Baim-che Lagim Ek Bail

Paskanchi porob zalea uprant, Jezu ani tache xis Samarientlean porot Galiliek voitale. Sikar xara lagim, Jezu eka zagear ravta, zoim Jakobachi baim asli. Jezu thoim visov gheta ani tache xis jevonn viktem gheunk xarant voitat.

Jezu tea baim-che lagim aslo tednam, ek bail thoim udok kaddunk ieta. Jezu tika mhunntta: “Mhaka ilʼlem udok di.” Tednam ti bail mhunntta: ‘Tum mhoje lagim kiteak uloita? Hanv ek Samaritkar bail ani Judev lok Samaritkaram lagim uloinant.’ Jezu tika mhunntta: ‘Hanv konn to tum zannam asli zalear, tum mhoje lagim udok magtoli asli ani hanv tuka jivit dita toslem udok ditolo aslom.’ Ti bail taka mhunntta: ‘Tum kitem mhunnonk sodhta? Tujea lagim tor baldi pasun na.’ Jezu tika mhunntta: ‘Hanv ditam tem udok, zo konn pieta taka porot kednanch tan lagchina.’ Tednam ti bail taka mhunntta: “Guruji, mhaka-i tem udok di.”

Jezu tika mhunntta: ‘Voch ani tujea ghovak hadd.’ Ti mhunntta: ‘Mhaka ghov na.’ Jezu tika mhunntta: ‘Tunvem sarkem sanglem. Tum panch pavtti kazar zali. Punn atam jea dadlea sangata tum ravta, tachea sangata tum kazar zaunk na.’ Tednam ti bail mhunntta: ‘Tum ek provadi mhunn mhaka atam kollʼllem. Ami hea dongrar Devachi bhokti korunk zai mhunn mhoje lok sangtat. Ani Judev lok sangtat ami fokot Jeruzalemantuch bhokti korunk zai. Punn ami koxi bhokti korunk zai hea vixim Mesias ieun amkam xikoitolo mhunn hanv patieta.’ Tednam konnankui sangonk na tosli khobor Jezu tika sangta: ‘Hanvuch to Mesias.’

Magir ti bail rokddich aplea xarant voita ani aplea lokank sangta: ‘Mhaka Mesias mellʼllo oxem mhaka dista. To mhojea vixim soglem zannam. Ieiat ani polloiat!’ Tednam lok tichea sangata tea baim-che lagim voitat ani Jezu kitem xikoitalo tem aikotat.

Samariache lok Jezuk aplea xarant ieun rav mhunn sangtat. Don dis meren to tankam xikoita ani zaito lok tacher bhavarth dovortat. Tednam te lok tea Samarit bailek sangtat: ‘Hea munxachim utram aikolea uprant, khorench hoch munis sonvsarantlea soglea lokank salvar kortolo mhunn amkam kollʼllem.’