Jeruzalemacheo Vontteo

Jeruzalemacheo vontteo bandchea thoddea vorsam poilim kitem ghoddlem tem ami polloum-ia. Nehemias nanvacho ek Izraelitkar, Raza Artaxerxesacho sevok aslo. To Persiechea Shushan xarant ravtalo. Ek dis, Juda thaun tacho bhav taka mellonk ieta ani taka ek vaitt khobor dita: ‘Jim munxam Jeruzalemant porot geleant tim surokxit nant. Xaracheo vontteo ani darvontte, je Babilonachea lokamnim moddun udoilʼle, te azunui porot bandunk nant.’ Hem aikon Nehemias khub dukhi zata. To Jeruzalemant vochon tankam modot korunk sodhtalo. Dekhun raza koddlean taka Jeruzalemant vochonk porvangi mellchi mhunn to Deva lagim magnnem korta.

Uprant, Nehemias dukhi asa tem razan polloilem. Razan taka mhunnttlem: ‘Tuka itlo dukhi hanvem kednanch pollounk na. Kitem zalem?’ Nehemiasan sanglem: ‘Mhojem xar Jeruzalem moddon poddlam. Takach lagon, hanv dukhi asam.’ Razan taka vicharlem: ‘Tuka kitem zai? Mhojean tuka koxi modot korunk zata?’ Rokddoch, Nehemias monantuch ek magnnem korta. Uprant to razak sangta: ‘Mhaka Jeruzalemacheo vontteo porot bandunk zai. Tor please, mhaka thoim vochonk di.’ Raza Nehemiasak thoim vochonk porvangi dita. Ani hea lamb provasant to surokxit urcho mhunn manddavoll pasun korta. Toxench, to Nehemiasak Judacho razpal mhunn vinchun kaddtta ani xarache darvontte bandunk taka lakddam pasun dita.

Nehemias Jeruzalemant pavta tednam xaracheo vontteo koxeo asat tem to polloita. Uprant to iadnikank ani odhikareank ektthaim korun tankam sangta: ‘Vontteo samkeoch nas zaun poddleat. Teo porot bandunk ami kam korunk zai.’ Hem aikon lok kam korunk toiar zatat ani vontteo porot bandunk suru kortat.

Punn Izraelitkaranche thodde dusman tanchim fokannam korun mhunnttat: ‘Tumi jeo vontteo bandtat, tancher ek kolo pasun choddlear teo moddttoleo.’ Punn lok tancher dhean dinant ani bandkam chaluch dovortat. Sovkas-sovkas korun, te khub unch ani ghott vontteo bandun kaddttat.

Dusman veg-veglle vatten tancher okosmat holʼlo korunk tharaitat. Hem aikon Judev lok khub bhietat. Punn Nehemias mhunntta: ‘Tumi bhienakat. Jehova amchea sangata asa.’ Uprant, kam kortoleanchi rakhonn korunk, Nehemias thoddea munxank dovorta ani taka lagon dusman tancher holʼlo korunk pavonant.

Xaracheo vontteo ani darvontteanchem bandkam fokot 52 disamnim sompta. Uprant tanchi khuxalkai monounk, Nehemias soglea Levitank Jeruzalemant ektthaim korta. To gavpeanche don zome korta. Zorichea darvonttea lagim aslole panvdde choddon te Jeruzalemache vonttir unch choddttat ani thoim thaun ek zomo ek vatten ani dusro zomo dusre vatten cholot voitat. Te trumpet, simbal ani harp vazoit Jehovak gitam gavun vontticher cholot-cholot xara bhonvtonnim voitat. Eka zomea vangdda Ezra voita ani dusrea zomea vangdda Nehemias voita. Uprant te donui zome, mondira kodde ieun ekamekak mellttat. Sogle dadle, bailo ani bhurgim Jehovak bolidanam bhettoitat ani khuxalkai monoitat. Tancho khuxalkaiecho avaz pois-pois pasun aikonk ieta.