AMCHEM KRISTI JIVIT
Jehova Xist Dita Tednam Tea Manddavollik Tenko Diun Mog Dakhoiat
Ek bhav vo bhoinn chukichem kam korun poschatap korina zalear taka sobhentlean bhair kaddtat. Oxem kelolean sobhechi rakhonn zata ani tea munxak xist melltta. (1Kor. 5:6, 11) Hem khorem ki jednam konnakui sobhentlean bhair kaddtat tednam tachea familichea lokank ani neai somitichea bhavank khub dukh zata. Punn hea manddavollik ami tenko ditat tednam, ami Jehovacho mog kortat mhunn dakhoitat.
Ami hea manddavollik purnn tenko ditat karonn, ami Jehovachea povitr dorjeancho mog kortat ani tachem nanv piddʼddear zalʼlem amkam naka. (1Ped. 1:14-16) Toxench, ami tea munxa pasot-ui mog dakhoitat zaka sobhentlean bhair kaddla. Ekleak xist melltta tednam taka ani tachea ghorcheank khub dukh zata hem khorem, punn hantuntlean tankam “xantichim follam” bhogunk mellttolim. (Heb. 12:5, 6, 11) Sobhentlean bhair kaddlolea munxa sangata vo svota sobhentlean bhair sorlolea munxa sangata ami sombond dovortat zalear, ami Jehovachea manddavolli add voitat. Ugddas dovrat, Jehova aplea sevokank ‘favo titlich xist laita.’ (Jer. 30:11) Tor, Jehovacher bhorvonso dovrat ani tachea manddavollik tenko diat. Jehova sangata ghott sombond dovrunk vavr korit ravat. Ani ek dis to munis Jehova lagim porot ietolo mhunn khatri dovrat.—Iz. 1:16-18; 55:7.
PURNN KALLZAN JEHOVAK VISVAXI RAVAT, HO VIDDEO POLLOIAT ANI UPRANT SOKOL DILOLEA PROSNANCHE ZOBAB DIAT:
Apli bhurgim sot soddun voita tednam avoi-bapaik koxem bhogta?
Sobhentlea bhav-bhoinnamnim hea visvaxi familik koso dhir diunk zata?
Ami amchea famili poros Jehovak chodd visvaxi ravunk zai mhunn, Bible-antli khoinchi ghoddnni dakhoun dita?
Ami amchea famili poros chodd Jehovak visvaxi koxim ravonk zata?