ODHEAI 08
Ami Jehova Lagim Ixttagot Korunk Zata
Jehovak zai ki ami tache lagim ixttagot kelʼli. Tache gunn, tacheo vatto, ani tacho udʼdhex zannam zatat tednam ami tache lagim ixttagot korunk anvddetolim. Punn ami khoreanich Deva lagim ixttagot korunk zata kai? (Stotr 25:14 vachat.) Deva lagim ixttagot korunk ami kitem korunk zai? Ani Jehova sogleam poros boro ixtt kiteak zaun asa? Bible amkam hea prosnanche zobab dita.
1. Jehova amkam koslem amontronn dita?
“Devak lagim sorat, ani to tumchea lagim sortolo.” (Jakob 4:8) Hacho orth kitem? Jehova amkam aplea lagim ixttagot korunk amontronn dita. Thodde lok chintʼtat, ‘Ami Devak pollounk xokonant zalear ami tachim ixttam koxim zatolim?’ Jehova Devan Bible-ant aplea vixim zaitem sanglolem asa. Tem zannam zaun ami tachea lagim ixttagot korunk zata. Ami Jehovak pollounk xokonant tem khorem, punn Bible-antlean tacho sondex vachtat tednam tachea sangata amchi ixttagot ghott zata.
2. Jehova ek boreantlo-boro ixtt oxem ami kiteak mhunnonk zata?
Jehova Dev amcho mog korta titlo anik konnuch korcho na. Ami sodanch khuxal aslolim taka zai. To amkam modot korunk sodhta. Tor trasanchea vellar ami tachea lagim magnnem korunk zai. Bible sangta, “tumchea soglea uskeancho bhar tacher ghalat, karonn taka tumchi kallji asa.” (1 Pedru 5:7) Jehova aplea ixttank modot korunk, bhuzvonn diunk ani tanchem magnnem aikonk sodanch toiar asa.—Stotr 94:18, 19 vachat.
3. Aplea ixttamnim kitem kelʼlem Jehovak zai?
Jehova sogleancho mog korta, punn ‘apli bhokti kortoleank to aplem kalliz ugoddtta’ mhunnche, tanchea lagim ghott ixttagot korta. (Stotr 25:14) Aplea ixttamnim borem tem korun, vaitt tem nakarlolem taka zai. Thoddeank, Jehova sangta tem soglem aplea lagim korunk zaunchem na oxem disot. Punn, ami chuktat mhunn Jehova somzota. Ek munis soglea kallzan tacho mog korta ani taka manvota tem korunk proitn korta tednam Jehova khuxal zata.—Stotr 147:11; Itihas 10:34, 35.
KHOLAIEN XIKAT
Ami Jehova lagim koxi ixttagot korunk zata ani toch amcho sogleam poros boro ixtt kiteak zaunk xokta tem zannam zaiat.
4. Abraham Jehovacho ixtt aslo
Bible sangta, Abraham (taka Abram pasun mhunnttla) nanvacho munis Devacho ixtt aslo. Abrahamachea udharonnatlean Devache ixtt zavop mhunnttlear kitem tem kollon ieta. Utpoti 12:1-4-ant Abrahama vixim vachun hea prosnanche zobab zannam zaum-ia:
Jehovan Abrahamak kitem korunk sanglem?
Jehovan taka kosli bhas dili?
Jehovachea adnea pormonnem Abrahaman kitem kelem?
5. Aplea ixttamnim kitem kelʼlem Jehovak zai?
Amchea ixttamnim amchea pasot kitem tori borem kelʼlem amkam zai.
Tumchea ixttamnim tumchea pasot kitem kelʼlem tumkam zai?
1 Juanv 5:3 vachun hea prosnacho zobab zannam zaum-ia:
Aplea ixttamnim kitem kelʼlem Jehovak zai?
Jehovacheo adnea pallunk, ami amcheo vaitt sonvoim-eo ani vagnnuk soddun diunk zai. Izaias 48:17, 18 vachun hea prosnacho zobab zannam zaum-ia:
Jehova aplea ixttank apleo adnea pallunk kiteak sangta?
Zoso ek ixtt amchem borem chintʼta ani ami surokxit aslolim taka zai, tosoch, Jehova pasun aplea ixttam vixim chintʼta
6. Jehova aplea ixttam pasot kitem korta?
Jehova aplea ixttank trasancho fuddo korunk modot korta. VIDEO polloun sokol dilʼlea prosnacho zobab zannam zaum-ia.
Niraxiponnachim bhavnam pois korunk Jehovan Crystal-ak koxi modot keli?
Izaias 41:10, 13 vachun hea prosnanche zobab zannam zaum-ia:
Jehovan, aplea soglea ixttam pasot kitem kortolo mhunn bhas dilea?
Jehova tumcho ek boro ixtt zaunk xokta oxem tumkam dista kai? Kiteak?
Gorjechea vellar tumcho ghott ixtt tumkam modot korta tosoch Jehova pasun tumkam modot kortolo
7. Ami Jehova lagim ulounk zai ani ami tachem aikonk zai
Ixttam eka-meka lagim uloitat ani eka-mekachem aikotat tednam tanchi ixttagot ghott zata. Stotr 86:6, 11 vachun hea prosnanche zobab zannam zaum-ia:
Ami Jehova lagim koxem ulounk zata?
Jehova amche lagim koso uloita?
Ami magnnea vorvim Jehova lagim uloitat ani to amche lagim Bible-a udexim uloita
THODDO LOK MHUNNTTA: “Ami Devak pollounk xokonant, tor ami tachim ixttam koxim zatolim?”
Ami Jehovachim ixttam zaunk xoktat mhunn dakhounk tumi tankam Bible-antlem khoinchem vers dakhoitolim?
KITEM XIKLIM
Jehova tumchea lagim ixttagot korunk sodhta ani oxem korunk to tumkam adar kortolo.
Porot Ugddas Korum-ia
Jehova aplea ixttank koso modot korta?
Jehova aplea ixttank bodlav korunk kiteak sangta?
Jehova aplea ixttam koddlean chodd opekxa korta oxem tumkam dista? Kiteak?
ANIK SODHAT
Deva lagim ixttagot kelear tumkam koso faido zatolo?
“Jehova Devak Vollkhon Ghevop Faideachem” (The Watchtower, February 15, 2003)
Deva lagim ixttagot koxi korunk zata tem zannam zaiat.
Jehova lagim ixttagot kelʼlean eke bailechem jivit koxem bodolʼlem tem zannam zaiat.
Thoddim tornnattim Jehova vixim kitem chintʼtat tem polloiat.