mha-iadnik Hilkia mondirant aslo tednam, taka Jehovachea Kaideancho ek kovllo melltta. Ho kovllo ghoddie Moizesan boroilolo astolo. Razacho sevok, Shafan ho kovllo Josia lagim gheun ieta ani to taka vhoddlean vachun dakhoita. Josia hem aikota tednam, taka kollta ki lok Jehovachi adnea pallina zaun zaitim vorsam zalʼlim. Dekhun to Hilkiak mhunntta: ‘Jehova amcher khub ragar asa. Voch ani tachea lagim uloi. Kitem korunk zai tem amkam Jehova sangtolo.’ Provadin Hulda udexim Jehova tankam oxem sangta: ‘Judachea lokamnim mhaka soddlam. Punn Josia raza asa tea meren hanv lokank khast launcho na, karonn tannem mhojem utor pallʼllam.’

Josian him utram aikolim tednam, to mondirant voita ani Judachea lokank ektthaim zaunk laita. Ani to akʼkhe raxttrak Jehovache Kaide vhoddlean vachun dakhoita. Uprant, to ani soglo lok purnn kallzan Jehovachi adnea pallttole mhunn promise kortat.

Judachea lokamnim zaitim vorsam Paskanchi porob manounk nasli. Punn Paskanchi porob dor vorsak manounk zai hem Josian Kaideachea kovlleant vachlem tednam, tannem lokank sanglem: ‘Ami Jehova pasot ek Paskanchi porob manoum-ia.’ Uprant tannem bolidanam bhettounk manddavoll keli. Ani mondirant gitam gavpeank toiar kele. Magir soglea lokamnim Paskanchi porob ani sat disanchi Fug Naslolea Unddeachi porob manoili. Samuel-achea disam thaun tednam meren itli vhoddli Paskanchi porob zaunk nasli! Josia Jehovachea Kaideancho khorench mog kortalo. Tuka-i Jehova vixim xikonk borem dista?