Soglem Eka Hanstea Mukhamollak Lagon Zaunk Pavlem!

Hanstea mukhamollan Helen prokaxonachea kartta lagim ubi asa. Don cheddvam kartt polloun fuddem cholon voitat.

DON cheddvam Philippines-antlea Baguio Xarant cholon voitalim. Thoim eka zagear dovorlolem amchem porgottnnechem kartt tannim polloilem. Tim tea kartta lagim ieunk na, punn tea kartta lagim ubi asloli bhoinn, Helen-achem hanstem mukhamoll tankam khub avoddlem.

Uprant, tim bosin boson ghora voitalim tednam, eka Raj-ghoracher jw.org hem vhodd okxoramnim boroilolem tem tannim polloilem. Ani hench tannim porgottnnechea karttacher polloilem mhunn tankam ugddas zalo. Tor tim dogam-i bosintlean denvlim ani Raj-ghoracher boroilolea mittingencho vell tannim boroun ghetlo.

Tinch cheddvam Helen-ak Raj-ghorant polloitat.

Tim dogam-i fuddlea eka mittingek hajir zalim. Ani tannim Raj-ghorant konnank polloilem tem tumi zannant? Helen-ak! Hanstem mukhamoll aslolea hea bhoinnik tim rokddinch vollkholim. Helen sangta, “Tim mhojea lagim ietat tem polloun mhaka matso husko zalo. Karonn tim mhojea lagim kiteak ietat kai mhunn hanv chintunk laglem.” Punn tannim uprant, Helen-ak kitem ghoddlolem tem sanglem.

Tea dogam-i cheddvank mitting ani bhav-bhoinnancho sangat khub avoddlo. Ani tim eka onvollkhi zagear asat oxem tankam disonkuch na. Mitting zalea uprant, soglim Raj-ghor nitoll kortat tem polloun tim-ui modot korunk fuddem sorlim. Tanchea modlem ek cheddum atam Philippines-ant ravona, punn dusrem cheddum soglea mittingek hajir zaunk laglem, ani tannem Bible obheas gheunk pasun suru kelo. Hem soglem eka hanstea mukhamollak lagon zaunk pavlem!