Obheasacho Lekh 8
Nattkai Pois Korun Xanti Korunk Proitn Korat
“Xanti vosounk ani ekamekak dhir diunk pavoita te vatten cholum-ia.”—ROM. 14:19.
GIT 113 Our Possession of Peace
KITEM XIKTOLIMa
1. Nattkaiek lagon Juzechea familichem kitem zalem?
JAKOB aplea soglea putancho mog kortalo. Punn, 17 vorsancho Juze taka chodd opurbaiecho aslo. Tor Juzechea bhavamnim kitem kelem? Tankam Juzechi nattkai zali ani hea nattkaiek lagon te tacho dves korunk lagle. Punn Juzen aplea bhavank kainch vaitt korunk naslem. Tori astana tannim taka gulamponnant viklo ani eka zongli zonvaran tachea opurbhaiechea putak jivexim marlo mhunn sangon aplea bapaik fott marli. Tanchea nattkaiek lagon tanchea familichi xanti piddʼddear zali ani tanchea bapaik tannim khub dukhoilo.—Ut. 37:3, 4, 27-34.
2. Galasiekarank 5:19-21-ant sanglolea pormonnem, nattkai kiteak itli dokheachi?
2 Bible-ant, “patki soimba pormannem choltat tanchim kamam” hea vixim sangtana, nattkaib pasun hea kamant mellon asa. Ani oslo gunn aslolea munxak Devachem raj mellchem na. (Galasiekarank 5:19-21 vachat.) Choddxe pavtt dusmankai, maramari ani rag hanchem mull karonn nattkai zaun asta.
3. Hea lekhant ami kitem bhasabhas kortolim?
3 Nattkai asta tednam eka familint aslolo sombond ani xanti piddʼddear zaunk xokta mhunn amkam Juzechea bhavanchea udharonnantlean kollon ieta. Juzechea bhavamnim kitem kelem toxem ami korchim nant tem khorem. Punn amchem kalliz oporipurnn ani ghatki asa mhunn ami ugddas dovrunk zai. (Jer. 17:9) Toxem zalʼlean thodde pavtti amkam dusream vixim nattkai zaunk xokta. Khoinchea karonnak lagon amchea kallzant nattkaiechim bhavnam ieunk xokta tem zannam zaunk ami Bible-antlim thoddim udharonnam polloum-ia. Tea uprant nattkai pois korunk ani xanti samballunk ami kitem korunk zata hea vixim ami bhasabhas kortolim.
KOSLEA KARONNAK LAGON AMKAM NATTKAI ZAUNK XOKTA?
4. Filistevkarank, Izakachi nattkai kiteak zali?
4 Konnui girest asta tednam. Izak ek girest munis aslo dekhun Filistevkarank tachi nattkai zali. (Ut. 26:12-14) Aplea zonvarank udok diunk Izak uzar kortalo teo baim-o pasun Filistevkaramnim maten purleo. (Ut. 26:15, 16, 27) Aplea poros dusream lagim chodd girestkai asta tednam, Filistevkaram bhaxen aiz thoddea lokank tanchi nattkai zata. Tankam dusream lagim asloleo vostu zai ani teo vostu dusream lagim asloleo pasun tankam naka.
5. Dhormik fuddari Jezucher kiteak nattkaien bhorle?
5 Zaitea zannank konnui avoddttʼtta tednam. Zaitea lokank Jezu avoddttʼttalo dekhun Judev dhormik fuddareank Jezuchi nattkai zali. (Mt. 7:28, 29) Jezu Devacho prothinidi aslo ani to lokank sot xikoitalo. Tori astana, hea dhormik fuddareamnim Jezu vixim fotti kanneo sangon tachem nanv piddʼddear kelem. (Marku 15:10; Juanv 11:47, 48; 12:12, 13, 19) Hantuntlean ami kitem lisanv xiktat? Sobhentlim bhav-bhoinnam ekleachea borea gunnank lagon tacho mog kortat zalear ami tachi nattkai korunk nozo. Tachea bodlek ami tachea borea gunnanchi dekh gheunk zai.—1 Kor. 11:1; 3 Juanv 11.
6. Diotrefesak nattkai asli mhunn tannem koxem dakhoilem?
6 Sobhent konnakui zobabdari melltta tednam. Poilea xekddeant Kristanv sobhent fuddakar ghetolea bhavanchi Diotrefesak nattkai zali. To sobhent ‘sogleam-von vhoddlo zaunk sodhtalo’ dekhun, tannem apostl Juanv ani her bhavam add dusreank chaddio sangleo. (3 Juanv 9, 10, NW) Ami Diotrefesa sarkim kednanch zaunchim nhoi. Punn ami ek sueog melloun gheunk purtim asat mhunn amkam dista zalear ani to sueog dusrea konnank melltta tednam amkam tea bhava vo bhoinni vixim nattkai zaunk xokta.
Nattkai bore gunn zoxe mog, doia-maia ani doiallai vaddounk dina. Amchem kalliz matie sarkem zaun asa, ani amche bore gunn sobit fulam sarke zaun asat. Punn nattkai eka vikari nera sarko zaun asa. (Peregraf 7 polloiat)
7. Amkam nattkai asa zalear amcher kitem porinnam zaunk xokta?
7 Nattkai eka vikari nera sarko asa. Nattkaiechem bim amchea kallzant kirlota zalear, taka uprant kaddun uddounk kotthin zata. Her vaitt gunn zoxe nosai, gorv, ani svarth asta tednam nattkai vaddtta. Ani nera sarko nattkai ho gunn asta tednam bore gunn zoxe mog, doia-maia vaddounk dina. Amchea kallzant nattkaiechem bim kirlonk suru zatanach, ami tem umttun kaddunk zai. Ami nattkai koxi pois korunk xoktat?
KHALTIM ANI DHADOXI ZAIAT
Nera sarki asloli nattkai ami koxi pois korunk zata? Devachea povitr xoktechea modotin ami nattkai umttunk xoktat ani tachea bodlek khaltikai ani dhadosponn vaddounk xoktat (Peregraf 8-9 polloiat)
8. Nattkai pois korunk amkam kosle gunn modot korunk xoktat?
8 Khaltim ani dhadoxi astat tednam ami nattkai pois korunk xoktat. Amkam osle bore gunn astat tednam amkam nattkai aschina. Ami khaltim asat zalear ami amchea vixim chodd chintinant ani dusream poros amkam chodd mellonk zai mhunn ami chintinant. (Gal. 6:3, 4) Dhadoxi asta to, aplea lagim asa tantunt khuxal asta ani tem to dusream lagim asa tachea sangata sor korina. (1 Tim. 6:7, 8) Konnank kitem borem melltta tednam ek khalto ani dhadoxi munis, tem polloun khuxal zata.
9. Galasiekarank 5:16 ani Filipkarank 2:3, 4-ant sanglolea pormonnem, povitr xokti amkam kitem korunk modot korta?
9 Nattkai pois korun khaltim ani dhadoxi zaunk, amkam Devachea povitr xoktechea modotichi goroz asa. (Galasiekarank 5:16; Filipkarank 2:3, 4 vachat.) Jehovachi povitr xokti amchea kallzantlim chintnam ani hetu topasunk modot korta. Devachea modotin ami vaitt chintnam ani bhavnam kaddun uddoun amchea monant borim chintnam ani bhavnam ami vaddounk xoktat. (St. 26:2; 51:10) Moizes ani Paulun nattkai ho gunn pois kelo, tanchem udharonn atam polloum-ia.
Tombu lagim Moizes, Joshua ani Israelit vhoddilancho zomo ubo asa. Provadi koxe vagtat tea don dadleank mona korunk Joshua Moizesak sangta (Peregraf 10 polloiat)
10. Khoinchea poristhitin Moizesak nattkai zaunk xoktali? (Masikachem fuddlem chitr polloiat.)
10 Moizesak Devachea lokancher khub odhikar aslolo. Punn to odhikar dusreank mellʼllo tednam to addaunk tannem proitn korunk na. Udharonnak, eka vellar Jehovan Moizesacher asloli thoddi povitr xokti kaddun, zomaticho mattov vo tombu fuddem ube aslolea Israelit vhoddilanchea eka zomeacher ghatli. Tachea uprant tea tombu lagim ieunk naslolea don vhoddilancher pasun povitr xokti votoili ani te provadi koxe vagonk lagle mhunn Moizesachea kanar poddlem. Uprant, tea don vhoddilank mona korunk Joshuan Moizesak sanglem tednam tannem kitem kelem? Jehovan tea don vhoddilancher apli povitr xokti votoili mhunn Moizesak nattkai zaunk na. Tachea bodlek, to khalto aslo dekhun tankam to sueog mellʼllo mhunn to khuxal zalo. (Lok. 11:24-29) Moizesa thaun ami koslem lisanv xikonk xoktat?
Moizesa sarke Kristi vhoddil koxe khalte zaunk xoktat? (Peregraf 11-12 polloiat)c
11. Vhoddilamnim Moizesachi dekh koxi gheunk zata?
11 Chint, tum ek vhoddil zaun asa ani sobhent tuka asloli ek zobabdari avoddtta. Punn atam ti eka dusrea bhavak diun, taka proxikxonn diunk tuka sanglam. Oxem tujea lagim kednam-i tori ghoddlam? Udharonnak, dor sumanak aslolo Pahrogopur Obheas gheunk tuka avoddtta astolo. Punn ti zobabdari atam dusrea eka bhavak diunk tharailam. Ani tea bhavak tunvem atam proxikxonm diunk zai. Tum Moisesa sarko khalto asa zalear oslea poristhitint tuzo valor unno zatolo mhunn chintchona. Tachea bodlek, tea bhavak modot korunk tum khuxal zatolo.
12. Aiz zaitim Kristanv dhadoxi ani khaltim asat mhunn koxim dakhoitat?
12 Ani ek udharonn polloum-ia. Zaitea zanttea bhavank fuddo korcho poddtta ti ek poristhiti. Zaitim vorsam sobhent vhoddilancho sohokari mhunn seva kelole bhav, 80 vorsanchem zatat tednam tem ap-khuxen ti zobabdari soddun ditat. Toxench, sorkittachi dekhrekh korpi bhav 70 vorsam piraieche zatat tednam tancho sueog soddun dusri ek seva korunk khalitkaien toiar zatat. Ani halinchea vorsamnim sonvsarbhor aslolea zaitea Bethel familichea sodoxeank porgottnni korunk nemleat. Tankam poilim aslole sueog dusrea konnank dileat mhunn hea bhav-bhoinnank nattkai zaina.
13. Khoinchea karonnank lagon Pauluk 12 apostlanchi nattkai zaunk xoktali?
13 Dhadoxiponn ani khaltikai aslolem anik ek udharonn polloum-ia. Tem apostl Pauluchem. Tannem aplea bhitor nattkai vaddounk diunk na. To porgottnnent khub vavurlo. Tori astana, tannem khaltikaien mhunnttlem: “Dhormdutam modem soglleam-von hanv hinn-holko . . . mhaka Dhormdutachem nanv porian favo na.” (1 Kor. 15:9, 10) Jezun prithumer seva keli tednam 12 apostl tachea sangata asle. Punn, Jezu moron punorjivont zaisor Paulu ek Kristanv zaunk naslo. To Kristanv zalea uprant “videxiancho Dhormdut” mhunn taka nemlo. Punn 12 apostlam modem ek zauncho khas sueog taka mellonk na. (Rom. 11:13; Itihas 1:21-26) Tea 12 apostlam vixim ani Jezu sangata taka seva korchea sueoga vixim, Pauluk nattkai zaunk na. Bodlek to apleak mellʼllolea sueogant dhadoxi aslo.
14. Ami dhadoxi ani khaltim asat zalear kitem kortolim?
14 Ami Paulu bhaxen dhadoxi ani khaltim asat zalear, Jehovan jea konnank odhikar dila tankam ami resped ditolim. (D.I 21:20-26) Kristi sobhent fuddakar gheunk Jehovan thoddea dadleank nemleat. Te opurnn aslear pasun Jehova tankam “dadleanchea rupant dennim” koxim lekhta. (Ef. 4:8, 11, NW) Nemuk kelolea hea dadleank ami resped ditat tednam ani tanchem margdorxon ami khaltikaien pallttat tednam ami Jehovachea lagim sortat ani amchea bhav-bhoinnam sangata xanti samballunk pavtat.
‘XANTI HADDTTA TEA VATTEN CHOLUM-IA’
15. Ami kitem korchim goroz asa?
15 Ami eka-mekachi nattkai kortat zalear amchea modem xanti aschina. Ami amchea kallzant thaun nattkaiechim bhavnam umttun kaddunk zai. Ani toxench ami dusreanchea kallzant nattkaiechim bhavnam ieunk duinchim nhoi. “Xanti vosounk ani ekamekak dhir diunk pavoita te vatten cholum-ia.” Hea Jehovachea adneak ami pallo ditat zalear ami him mhotvachim pavlam gheukuch zai. (Rom. 14:19) Nattkai pois korunk ami dusreank koxim modot korunk xoktat, ani xanti samballunk ami kitem korunk zai?
16. Nattkai pois korunk ami dusreank koxi modot korunk zata?
16 Amchea sobhavacho ani korneancho dusreancher vhodd porinnam zaunk xokta. Hea sonvsarachea lokank ami “girestkaiechi boddai” keloli zai. (1 Juanv 2:16) Punn oslo sobhav nattkai vaddoita. Ami sodanch amchea lagim asat tea vostu vixim ani gheunchim asat tea vostu vixim uloinant zalear dusrim nattkaien bhorchimnant. Amkam sobhent zobabdari melltta tednam ami koxim vagtat tantuntlean pasun dusreank nattkai pois korunk ami modot kortat. Amchea zobabdare vixim ami dusream lagim uloit ravtat zalear tanchea kallzant ami nattkai vaddounk xoktat. Tachea bodlek, ami dusreanchea gorzancher dhean ditat tednam ani tim kortat tea borea kamanchi tokhnnai kortat tednam dhadoxi zaunk ami tankam modot kortat. Tea bhair, oxem kelolean ami sobhent ekvott ani xanti samballttat.
17. Juzeche bhav kitem korunk pavle, ani kiteak?
17 Ami nattkai pois korunk xoktat! Ami portun Juzechea bhavanchem udharonn polloum-ia. Zaitea vorsam fattim te Juze sangata vaitt toren vaglole. Ani atam tankam Juze Ejiptant melltta. Aplea bhavank apunn khoro konn tem sangchea poilim, te bodolʼleat kai na mhunn Juzen tanchim porikxa ghetli. Tannem tankam jevnnak apoile ani tachea dakhttea bhavak, Benjaminak dusrea poros chodd dhean dilem. (Ut. 43:33, 34) Punn tache bhav Benjaminacher nattkaien bhorlem mhunn khoinch sangona. Bodlek Benjaminachi ani aplo bapui Jakobachi, porva asa mhunn tannim dakhoilem. (Ut. 44:30-34) Juzechea bhavamnim nattkai ho gunn pois kelolean te portun familint xanti haddunk pavle. (Ut. 45:4, 15) Teach bhaxen, ami amchea kallzant aslolim nattkaiechim bhavnam umttun kaddlim zalear ami amchea familint toxench sobhent xanti samballunk pavtolim.
18. Jakob 3:17, 18-ant sanglolea pormonnem, ami xanti vaddounk modot kortat tednam kitem zatolem?
18 Ami nattkai pois korun xanti samballunk proitn korunk zai mhunn Jehova axeta. Hem korunk ami khub vavrunk zai. Amkam nattkai zaunk xokta mhunn hea lekhant ami xiklim. Nattkaien bhorlolea lokam modem ami aiz jietat. Punn ami khaltikai, dhadosponn ani upkariponn vaddoitat zalear ami nattkai korchimnant. Tachea bodlek, ami xanti vaddounk xoktolim jea udexim ami bore gunn dakhounk pavtolim.—Jakob 3:17, 18 vachat.
GIT 130 Udar Kallzan Bhogsum-ia
a Jehovachea songottnnent xanti asa. Punn dusream vixim amkam nattkai asa zalear, ti xanti ami piddʼddear korunk xoktat. Nattkai zaunk karonn kitem, tea vixim ami hea lekhant xiktolim. Tea bhair, ho gunn pois korun ami xanti koxi samballunk zata tea vixim pasun ami bhasabhas kortolim.
b UTRACHI SOMZONNI: Bible-ant sanglolea pormonnem, eka munxak nattkai asa zalear dusream lagim asa tem to melloun gheunk sodhta. Ani dusrea lagim teo vostu asloleo pasun taka naka.
c CHITRANCHI MAHITI: Vhoddilanchea mittingent sobhent Pahrogopur Obheas ghetolea zanttea bhavak hea fuddem apli zobabdari eka tornnattea bhavak diun taka proxikxon diunk sanglem. Tea zanttea bhavak apli zobabdari khub avoddttʼttali ti khori, punn vhoddilamnim ghetlolea nirnnoi-ak to kallzant thaun tenko dita ani to tornnattea bhavak faideak poddttat tosleo suchounneo dita ani kallzantlean to taka xabaski dita.