Jezu Jivont Zata

Jezu melea uprant, Juze nanvacho ek girest munis Pilata lagim porvangi magon Jezuchi kudd khambea voili denvoita. Juze ti kudd pormollit mosale lavun, mov ani borea kopddeamnim guttlaita ani magir ti vhoron, khoddop foddun toiar kelʼli eke nove dholint dovorta. Uprant tea dholichea tonddacher fator voddun to ti bond korta. Mukhel-iadnik Pilatak sangtat: ‘Amkam dista ki Jezuche xis tachi kudd chorun vhortole ani to jivont zala mhunn sangtole.’ Dekhun Pilat tankam sangta: ‘Ti dhol bore bhaxen bond korat ani thoim rakhonn korunk soinik dovrat.’

Tin disam uprant, sokall fuddem thoddeo bailo Jezuchea dholi lagim voitat ani thoim dholicho fator kuxin kaddla mhunn tim polloitat. Tea dholi bhitor ek devdut tankam oxem sangta: ‘Bhienakat, Jezu jivont zala. Tachea xisank vochon sangat ki tannim Jezuk Galilient mellchem.’

Magdalachi Marie dhanvon vochon Pedruk ani Juanvak melltta. Ti tankam sangta: ‘Konn tori Jezuchi kudd gheun gela!’ Hem aikon Pedru ani Juanv, dhanvon dholi-xim voitat. Thoim pavtoch tea dholint Jezuchi kudd na tem polloun, te porot aplea ghora voitat.

Marie dholi lagim porot aili tednam, tinnem dholi bhitor don devdutank polloile. Ti tankam mhunntta: ‘Tannim mhojea Somiak khoim vhela tem hanv nokllom.’ Uprant ti tea bagent eka munxak polloita ani to thoim kam korpi mhunn somzon, ti taka mhunntta: ‘Dhonia, tunvem taka khoim vhela tem please mhaka sang.’ To munis tika, “Marie!” mhunn ulo marta tednam, to Jezu mhunn tika kollon ieta. Ti vhoddlean mhunntta: “Guruji!” Ani taka ghott dhorun ravta. Tednam Jezu tika sangta: ‘Voch ani mhojea bhavank tunvem mhaka polloila mhunn sang.’ Ti rokddich dhanvon vochon xisank melltta ani tankam sangta ki tinnem Jezuk polloila.

Uprant teach disak, don xis Jeruzalema thaun Emaus mhunnttat thoim cholon voitale. Tednam ek munis tanchea sangata cholonk lagta ani te kitea vixim uloitat kai mhunn tanchea lagim vicharta. Te sangtat: ‘Tin dis poilim mukhel-iadnikamnim Jezuk jivexim marlolo, hem tunvem aikonk na? Punn atam to jivont zala mhunn thoddeo bailo sangtat!’ To munis tankam vicharta: ‘Provadeamnim sanglolea utrancher tumkam visvas na? Krist mortolo ani porot jivo zatolo mhunn tannim sanglolem.’ Tor to tankam Devachea Utrantli somzonni diunk lagta. Te Emausak pavtat tednam, xis tea munxak aplea sangata jevnnak rav mhunn sangtat. Jevnna vellar, to munis unddo gheta ani magnnem korta. Tednam to Jezuch mhunn tankam kolltta. Uprant Jezu nanch zata.

Te don xis dhanvon Jeruzalemant voitat, zoim eka ghorant apostl mellon ietale. Kitem ghoddlem tem tannim soglem apostlank sanglem. Tea ghorant bhitor te uloita astanach, Jezu tanchea modem ieun ubo ravta. Survatek, to Jezu mhunn apostlank visvasuch zaina. Punn uprant Jezu tankam sangta: ‘Mhoje hat polloiat, toxench mhaka hat laiat. Krist meloleantlo jivont zatolo hem poilench boroilʼlem aslem.’