Pauluk Romak Dhaddttat

Pauluchi porgottnnechi tisri bhonvddi Jeruzalemant sompta. Thoim taka dhorun vhortat ani jailint ghaltat. Ratchea vellar, eka dorxonant Jezu taka sangta: ‘Tum Romant voitolo ani thoim porgottnni kortolo.’ Pauluk Jeruzalema thaun Sezariant vhortat ani thoim to don vorsam jailint asta. Pauluk Razpal Festusa mukhar ubo kortat tednam, Paulu sangta: ‘Hanv Romi Somraza lagim neai magtam.’ Tednam Festus taka sangta: “Tunvem Somraza koddem neai magla; tor tum Somraza koddem voitolo.” Tor, Pauluk Romant voitolea eka tarvant bosoitat, ani tachea sangata don Kristanv bhav, Lukas ani Aristarkus pasun voitat.

Tem tarum doria modem pavlem tednam, ek vhodd vadoll zata ani hem vadoll zaite dis urta. Tarvant aslolea sogleank dista ki tim atam mortolim. Punn Paulu tankam sangta: ‘Eka devdutan mhaka sopnant oxem sanglam: “Bhienaka Paulu. Tum Romant pavtoloch, ani tujea borabor tarvant asat tim-ui soglim surokxit astolim.” Tor dhir gheiat! Ami morchimnant.’

Tem vadoll 14 dis poriant thamboch na. Xevottak, tankam ek zomin dixtti poddtta. To Malta-cho zunvo aslo. Tea zunvear pavtana tarum renvent rombta ani moddtta, ani tache kuddke zatat. Punn tarvant aslole sogle 276 lok salvar zatat. Thoddim zannam penvon ani thoddim zannam tarvachea moddlolea kuddkeanchea adaran zunvear pavtat. Maltache lok tanchi kallji ghetat, ani tankam gormi mellonk uzo toiar kortat.

Tin mhoinneam uprant, soinik Pauluk eka dusrea tarvant ghalun Romant vhortat. To thoim pavta tednam, thoinche bhav taka mellonk ietat. Tankam polloun Pauluk dhir melltta ani to Jehovak thank you mhunntta. Paulu ek koidi aslo tem khorem, punn taka eka bhaddeachea ghorant ravonk porvangi melltta. Ani thoim ek soinik tachi rakhonn korta. To thoim don vorsam ravta. Lok taka mellonk ietat tednam to tankam Devachea Rajea vixim porgott korta ani Jezu vixim xikoita. Thoim astana Paulu, Asia Minor-antlea ani Judeiantlea sobhank chitti pasun boroita. Jehovan khorench zaitea desamnim bori khobor porgottunk Pauluk uzar kelo.