Jailicho Odhikari Sot Xikta

Filipint ek chakorn asli, zicher ek noxtto dut bosololo. Tea noxttea dutak lagon tem cheddum fuddar sangtalem, ani oxem korun tem aplea dhoniank zaite poixe zhoddun ditalem. Paulu ani Silas Filipint aile tednam, tem cheddum zaite dis poriant tanchea fatta-fatt voitalem. Ani to noxtto dut taka oso bob marunk laitalo: “He munis Sogleant Vortea Devache sevok zaun asat.” Xevttak, Paulu tea noxttea dutak mhunntta: ‘Jezuchea nanvan hanv tuka hukum ditam, tache voilo bhair sor!’ Tednam to noxtto dut tea cheddva voilo bhair sorta.

Tea chakorni udexim tankam atam poixe zhoddunk mellona tem polloun dhoni khub ragar zatat. Te Paulu ani Silasak dhorun nogor odhikaream lagim vhortat. Te mhunnttat: ‘He munis kaido moddttat ani xarant sogleank tras ditat. Tednam odhikari Paulu ani Silasak danddeamnim marun jailint ghalunk hukum dita. Jailicho odhikari tankam ekdom bhitorlea jailint ghalta, zoim khub kallokh asta, ani tanche paim lakddachea follea bhitor ghaulun dovorta. Dekhun, tankam rat-bhor halonk mellona.

Punn jailint asonui Paulu ani Silas Jehovachi vakhannʼnni korun gitam gaitale ani dusrea koideank tem aikonk ietalem. Tednam okosmat, modle ratik ek vhoddlo bhuimkamp zata ani akʼkhi jail halonk lagta. Jailichi soglim daram uktim zatat ani koideancheo sanklleo tuntton poddttat. Jail-icho odhikari dhanvon bhitor voita ani jailichim daram uktim asat mhunn polloita. Atam sogle koidi pollon gele mhunn chintun, to aplo jiv kaddunk apli tolvar bhair kaddtta.

Tednanch, Paulu taka vhoddlean mhunntta: ‘Tuzo jiv kaddinaka! Ami sogle hangach asat!’ Jailicho odhikari dhanvon bhitor vochon Paulu ani Silasachea paim-amxim poddtta ani tankam vicharta: “Hanvem salvar zaunk kitem korunk zai?” Te taka sangtat: ‘Tunvem ani tujea familintlea soglea lokamnim, Jezucher bhavarth dovrunk zai.’ Uprant, Paulu ani Silas tankam Jehovachem utor xikoitat, ani jailicho odhikari, toxench tachea familintle sogle lok bautizm ghetat.