ODHEAI 07

Jehova Deva Vixim Bible Kitem Sangta?

Chhaplolem Polloi

Jehova Deva vixim chintʼtat tednam tumchea monant kitem ieta? To ekdom vorto ani amchea thaun khub pois asa vo to ek xokti ani taka koslech gunn nant oxem ghoddie tumkam disot. Punn khorem mhunnttlear, taka ekdom bore gunn asat ani taka amchi khub kallji asa mhunn Bible sangta.

1. Ami Devak kiteak pollounk xokonant?

Bible sangta “Devak konnuch pollounk xokona.” (Juanv 4:24) Jehova Devak munxam sarki haddam-masachi kudd na. Ani to sorgar asa dekhun ami taka pollounk xokonant.

2. Jehova Devak kosle gunn asat?

Jehova Devak ami pollounk xokonant hem khorem, punn tachea vixim xiktana, taka kitle bore gunn asat tem amkam kollttolem ani ami tachea lagim soronk pavtolim. Bible sangta: “Borem tem Sorvesporak manta ani Aplea bhoktank To kodinch sanddcho na.” (Stotr 37:28) Toxench, jim konn trasant asat tankam to ‘aplemponn dakhoita ani tanchi kakut korta.’ (Jakob 5:11) Stotr 34:18 mhunntta, “Zanchem kalliz dukhovlam khontovlam, tanche sorxem Sorvespor asach! Zanchem mon kollvollta vollvollta, tancher Sorvespor hat oddta.” Ami jem kitem kortat tem polloun Jehovak koxem dista tem tumi zannant? Ek munis zannam zaun kitem-i vaitt korta tednam Jehova dukhi zata. (Stotr 78:40, 41) Punn ek munis borem korta tednam Jehova khuxal zata.—Mhonnʼnneo 27:11 vachat.

3. Jehova Dev amcho mog korta mhunn amkam koxem kolltta?

Jehovacho vorto gunn mhunnttlear mog. Bible sangta, “Dev mog zaun asa.” (1 Juanv 4:8) Bible vachun ani rochnna polloun to amcho kitlo mog korta tem amkam kollon ieta. (Itihas 14:17 vachat.) Udharonnak, Jehovan amkam koxim rochleant tacher niall korat. Ami sobit rong pollounk xoktat, songit aikonk xoktat, ruchik jevonn chakunk xoktat. Hea soglea vostum vorvim dhadoxi zaunk Jehovan amkam tank dilea. Tor, ami khuxal aslolim Jehovak zai mhunn hachea voilean kollon ieta.

KHOLAIEN XIKAT

Jehova ojapachim kamam koxim korta ani to aple vorte gunn koxe dakhoita tem zannam zaum-ia.

4. Povitr atmo mhunnttlear Devachi povitr xokti

Sangata Dovorlole Fottu: Devachea povitr xokten kelʼlim kamam. 1. Vixv ani groh. 2. Ek Bible boroupi Devache vichar eka kovlleant boroita.

Zoso ek munis aple hat uzar korun kam korta, tosoch Jehova Dev aplo povitr atmo uzar korun aplem kam korta. Bible dakhoita ki povitr atmo Devachi xokti zaun asa. Lukas 11:13 ani Itihas 2:17 vachun hea prosnanche zobab zannam zaum-ia:

Ami Deva lagim magot zalear Dev amcher povitr xokti ‘votoitolo.’ Tor povitr xokti mhunnttlear kitem, to dev vo ti Devachi xokti? Tumi toxem kiteak mhunnttat?

Jehova Dev aplea povitr xokte udexim ojapachim kamam korta. Stotr 33:6 ani 2 Pedru 1:20, 21 vachun hea prosnacho zobab zannam zaum-ia:

Jehovan apli povitr xokti uzar korun koslim kamam keleant?

5. Jehova Devak ekdom bore gunn asat

Moizes zaitea vorsam thaun Jehovachi seva kortalo, tori astana to tachea vixim anik zannam zaunk sodhtalo. Tannem Devak mhunnttlem: “Tujeo vatto mhaka dakhoi, he porim hanv tujem mon somzotolom.” (Suttka 33:13) Ani tea uprant, Jehovan taka aplea gunnam vixim sanglem. Suttka 34:4-6 vachun hea prosnanche zobab zannam zaum-ia:

Jehovan Moizesak aplea vixim kitem sanglem?
Jehovache khoinche gunn tumkam avoddle?

6. Jehova amchi porva korta

Adlea kallar, Devache lok Ejiptant gulam asle. Aple lok trasant asat tem polloun Jehovak koxem dislem? AUDIO aikon vo Suttka 3:1-10 vachun sokol dilʼlea prosnanche zobab zannam zaum-ia.

AUDIO: Jehovak Tanchi Kallji Asli (2:33)

Aplea lokancher tras ietat tednam Jehovak koxem bhogta?—Vers 7 ani 8 polloiat.
Jehova amkam modot korunk sodhta kai, ani oxem korunk taka xokti asa kai? Tumkam oxem kiteak dista?

7. Rochnna polloun amkam Rochnnarache gunn dison ietat

Sangata Dovorlole Fottu: Ek vhoddli whale ani tichem por, fulam ani ek hummingbird.

Jehovan jem kitem rochlam tantuntlean taka kosle gunn asat tem ami zannam zaunk xoktat. VIDEO polloum-ia. Uprant Romkarank 1:20 vachun sokol dilʼlea prosnacho zobab zannam zaum-ia.