Gabriel Mariek Sondex Dita

Elizabetak Marie nanvachem ek tornnattem soirem aslem. Tem Galiliechea Nazaret xarant ravtalem. Juze nanvachea thevoi-a lagim tem kazar zaupachem aslem. Elizabet gorbest zaun sov mhoinne zale tednam, devdut Gabriel Mariek dixtti poddtta. To mhunntta: ‘Tujer besanv asum. Jehovak tum khub manvolam.’ Gabrielachea utrancho orth Mari somzonk na. Dekhun to tika fuddem sangta: ‘Tum gorbest zatoli, ani eka putak zolm ditoli. Ani tunvem taka Jezu mhunn nanv diunk zai. To Raza zatolo ani tachi Razvottki sasnak urtoli.’

Punn Marien sanglem: ‘Hanv azunui kazar zaunk na. Tor mhaka bhurgem koxem zaunk xokta?’ Gabrielan sanglem: ‘Jehovan korunk zaina toxem kainch na. Tujer povitr xokti ietoli. Ani tuka ek put zolmotolo. Tuji soiri Elizabet pasun gorbest zalea.’ Uprant Marien mhunnttlem: ‘Hanv Jehovachi chakorn. Tunvem sanglam toxench mhoje sovem zaum di.’

Marie dongri vattarant aslolea xarant, Elizabetak mellonk voita. Jednam Marie Elizabetak zap dita, tichea kusveant aslolem bhurgem uddi marta ani povitr xokten bhoron ti mhunntta: ‘Marie, Jehovan tujer besanv ghatlam. Mhojea Dhoniachi avoi, mhojea ghorant aili. Ho mhaka kitlo vhodd man.’ Tednam Marie mhunntta: ‘Hanv mhojea purnn kallzan, Jehovak vakhannttam.’ Marie Elizabeta sangata tin mhoinne ravta ani uprant ti porot aplea ghora Nazaretak voita.

Marie gorbest asa mhunn kollʼllea uprant, Juze tichea lagim kazar zaunk fattim sorta. Punn ek devdut taka sopnant dixtti poddtta ani oxem sangta: ‘Marie lagim kazar zaunk bhieum naka. Karonn tinnem kainch chuk korunk na.’ Dekhun Juze Marie lagim kazar zata ani tika aplea ghora vhorta.