Magnnem Koxem Korchem?
Jehova ‘prathon aikopi’ Dev. (Stotr 65:2) Ami khoincheai zagear thaun ani kednam-i taka magnnem korunk zata. Ami monantlea-monant magnnem kelear pasun to aikota. Ami soglim tachim bhurgim zaun asat. Tea pasot, to amcho ‘Bapui,’ mhunn somzon ami soglem sanglolem taka zai. (Matev 6:9) Tor ami koxem magnnem korunk zai tem Bible-ant sanglam.
JEHOVA DEVA LAGIM JEZUCHEA NANVAN MAGNNEM KORAT
“Tumi Bapa lagim kitem-i maglem zalear to tumkam mhojea nanvan tem ditolo.”—Juanv 16:23.
Him utram Jezun mhunnttlolim. Hantuntlean, ami fokot Jehova Deva lagim magnnim korunk zai mhunn kollon ieta. Toxench, khoincheo-i murteo, imajeo, sant, devdut vo purvozanchea nanvan nhoi, punn fokot Jezu Kristachea nanvan magnnem korunk zai mhunn amkam kollon ieta. Hacho orth, Jehova Deva lagim magnnem kortana ami hem magnnem Jezuchea nanvan kortat oxem mhunnonk zai. Karonn Jezun mhunnttlem: “Konnuch mhojea vorvim ailea xivai Bapa lagim pavona.” (Juanv 14:6) Jehova Deva lagim Jezuchea nanvan magnnem korun, Jezun amchea pasot jem kelam, tea pasot ami tache khub upkari asat mhunn dakhoun ditat.
KALLZANTLEAN ULOIAT
“Soglle tujea kallzache huske” taka sang.—Stotr 62:8.
Ek bhurgo aplea bapai lagim uloita tea toren tumi Jehova Deva lagim uloiat. Khoincheach pustokantlem vachun vo tondd-patt korun magnnem korinakat. Tachea bodlek, tumchea kallzant asa tem soglem taka ukteponnim sangat.
DEVACHE KHUXE PORMONNEM MAGAT
“Devache khuxe pormonnem, ami kitem-i maglear to amchem aikota.”—1 Juanv 5:14.
Devan amchim magnnim aikolʼlim amkam zai zalear, ami ‘tachea khuxe pormonnem’ magnnem korunk zai. Tachi khuxi kitem, tem ami koxim zannam zatolim? Taka kitem avoddtta ani kitem avoddnna tem amkam Bible-antlean kollon ieta. Ani tea pormonnem ami magnnem kortat zalear to amchem aikotoloch.
AMI KITEA PASOT MAGNNEM KORUNK ZAI?
Amchea Gorzam Pasot. Ami Deva lagim gorjechea vostum pasot magnnem korunk zata. Zoxem, jevonn, kopdde ani ravonk zago. Ami sarke nirnnoi gheunk zannvai, ani oddchonneancho fuddo korunk dhir di mhunn magonk zata. Toxench, tacher amcho bhavarth vaddounk, amcheo chuki bhogsunk ani koslem-i kam bore toren korunk modot kor mhunn magonk zata.—Lukas 11:3, 4, 13; Jakob 1:5, 17.
Dusream Pasot. Eke familint soglim bhurgim mogan ravtat tednam, tanchim avoi-bapui khuxal zatat. Toxench, ami soglim Jehova Devachim bhurgim zaun asat, dekhun ami eka-mekachi kallji ghetloli taka zai. Bible-ant boroilam: “Eka-meka pasot magnnem korit ravat.” Dekhun ami amcho kazari sangati, bhurgim, soirim ani ixttam pasot magnnem korunk zata.—Jakob 5:16.
Upkar Attounk. Bible sangta ki, ‘Dev amchea pasot borem tem korta . . . mollbar thaun paus ani follam zatat tosle dis dita, pottbhor khaunk dita ani amchem kalliz khuxal korit ravta.’ (Itihas 14:17) Khorench, Dev amchea pasot zaitem korta. Hea vixim ami kholaien xiktat tednam tannem dilʼlea soglea borea vostum pasot ami magnneant tache upkar attounk pavtolim. Toxench, tache upkar attounk anik ek vatt mhunnttlear, tachi adnea pallop.—Koloskarank 3:15.
MAGNNEM KORIT RAVAT
Ami Deva lagim khorea monan magnnem kelam astolem. Punn amkam amchea magnneacho zobab rokddoch mellonk na. Tea pasot ghoddie ami niraxi zaun chintit, Devak mhojem kainch poddlolem na kai? Toxem na. Hea masikachea survatek, ami zanchea vixim polloilʼlem tanchea udharonnacher dhean dium-ia. Tanchea thaun amkam xikonk melltta ki amchea magnneacho zobab rokddoch mellona tednam pasun ami magnnem korit ravonk zai.
Steve mhunntta: “Hanv Deva lagim magnnem korit ravonaslom zalear hanv mhojea jivitant porot kednanch khuxal zaunk xokchonaslo.” To Bible vachunk laglo ani Deva lagim kiteak magnnem korit ravonk zai tem to zannam zalo. To oxem-i mhunntta: “Mhojea ixttamnim kotthin vellar mhaka khub modot keli. Oslea ixttam pasot hanv Devacho khub upkari.”
Jenny-k distalem ki apunn Deva lagim ulounk purtem na. Tem mhunntta: “Hanv niraxi zalem tednam mhaka koxem dista tem soglem hanvem Devak sanglem. Oxem korun, mhojem monak xanti mellʼlli. Mhojea chukink lagon hanv kainch valorachem na oxem mhaka dista, punn Dev mhojea vixim oxem chintina. Zaite pavtti amkam amchea magnneacho rokddoch zobab mellona, punn ami magnnem korit ravonk zai. Magnnem korun mhaka mhojea jivitant dhir mellʼllo. Hanv Jehova Devak mhozo Bapui ani Ixtt mhunn manunk pavlem. Toxench, tannem amkam bhas dilea ki, ami tachi adnea pallit ravlim zalear to amkam kednanch ekttim sanddchona.”
Aplo put opong asonui to khub khuxal asa tem polloun Devan aplem magnnem aikolam oxem Isabel-ak dista.
Isabel nanvachi ek bail avoi zaunchi asli tednam, tika dotoramnim ticho bhurgo opong zolmotolo mhunn sanglem. Hem aikon tika dhoko boslo. Ani thoddea lokamnim tika abortion kor mhunn sanglem. Ti mhunntta, “Hanvem kitem korchem tem mhaka kainch somzonaslem. Hanvem dis-rat Deva lagim mhaka modot kor mhunn magnnem kelem.” Thoddea tempa uprant tinnem eka putak zolm dilo ani tachem nanv Gerard dovorlem. Ticho put opong zolmolo tori astana Devan aplem magnnem aikolem mhunn Isabel-ak dista. Tem koxem? Ti mhunntta: “Aiz mhozo put 14 vorsancho zala ani opong asonui to khub khuxal asa. Jehovan mhaka put diun tannem mhojer ek vhodd upkar kela. Tannem mhojem aikolem mhunn hanv tache khub upkari.”
Deva vixim Bible-ant boroilam tem kitlem khorem zaun asa: “Sorvespora, [Jehova] goribanchem magnnem Tujea kanant poddtach, tanchea kallzank Tum dhir ditai, tankam Tum kan ditai.” (Stotr 10:17) Dev tumchim magnnim ani vinovnneo aikotoloch mhunn khatri dovrat!
Jezun kelʼlim zaitim magnnim Bible-ant vachunk mellttat. Tantuntlem ek magnnem tannem aplea xisank xikoilʼlem tem zaun asa ani tea vixim zaito lok zannam. Tor, tea magnnea thaun amkam kitem xikonk melltta tem polloum-ia.