Ap-domaunni—Jehovachi Manoitai Melloun Gheunk Ho Gunn Gorjecho

“Mhojea mauxecho cheddo mhojea sangata zogddim korunk laglo tednam hanvem tachea golliak dhorlo ani tacho gollo chiddʼddounk laglo. Hanv taka jitoch marunk sodhtalo.”—Paul.

“Ghora hanv barik-barik karonnank lagon ragar zatalo. Ghorantleo vostu, zoxeo kodelam, khellnni ani hatant melItta tem hanv foddttʼttalom.”—Marco.

Ami ghoddie itlem vaitt korunk voichim nant. Tori punn, amkam sogleank thodde pavtti amcho rag tabeant dovrunk kotthin zaunk puro. Hachem ek karonn mhunnttlear, poilo munis Adanva udexim ami patki zaleant. Tor, amkam patok korchi itsa asa. (Rom. 5:12) Paul ani Marco bhaxen thoddeank aplo rag tabeant dovrunk kotthin zata. Herank aplim chintnam tabeant dovrunk kotthin zaunk puro. Udharonnak, tankam jea vostunchi bhirant dista vo niraxiponn haddtta tea vixim tim chintit ravtat astolim. Ani thoddeank loingik pozoddponn, bebdikai vo gungi vokhdam nakarunk kotthin zaunk puro.

Jim konn aplim chintnam, itsa ani korneo tabeant dovrinant, tim aplem jivit piddʼddear korunk xoktat. Punn oxem zaina zaunk ami kitem korunk xoktat? Ami ap-domaunni ho gunn utpon korunk zata. Hem korunk ami tin prosnancher bhasabhas korum-ia: (1) Ap-domaunni mhunnttlear kitem? (2) To gunn kiteak gorjecho? (3) Ho gunn zo ‘povitr xoktechea follacho’ bhag zaun asa, to ami koso utpon korunk zata? (Gal. 5:22, 23) Uprant, ap-domaunni ho gunn amkam thodde pavtti asona tednam ami kitem korunk zata tea vixim bhasabhas kortolim.

AP-DOMAUNNI MHUNNTTLEAR KITEM?

Ap-domaunni aslolo munis aplea dor eke itse pormonnem, kam korina. To Devak manvona tea vixim ulounk ani teo vostu korunk fattim sorta.

Ap-domaunni asop mhunnchem kitem, tem amkam Jezun dakhoun dilem. Bible mhunntta: “Taka jastio marleo tednam Tannem portun jastio marunk nant; Taka dogdaitale tednam Tannem konnakuch domkaunk na, punn nitivont Monsubidarachea hatant visvasan Aplem jivit soddlem.” (1 Ped. 2:23) Jezuk khambear khillailʼlo astana virodheamnim tachim fokannam keli. Tea vellar, Jezun ap-domaunni ho gunn dakhoilo. (Mt. 27:39-44) Hachea poilim, Jezuchea ulovpant chuki kaddunk dhormik fuddari taka zaite prosn vichartale tednam Jezun ap-domaunni ho gunn dakhoilo. (Mt. 22:15-22) Thoddea ragixtt Judevamnim, Jezucher marunk fattor ubarle tednam pasun Jezun ekdom borem udharonn dovorlem. Tanche thaim vaitt toren vagchea bodlek, “Jezu liplo ani Devmondirantlo bhair sorun gelo.”—Juanv 8:57-59.

Ami Jezuchi dekh gheunk zata kai? Ami tachi dekh gheunk zata titlo proitn korunk zai. Apostl Pedrun sanglem: “Kristan tumche khatir koxtt sosle ani Aplea panvlamnim tumi cholunk tumkam Tannem dekh dovorlea.” (1 Ped. 2:21) Ami oporipurnn aslear pasun Jezuchi dekh gheunk zata ani ap-domaunni ho gunn dakhounk zata. Hem korop kiteak gorjechem?

AP-DOMAUNNI HO GUNN KITEAK GORJECHO?

Jehovachi maniotai mellonk amkam ap-domaunni ho gunn asop gorjecho. Zaitim vorsam ami Jehovachi seva visvaxiponnim kelea astoli. Punn ami kitem kortat ani uloitat tacher amkam tabo na zalear, Jehova lagim amchi ixttagot tuttonk xokta.

Udharonnak, Moizesa vixim Bible oxem sangta: “Moizes ekdom khalto vinomr aslo—prithumechea sorv monʼxam poros odik vinomr kallzacho.” (Lok. 12:3) Zaitim vorsam Moizesan Israelitkaranchem gunngunnovop pasiensan aikolem. Punn ek dis tannem aplea ragacher tabo dovrunk na. Goroz titlem udok na mhunn te portun gunngunnunk lagle tednam Moizes ragar zalo. Ragan bhoron tannem lokank mhunnttlem: “Fitur monʼxamno, aikat! Hea khoddpantlem tumkam udok bhair soroxem korum?”—Lok. 20:2-11.

Moizesan aplo rag tabeant dovrunk na. Vizmit korun udok dilʼlea pasot Jehovak man diunchea svater Moizesan to man apnnank melloun ghetlo. (St. 106:32, 33) Hea karonnak lagon Jehovan taka Bhasailʼlea Desant vochonk diunk na. (Lok. 20:12) Apnnem ragacher tabo dovrunk naslo dekhun Moizes moro-porian dukhi zalo astolo.—D.S. 3:23-26.

Amkam kitem lisanv asa? Ami sotant kitlim-i vorsam asum, amkam bejar kortat tosleam lagim vo ami solʼlo ditat tanchea lagim opman kortat toslea toren kednanch ulounchem nhoi. (Ef. 4:32; Kol. 3:12) Ami zanttim zatat toxim amchem pasiens piddʼddear zaunk xokta hem khorem. Punn ami Moizesachem udharonn ugddas dovrunk zai. Ap-domaunni ho gunn ami dakhoina zalear, Jehova sangata amchi ixttagot piddʼddear zatoli. Punn toxem zalʼlem amkam naka. Tor ho gorjecho gunn utpon korunk ami kitem korunk zata?

AP-DOMAUNNI HO GUNN AMI KOSO UTPON KORUNK ZATA?

Povitr xokti di mhunn magat. Kiteak? Ap-domaunni ho gunn Devachea povitr xoktechea follacho ek bhag zaun asa ani apnna lagim magtoleank Jehova apli xokti dita. (Lukas 11:13) Ami ap-domaunni dakhounk to aplea povitr xokte udexim amkam goroz ti xokti diunk xokta. (Filp. 4:13 Povitr Pustok - Novo Korar) Povitr xoktechea follache her gunn utpon korunk pasun to amkam modot korunk xokta, zoso mog. Ani mog amkam ap-domaunni dakhounk modot korta.—1 Kor. 13:5.

Kitem-i tumkam ap-domaunni dakhounk addaita zalear, tachea thaun pois ravat. Udharonnak, chukichi vagnnuk dakhoitat tosle Internet website thaun ani monoronjona thaun pois ravat. (Ef. 5:3, 4) Khorem mhunnttlear, vaitt korunk amkam tallnnent ghaltat tosleo vostu ami pois korunk zai. (Mho. 22:3; 1 Kor. 6:12) Udharonnak, ek munis loingik pozoddponnachea tallnnent poddonk xokta zalear tannem ghoddie mogachea kanneamnchim pustokam vo pichʼcheram pollounchem sarkem bond korunk xokta.

Amkam ho solʼlo apunnaunk ghoddie kotthin disot. Punn ami proitn korit zalear, Jehova amkam svotacher tabo dovrunk xokti ditolo. (2 Ped. 1:5-8) Amchim chintnam, ulovop ani korneo tabeant dovrunk to amkam modot kortolo. Hem amkam Paul ani Marco-chea udharonnantlean kollon ieta, zanchea vixim ami hea lekhant poilim uloilolim. Te dogui aplo rag tabeant dovrunk xikle. Teach toren, anik eka bhavachem udharonn polloiat. To gaddi choloitana, ekdom ragar zatalo ani dusream koddem zhogddim pasun kortalo. Tannem kitem kelem? To mhunntta: “Hanvem sodanch kallzant thaun Deva lagim magnnem kelem. Hanvem ap-domaunne vixim aslole lekh vachle ani ho gunn dakhounk boreak poddttat toslim Bible-antlim versam hanvem tonddpatt kelim. Hem hanv zaitim vorsam thaun korit asa. Tori astana, xant ravonk zai mhunn dor sokallim hanv mhojea ugddasak haddtta. Magir goddbodd zaina zaunk hanv sodanch kamak begin bhair sortam.”

AP-DOMAUNNI DAKHOUNK AMI CHUKTAT ZALEAR KITEM KORCHEM

Thodde pavtti ami ap-domaunni dakhoili na zalear, Jehova lagim ulounk amkam loz disot. Khorem mhunnttlear, hea vellar amkam Jehova lagim chodd magnnem korchi goroz asa. Tor rokddench Jehova lagim magnnem korat. Tache kodden bhogsonnem magat. Tachi modot gheiat, ani kelʼli chuk porot korchimnant mhunn nichov korat. (St. 51:9-11) Apnnem kelʼlem magnnem Jehova aikuncho na mhunn chintinakat. (St. 102:17) Devachea Putache, rogot “sogllea patkantlim amkam xuddh-nirmoll korta” mhunn apostl Juanv amchea ugddasak haddtta. (1 Juanv 1:7; 2:1; St. 86:5) Ami eka-mekak bhogxit ravonk zai mhunn Jehovanuch amkam sanglam tem ugddas dovrat. Toxem zalear, to-ui amkam bhogxitolo mhunn ami khatri dovrunk zata.—Mt. 18:21, 22; Kol. 3:13.

Oronnʼnneant Moizesan aplea ragacher tabo dovrunk na dekhun Jehova dukhi zalo. Punn Jehovan taka bhogxilo. Ani Moizesak ghott bhavarth aslo mhunn Bible sangta. (D.S. 34:10; Heb. 11:24-28) Jehovan Moizesak Bhasailʼlea Desant vochonk diunk na tem khorem. Punn Sobit Bag zatolea prithumer sasnank jieunk to taka ditolo. Ami pasun ap-domaunni, ho gorjecho gunn utpon korunk proitn korit ravlim zalear, amkam pasun hea prithumer sasnank jieunk mellttolem.—1 Kor. 9:25.