Jezu Nustem Dhorpiank Dixtti Poddtta

Jezu apostlank dixtti poddon thoddea disam uprant, Pedru Galiliechea doriant nustem dhorunk voita. Tea vellar Thomas, Jakob, Juanv, ani thodde xis-ui tachea borabor voitat. Punn akʼkhi rat sarlea uprant pasun, tankam kainch nustem mellona.

Sokall fuddem, doria deger te eka munxak polloitat. To munis vhoddlean ulo marun tankam vicharta: ‘Tumkam kitem tori nustem mellʼllam? Te mhunnttat: “Na!” to munis tankam sangta: ‘Bottichea uzvea vatten tumchem zall ghalat.’ Te oxem kortat tednam, tankam itlem nustem poddtta ki tanchea lagim tem zall voddun haddunk zaina. Tednam ho munis Jezuch mhunn Juanvank kolltta ani to mhunntta: “Ho tor Somi!” Pedru rokdddoch udkant uddi marta ani ponvon Jezu lagim voita. Dusre xis bottin tachea fattlean ietat.

Te udkantlean deger pavle tednam, Jezu ujeacher unddo ani nustem bhazta tem tannim polloilem. Tannim dhorlolem thoddem nustem, Jezu tankam haddunk laita. Uprant to mhunntta: ‘Ieiat ani khaiat.’

Khaun zalea uprant, Jezun Pedruk vicharlem: ‘Tum nustem dhorpachea kama poros mhozo chodd mog korta?’ Pedrun mhunnttlem: ‘Hoi, Somia, hanv tuzo mog kortam mhunn tum zannam.’ Tednam Jezun taka sanglem: ‘Mhojea lhan menddrank chorvak vhor.’ Jezun porot taka vicharlem: ‘Pedru, tum mhozo mog korta?’ Pedrun mhunnttlem: ‘Somia, hanv tuzo mog kortam mhunn tum zannam.’ Tednam Jezun taka sanglem: ‘Mhojea lhan menddranchi kallji ghe.’ Jezun toch prosn tisre pavtti taka vicharlo. Tednam Pedru khub dukhi zalo ani tannem mhunnttlem: ‘Somia, tum soglem zannam. Hanv tuzo mog kortam mhunn tum zannam.’ Tor Jezun taka mhunnttlem: ‘Mhojea lhan menddrank chorvak vhor.’ Uprant tannem Pedruk sanglem: “Mhojea fattlean ie-it rav.”