Golgothant Jezu Morta

Mukhel-iadnik Jezuk razpalachea raj-mahalant gheun ietat. Tednam Pilat tankam vicharta: ‘Hea munxa add koslo arop asa?’ Te sangtat: ‘To apunn ek raza mhunntta.’ Pilat Jezuk vicharta: “Tum Judevancho Raza?” Jezu taka sangta: “Mhojem Raj hea sonvsarantlem nhoi.”

Jezun chuk kelea vo na tem pollounk Pilat taka Galiliecho raza, Herod-a lagim dhaddtta. Punn Herodak tachi kainch chuk mellona dekhun to porot Jezuk Pilata lagim dhaddtta. Tednam Pilat lokank sangta: ‘Hea munxan koslich chuk kelea mhunn Herodak vo mhaka disona. Dekhun hanv taka soddoitam.’ Tednam lokancho zomo bob marta: ‘Taka jivexim mar! Taka jivexim mar!’ Uprant, soinik Jezuk chabkamnim martat, tacher thuktat ani taka khub martat. Te tache tokler kantteancho mukutt korun ghaltat ani tachim fokannam korun oxem mhunnttat: ‘Judevanchea Raza, tuka nomoskar.’ Uprant porot, Pilat lokank sangta: ‘Mhaka hea munxan koslich chuk kelea mhunn disona.’ Punn lok bovall martat: “Taka khambear mar!” Dekhun Pilat Jezuk jivexim marunk taka soinikanchea hatant dita.

Uprant te Jezuk Golgotha, nanvachea eka zagear gheun voitat. Thoim te tache hat ani paim khambear khillaitat ani to khambo voir ubartat. Tednam Jezu oxem magnnem korta: ‘Bapa, tankam bhogos, karonn te kitem kortat tem tankam khobor na.’ Lok tachim fokannam korun mhunnttat: ‘Tum Devacho Put zalear, khambea voilo sokol denv ani svotak salvar kor!’

Jezu sangata don gunneavkarank pasun mornnachi xikxa dilʼli. Tanchea modlo eklo Jezuk sangta: “Tum Raza zata tednam mhozo ugddas kor.” Jezu taka oxi promise korta: ‘Tum mhojea sangata Sobit Bagent vo Paradise-ant astolo.’ Tea disa, donparchea vellar okosmat desant khub kallokh zata ani to kallokh tin voram meren urta. Jezuche thodde xis, tachea khambea lagim ube ravtat ani tanche modem, Jezuchi avoi, Marie pasun asta. Tednam Jezu Juanvak sangta ki tannem Mariecho, aplich avoi zalʼlea bhaxen samball korcho.

Xekim, Jezun mhunntta: “Purnn zalem!” ani man bhagoun to aplo jiv soddtta. Heach vellar, ek vhodd bhuimkamp zata. Tednam, mondirant Povitr ani Bhov Povitr hanchea modem aslolo datt poddʼddo pinzon tache don bhag zatat. Hem soglem polloun thoim aslolo soinikancho ek odhikari oxem mhunntta: ‘Ho khorench Devacho Put aslo.’