Jehovan ‘Mhojeo Vatto Nitt Keleo’

MHOJEA AVOI-BAPAIN MHAKA NITT VATTEN CHOLONK MODOT KELI

Mhojim avoi-bapui ankvar astananch, mhunnchem 1920 hea vorsa uprant tankam sot mellʼllem. Magir 1939-ant hanv zolmolo. England-ant hanv lhan astananch mhojea avoi-bapai sangata hanv mittingek voitalo ani porgottnnent bhag ghetalo. Mhaka aiz pasun to dis ugddas asa jednam hanvem mhojem poilem bhaxonn dilʼlem. Hanv sov vorsancho aslo ani hanv bhaxonn diunchea stand-a kodde ravonk pavonaslo dekhun eka boksacher ubo ravon hanvem tem bhaxonn dilem. Mittingent soglim vhoddlim aslolean mhaka khub bhirant disli.

Hanv att vorsancho aslo tednam poilech pavtt hanvem porgottnnent bhag ghetlo. Hanv porgottnnent ekloch aslo, ani mhojea bapain mhaka eka karddacher sompea utramnim sondex type korun dilʼlo. Poileach ghora eka aiknnarean hanvem dilʼlem kardd vachun “Let God Be True”! hem pustok ghetlem. Hanv khub khuxal zalo ani dhavon vochon mhojea bapaik sanglem. Porgottnnent ani mittingent mhaka mellʼllolea khuxalkaiek lagon Jehovachi seva purnn vell korunk mhaka urba mellʼlli.

Mhojea bapain mhojea pasot The Watchtower hem masik gheunk suru kelem. Ani tea udexim Bible-achea sotancher mhozo mog anik vaddlo. Tim masikam ietalim tednanch hanv vachunk lagtalo. Tanchea udexim Jehovacher aslolo mhozo visvas ghott zalo ani hanv somorponn korunk pavlo.

1950-ant New York-ant zalʼlea Theocracy’s Increase Assembly-k mhojea familik amontronn mellʼllem. Tea zomatichea Brestara disa mhunnchem Agost 3 tarkecho disacho vixoi “Mixinori Dis” zaun aslo. Tea disa bautizmachem bhaxonn bhav Carey Barber-an dilem. Uprant, tannem Sonchalon Monddollacho vangddi mhunn seva keli. Bhaxonnachea xevottak bhavan bautizm gheunk toiar asloleank don prosn vicharle. Ubo ravon hanvem, “Hoi” mhunn zobab dilo. Hanv fokot 11 vorsancho aslo, tori astana hem ek mhotvachem pavl mhunn hanv somzolo. Punn mhaka udkant vochonk bhirant distali, karonn mhaka tednam penvonk ienaslem. Punn mhojea bapaichea bhavan mhaka udkaxim vhelo ani kainch bhieupachi goroz na mhunn mhaka khatri dili. Soglem itlem begin zalem ki mhoje paim pasun udkant zomnik tenkonk na. Eka bhavan mhaka bautizm dilo ani dusrea bhavan mhaka udkantlean bhair kaddlo. Tea mhotvachea disa thaun Jehova mhojeo vatto nitt korit asa.

JEHOVACHER VISVAS DOVRUNK HANVEM PAVL GHETLEM

Mhojem iskolachem xikop zalea uprant mhaka pioneer seva korunk zai asli. Punn mhojea xikxokamnim mhaka chodd xikonk urba dili. Tanchea dobhava khala ieun hanv University-nt gelo. Punn, xikxonnacher dhean ditana sotant ghott ravonk mhojean zaunchem na mhunn mhaka rokddench kollon ailem. Taka lagon hanvem xikop soddcho nirnnoi ghetlo. Hea vixim hanvem Jehova lagim magnnem kelem ani poilea vorsachea xevottak hanvem xikop soddtta mhunn University-k chitt boroili. Jehovacher purnn visvas dovrun hanvem rokddich pioneer seva suru keli.

Wellingborough-nt Julay 1957-ant hanvem purnn vellachi seva suru keli. Mhaka eka onnbhovi pioneer bhava sangata seva korunk zai mhunn hanvem London Bethel-antlea bhavank sanglem. Bhav Bert Vaisey sangata hanv pioneer seva korunk laglo. To ek urbebhorit porgottnnar aslo. Tannem mhaka zaiteo boreo vostu xikoileo. Zoxem, tannem mhaka bori manddavoll korun porgottnnechi seva korunk xikoili. Amchea sobhent hanv, Bhav Vaisey ani sov zantteo bhoinno asleo. Mittinge pasot toiar korun tantunt bhag ghetlolean Jehovacher mhozo visvas vaddlo ani mhojea patienni vixim dusreank sangonk mhaka modot zali.

Military sevent bhag gheunk na mhunn thoddo vell mhaka bondkhonnint sarcho poddlo. Uprant, 1959-ant Barbara nanvachea eka khas pioneer bhoinni sangata hanv kazar zalo. Ami khoinsorui vochon seva korunk toiar asli. Amkam poilim England-achea utʼtor poschimant aslolea Lancashire-ant seva korunk dhaddlim. Uprant, Janer 1961-ant London Bethel-ant Kingdom Ministry School hea ek mhoineachea korsak hajir zaunk mhaka amontronn mellʼllem. Ojapachem mhunnttlear, korsa uprant mhaka bhonvddi korchem kam korunk dhaddlo. Don sumanak mhaka Birmingham hea xarant eka onnbhovi sorkittachi dekrekh korpea thaun proxikxonn mellʼllem. Ani Barbara-k pasun mhojea sangata ieunk mellʼllem. Uprant, amkam Lancashire ani Cheshire hea rajeant seva korunk dhaddlim.

JEHOVACHER VISVAS DOVORLOLEAN SODANCH BOREAK PODDTTA

1962-achea Agost mhoineant ami suttier aslim tednam amkam xakhe thaun ek chitt mellʼlli. Tantunt, Gilead Korsak lagon amkam apounnem aslem! Ami hea vixim magnnem kelea uprant amchim foma bhorun rokddinch xakha ofisak dhaddlim. Panch mhoineam uprant, ami Brooklyn, New York-ant gelim, ani thoim ami 38-avea Gilead korsak hajir zalim. Ho tea vellar, dha mhoineancho Bible kors zaun aslo.

Gilead korsant ami fokot Devachem Utor ani tachea songottnne vixinch nhoi, punn sonvsarbhor amchim bhav-bhoinnam Jehovachi seva koxi kortat tem pasun ami zannam zalim. Hanv 24 vorsancho ani Barbara 23 vorsanchem aslem. Tor, korsantlea her videartheam thaun amkam bhorpur xikonk mellʼllem. Sumanachea don disa, mhaka Bhav Fred Rusk-a sangata Bethel-achem kam korunk sondhi mellttali. To amcho ek xikoupi aslo. To sodanch ho mhotvacho vixoi sangtalo: Amcho solʼlo sodanch Devachea Utracher adarit asonk zai. Korsachea vellar amkam zaitea onnbhovi bhavam thaun bhaxonnam aikonk mellʼllim. Zoxem Bhav Nathan Knorr, Frederick Franz, ani Karl Klein-amnim bhaxonnam dilim. Bhav A. H. Macmillan-an dilʼlea eka bhaxonnam thaun, 1914 tem 1919-a modem aslolea kotthin vellar Jehovan aplea lokank koxi modot keli, tem amkam kollon ailem. Khaltikaie vixim pasun ami hea bhava thaun zaitem xiklim!

SEVENT BODOL

Korsachea xevottak, mhaka ani Barbara-k Afrikechea Burundi desant dhaddleant mhunn Bhav Knorr-an sanglem. Afrike vixim amkam thoddich mahiti asli. Ami rokddinch Bethel-achea Library-int vochon, Burundi desant kitlim porgottnnaram asat kai mhunn Yearbook-ant sodhunk laglim. Ojapachem mhunnttlear, tea vixim tantunt kainch diunk naslolem. Hacho orth, poilim kainch porgottnni zaunk na toslea desant amkam dhaddlolem. Amkam khub usko zalo. Punn ami magnnem kelea uprant amchim monam xant zalim.

Burundi desant sogIem vegllem aslem. Zoxem, thoinchem vatavoronn, thoinchi soskruti ani thoinchi bhaxa. Atam amkam French bhaxa xikchi poddli. Amkam thoim ravonk ghor pasun sodchem poddlem. Ami thoim pavon don disa uprant, amchea sangata Gilead korsant aslolo Bhav Harry Arnott amkam mellonk ailo. Taka Zambia desant seva korunk dhaddlolo. Thoim voitana, tannem amkam bhett dili. Tannem amkam ek flat sodun dilem jem amchem poilem mixinori ghor zalem. Rokddoch amkam thoinchea odhikaream koddlean virodh ailo. Tankam Jehovachea Sakxeam vixim kainch khobor nasli. Amchea sevent amkam khuxalkai mellonk lagli. Punn tednanch, tea desant kam korunk ekleak porvangi na zalear ravonk mellchem na mhunn sorkari odhikareamnim amkam sanglem. Dukhachem mhunnttlear, amkam to des soddcho poddlo. Ani amkam Uganda-ant vochonk poddlem.

Visa nastana Uganda desant vochonk amkam bhirant distali. Tori punn Jehovacher visvas dorvrun ami thoim gelim. Tea desant, chodd porgottnnaranchi goroz asa tea zagear, ek Canada-cho bhav seva kortalo. Tannem amchi poristhiti thoinchea eka sorkari odhikareak somzaili. Tea odhikarean, amkam amchi visa ie-sor thoddea mhoinea poriant desant ravonk porvangi dili. Hea ghoddnnentlean Jehova Dev modot korta mhunn amkam khatri mellʼlli.

Burundi poros hanga seva korop vegllem aslem. Hea desant porgottnnechem kam suru zalʼlem, punn thoim fokot 28 sakxim aslim. Hea vattarant choddxe lok Inglez bhas uloitale. Punn Bible xiktoleank vaddavoll korunk ami modot kortolim zalear, tanchea zaitea bhasam modem ek tori bhas amkam xikchi poddttoli mhunn amkam rokddench kollon ailem. Ami Kampala vattarant porgottnni korunk suru keli, zoim chodd korun lok Luganda bhas uloitale. Tor ami hi bhas xikonk tharailem. Hi bhas borea toren ulounk amkam zaitim vorsam laglim. Punn oxem kelolean ami porgottnnechem kam anik borea toren korunk pavlim! Ami amchea Bible videartheank anik borem toren somzonk pavlim. Ani ami tanchim kitli kallji kortat tem polloun amchea thaun xikchea vixim tankam koxem dista tem tim ukteponnim amkam sangtalim.

VEG-VEGLLEO BHONVDDEO

Hea desant lokank Bible-antlem sot xikoitana amkam khub khuxalkai mellttali. Punn amkam bhonvddi korchem kam korunk dhaddlem tednam amchi khuxalkai anik vaddli. Kenya-chea xakha ofisan amkam ek bhonvddi korunk sangli. Hea bhonvddent amkam osle zage sodhun kaddunk zai asle, zoim khas pioneer-anchi ekdom chodd goroz asli. Bhonvdde vellar, Jehovachea Sakxeank poilim kednanch mellonk na toslea lokamnim amcho ekdom boro poramos kelo. Tannim amkam ieukar dilo ani jevonn pasun randun dilem.

Tea uprant mhaka anik ek torechi bhonvddi korunk mellʼlli. Hanv don dis train-in provas korun, Kampala thaun Mombasa gelo ani thoim thaun boat-int Indian Ocean-ant aslolea Seychelles nanvachea zunvear gelo. Magir, 1965 tem 1972-ant, hanv Seychelles-ak bhett ditana Barbara mhojea sangata ietalem. Eka vellar, jea zagear fokot don porgottnnar asle, thoim uprant ek zomo zalo ani atam thoim ek vhodd sobha zalea. Hanvem kelolea her bhonvddent mhaka Eritrea, Ethiopia, ani Sudan-antlea bhavank bhett diunchi sondhi mellʼlli.

Eka military zomean, Uganda-chea sorkarak aplea tabeant ghetlem tednam poristhiti bodolʼli. Tea vellar, “Somrazachem tem Somrazak diat” hi suchounni pallop kitlem gorjechem tem hanv somzolo. (Marku 12:17) Ek pavtti sorkaran desantlea soglea videxeank aplea ghorachea laginchea pulis station-ant vochon nanvam borounk sanglim. Ami rokddench toxem kelem. Thoddea disa uprant, ami Kampala-nt gaddient voitale tednam gupit pulisamnim mhaka ani anik eka mixinorik addailo. Ami samke bhiele. Ami bhedi mhunn amcher arop ghalun tannim amkam mukhel pulis station-ant vhele. Tednam ami mixinori ani amchim nanvam pulis station-ant boroileant mhunn ami tankam sanglem. Punn tannim amchem aikunuch gheunk na. Tor khatri korunk lagon tannim amkam dhorun amchea mixinori ghora lagim aslolea pulis station-ant vhele. Ami poilim amchim nanvam boroilim tednam zo pulis aslo, toch station-ar asa tem polloun amkam borem dislem. To amkam vollkholo ani amkam soddunk sanglem.

Tea disamnim provas kortana, military addaitale tednam amkam usko zatalo. Punn te pielʼle astana amkam chodduch usko zatalo ani toslea dor eka poristhitint ami magnnem kortalim. Ani te amkam soddttale tednam amkam monachi xanti mellttali. Dukhachem mhunnttlear, 1973-ant soglea videxi mixinoreank Uganda soddun vochonk sanglem.

Portun amkam anik eka zagear seva korunk dhaddlim. Hea pavtti Poschim Afrikentlea Côte d’Ivoire-int amkam dhaddlim. Ho ek vhodd bodol aslo. Amkam novi soskruti xikchi asli. Thoim amkam soglo vell French bhaxa ulounchi poddli ani veg-vegllea zagea voilea mixinori sangata amkam ranvchem aslem. Tori astana, Jehova amkam margdorxon dita mhunn ami polloilem. Karonn khaltea ani promannik monachea lokamnim bore khobrek kan dilo. Toxench, Jehovacher visvas dovorlolean to amcheo vatto nitt korta mhunn ami polloilem.

Uprant, okosmat Barbarak cancer asa mhunn kollon ailem. Tichea vokhdak lagon ami zaite pavtti Europe-ant gelim. Ani 1983-ant amchean Afrikent seva korunk zaunchi na mhunn kollon ailem. Amkam dogank-ui khub dukh zalem!

AMCHI PORISTHITI BODOLʼLI

Ami London Bethel-ant astana, Barbara-cho cancer vaddot gelo ani ti uprant bhair poddli. Punn Bethel-antlea bhav-bhoinnamnim mhaka khub adar dilo. Thoim aslolea eka zoddpean, ho bodol manun gheunk ani Jehovacher mhozo visvas ghott dovrunk mhaka khub modot keli. Uprant Bethel-ant commuter mhunn seva kortolea eka bhoinnichi mhaka vollokh zali. Ann nanvachi hi bhoinn, hachea poilim khas pioneer mhunn seva kortali. Tika Jehovacher aslolo mog mhaka dison ailo. Ani 1989-ant hanv tichea sangata kazar zalo. Tednam thaun ami London Bethel-ant seva kortat.

1995 tem 2018-ant, mhaka mukhel ofisacho prothinidi (poilim zone overseer mhunnttale) mhunn seva korcho sueog mellʼllo. Hanvem sumar 60 veg-vegllea desank bhett dili. Kosli-i poristhiti ieum Jehova aplea lokanchi koxi kallji gheta, tem mhaka hea dor eka bhette thaun kollon ailem.

2017-ant mhaka Afrikent bhett diunk ek sondhi mellʼlli. Poile pavtti Ann-ak Burundi vhoronk hanv khub khuxal zalo. Ani thoim kitlea lokamnim sot apnnailam tem polloun ami ojap zalim! 1964-ant hanvem jea rostear poile pavtti porgottnni kelʼli, teach zagear aiz ek Bethel asa, ani hea desant atam 15,500 poros chodd porgottnnaram asat.

2018-ant hanvem khoinchea desamnim bhett diunk zai mhunn mhaka kollʼllem tednam hanv khuxal zalo. Karonn hanvem bhett diunk zai aslolea desam modem ek des Côte d’Ivoire aslo. Tea desachi rajdhani Abidjan-ant ami pavlim tednam hanv ghora pavlo oxem mhaka dislem. Thoinchea Bethel-ant ami aslim tednam amchea boglechea kuddant konn asa mhunn zannam zaunk hanvem telephone-achi list polloili. Tea list-ant hanv volkhotalo tea eka bhavachem nanv mhaka dislem. Ho bhav Sossou hanv Abidjan-ant astana sorkittachi dekhrekh korpi zaun seva kortalo. Punn ho to bhav naslo, punn teach nanvacho tacho put Sossou aslo.

Jehovan aplem utor sodanch samballʼllam. Zaitea somosiancho fuddo kortana, hanvem Jehovacher visvas dovorlolean tannem mhojeo vatto nitt keleat tem hanvem polloilam. Uzvaddot voita tea vatten amkam cholot ravonk zai. Karonn hi vatt pavoita tea novea sonvsarachi ami vatt polloitat.—Mho. 4:18.