Kornelak Povitr Xokti Melltta

Sezaria xarant, Romi foujecho ek vhoddlo odhikari aslo, tachem nanv aslem Kornel. To Judev naslo. Tori Judev taka resped ditale. To goribank ani gorjevontank khub modot kortalo. To Jehovak mantalo ani chukonastana tache lagim magnnem kortalo. Ek dis Kornelak dorxonant ek devdut dixtti poddtta. To devdut taka mhunntta: ‘Jehovan tujem magnnem aikolem. Atam tum tujea munxank Jopa xarant dhadd, zoim Pedru ravta. Ani taka tujea ghora apoi.’ Tednam rokddoch, Kornel tin munxank Jopa xarant dhaddtta. Tem xar dokxinne vatten sumar 50 kilometr pois aslem.

Hea vellar, Pedru Jopant aslo ani taka ek dorxon dixtti poddtta. Tea dorxonant to Judevamnim khaunk zainant toslim zonvaram polloita ani taka ek avaz aikonk ieta, zo taka tim zonvaram khaunk sangta. Punn Pedru nakarta ani sangta: ‘Hanvem koslinch oxudʼdh zonvaram mhojea jivitant kednanch khaunk na.’ Tednam to avaz taka sangta: ‘Hea zonvarank oxudʼdh mhunno naka. Karonn Devan tankam xudʼdh keleant.’ To avaz Pedruk oxem-i sangta: ‘Tin munis tujea dara kodde pavleat. Tanchea borabor voch.’ Pedru dara lagim vochon te kiteak aileat kai mhunn tankam vicharta. Te sangtat: ‘Amkam Kornel nanvachea, Romi foujechea eka odhikarean dhaddleat. Tannem tuka Sezariant aplea ghora ieunk sanglam.’ Tednam Pedru tankam aplea ghorant rat sarunk sangta ani dusrea disak to tanchea borabor Sezariak vochonk bhair sorta. Jopantle thodde bhav pasun Pedru borabor voitat.

Xekim, Pedru Kornelachea ghora pavta. Pedruk polloun Kornel tachea paim-am poddtta. Punn Pedru taka mhunntta: ‘Utth! Hanv pasun tujea sarko munis. Judev lok dusrea zatichea munxanchea ghorant vochonant. Tori Devan mhaka tujea ghora dhaddlo. Tor atam tunvem mhaka kiteak apoilo tem sang.’

Kornel Pedruk sangta: ‘Char dis poilim hanv Deva lagim magnnem kortalom. Tednam eka devdutan tuka apoi mhunn mhaka sanglem. Tor please amkam Jehova vixim xikoi.’ Pedru taka sangta: ‘Dev bhedbhav korina mhunn mhaka kollon ailem. Jim konn tachi bhokti korunk sodhtat tanchi bhokti to manun gheta.’ Jezu vixim Pedru tankam zaiteo vostu xikoita. Uprant Kornel ani tachea sangata aslolea sogleancher povitr xokti ieta ani tim bautizm ghetat.