Juanv Vatt Toiar Korta

Zekaria ani Elizabetacho put Juanv, vhodd zaun ek provadi zata. Mesias ieuncho asa mhunn porgottunk Jehovan Juanvak sanglem. To Devmondirant ani xaramnim nhoi, punn oronnʼnneant porgottnni kortalo. Jeruzalem ani akʼkhea Judeia thaun lok Juanva koddlean xikonk ietale. Devachem kalliz khuxal korunk zai zalear, tannim vaitt kamam korop bond korunk zai mhunn Juanvan tankam xikoilem. Juanvachim utram aikolea uprant zaiteamnim aplea patkancho poschatap kelo ani Juanv tankam Jordan nodint bautizm ditalo.

Juanv ek sadhem jivit jietalo. To unttachea lhonve thaun toiar kelʼle kopdde nhestalo. Tachem jevonn toll ani ranantlem mhonv aslem. Lok tache vixim anik zannam zaunk sodhtale. Gorvixtt Farizev ani Saduki pasun taka pollounk ietale. Juanv tankam sangtalo: ‘Tumi tumchim vaitt kamam soddun poschatap korunk zai. Tumi Abrahamachea famili thaun aileat mhunn tumi khas munxam mhunn chintinakat. Hacho orth oso nhoi ki tumi Devachim bhurgim zatat.’

Zaitim zannam Juanva kodde ieun vichartalim: ‘Ami kitem kelear Devak borem distolem?’ Juanv tankam sangtalo: ‘Tumchea lagim don kopdde asat zalear, tantuntlo ek zachea lagim na, taka diat.’ To oso kiteak sangtalo tem tum zannam? To aplea xisank xikounk sodhtalo, ki Devachem kalliz khuxal korunk tannim lokancho mog korunk zai.

Juanv tax vosul korpeank sangtalo: ‘Promannik zaiat ani konnakuch fosoinakat.’ Tannem soinikank sanglem: ‘Kaidean gheunk zai titlech poixe gheiat ani fotti sangonakat.’

Iadnik ani Levitkar pasun Juanva lagim ietat ani taka vichartat: ‘Tum konn? Soglim zannam zaunk sodhtat.’ Juanv sangta: ‘Izaias provadean sanglolea pormonnem, hanv to avaz, zo oronnʼnneant aikonk ieta ani lokank Jehova Deva lagim pavoita.’

Juanv kitem xikoitalo tem lokank khub avoddttalem. Zaite zann Juanv Mesias kai mhunn chintʼtale. Punn to tankam sangtalo: ‘Mhojea poros vhodd konn tori ieuncho asa. Hanv tachea paim-anchi zotim pasun kaddunk purto na. Hanv tumkam udkan bautizm ditam, punn to tumkam povitr xokten bautizm ditolo.’