Amcho Fuddari Jezuk Tenko Dium-ia

1. Aiz kitem zalʼlem Jehovak zai?

AIZ Rajeachi bori khobor sogleank porgott zaloli Jehovak zai. (Marku 13:10; 1 Tim. 2:3, 4) Hem Jehovachem kam ani tem ekdom mhotvachem! Tea pasot, hea kamant fuddakar gheunk tannem aplea Putak Jezuk vinchun kaddla. Ani hem kam Jezu samballtta dekhun xevott ieunchea poilim Jehovak zai toxem, to hem kam sompoitolo mhunn ami khatri dovrunk zata.—Mt. 24:14.

2. Hea lekhant ami kitem polloitolim?

² Hea lekhant, Devachea Utrantlean amkam xikounn diunk Jezu “visvaxi ani xannea chakrak” koso uzar korta, ani toxench akʼkhea prithumecher porgottnnechem kam korunk aplea sevokank koxem margdorxon dita tem ami polloitolim. (Mt. 24:45) Tea bhair, Jezu Kristak ani hea chakrak tenko diunk amchea modlea dor eklean kitem korunk zata tem-ui ami polloitolim.

JEZU PORGOTTNNECHEA KAMANT FUDDAKAR GHETA

3. Jezuk koslo odhikar dila?

³ Jezu porgottnnechea kamant fuddakar gheta mhunn amkam koslo puravo asa? Sorgar voiche poilim to aplea visvaxi sevokank Galileiachea dongrar mellʼllo tednam tannem oxem mhunnttlem: “Sorgar ani sonvsarar Devan Mhaka sogllo odhikar dila.” Ani tannem fuddem kitem mhunnttlem tantuntlean, Jezuk her kamam sangata, porgottnnechea kamant pasun fuddakar gheunk odhikar dila mhunn amkam puravo melltta. Tannem mhunnttlem: “Mhonnttoch vochun sogllea raxttrank Mhoje xis korat.”—Mt. 28:18, 19.

4. Jezu amchea disamnim pasun porgottnnechea kamant fuddakar gheta mhunn amkam koxem kollon ieta?

⁴ Tor porgottnnechem hem kam ‘soglea raxttramnim’ choltolem mhunn Jezun aplea xisank sanglem. Ani “kallam-iuganche sompadnne porian” to tanchea sangata astolo mhunn sangon Jezun aplea xisank khatri dili. (Mt. 28:20) Tor amchea disamnim pasun, porgottnnechea hea kamant Jezu fuddakar gheta mhunn amkam kollon ieta.

5. Stotr 110:3-ant dilʼli bhasaunni purnn korunk ami koxi modot korunk zata?

⁵ Xevottachea kallar porgottnnar unne astole mhunn Jezuk usko naslo. Karonn Stotrkaran boroilʼli hi bhasaunni purnn zatoli mhunn taka khatri asli. Thoim sanglam: “Jea disa tum apli soin zhuzak gheun voitolo, tea disa tuzo lok ap-khuxen tenko ditolo.” (St. 110:3, NW) Tor tumi porgottnnechea kamant bhag ghetat zalear, tumi Jezuk ani “visvaxi ani xannea chakrak” tenko ditat ani hi bhasaunni purnn korunk modot kortat mhunn dakhoun ditat. Porgottnnechem kam aiz zait asa tem khorem, punn tantunt zaiteo oddchonneo pasun asat.

6. Porgottnnarank fuddo korunk poddtta ti ek oddchonn khoinchi?

⁶ Porgottnnarank fuddo korunk poddtta ti ek oddchonn mhunnttlear, virodh. Dhorm-broxtt korpi, dhormik ani rajki fuddari amchea vixim lokank fotti sangtat. Ani heo fotti aikon amchim soirim, amkam vollkhotat tim ani amchea sangata kam kortat tim, Jehovachi seva ani porgottnnechem kam bond korunk amcher dobhav ghalunk puro. Toxench, thoddea desamnim porgottnnechea kamacho virodh kortat tim, amchea bhav-bhoinnank dhomki ditat, tancher akromonn kortat, tankam dhorun vhortat ani tankam bondkhonnint pasun ghaltat. Punn hem soglem ghoddtta tem polloun ami ojap zainant. Karonn Jezun adim fuddench sanglolem: “Mhojea nanva pasot sogllim raxttram tumkam zolltolim.” (Mt. 24:9) Tor aiz lok amcho dves kortat tem ami polloitat tednam Jehovachi maniotai amcher asa mhunn amkam puravo melltta. (Mt. 5:11, 12) Tea bhair, hea soglea virodha fattlean Soitanacho hat asa mhunn ami zannant. Punn Soitana poros Jezuk chodd xokti asa mhunn ami ugddas dovrunk zai. Ani Jezuchea modotin soglea raxttrantlea lokank bori khobor pavtolich! Hem aiz ghoddtta mhunn ami kiteak mhunnonk zata tem ami polloum-ia.

7. Prokasovnni 14:6, 7-antlim utram aiz ghoddon ietat mhunn amkam koxem kollon ieta?

⁷ Porgottnnechem kam kortana anik ek oddchonn mhunnttlear, aiz amkam veg-veglleo bhaso ulovpi lok melltta. Punn Jezun apostl Juanvak dilolea prokasovnnint soglea bhasanchea lokank bori khobor pavtoli mhunn tannem sanglolem. (Prokasovnni 14:6, 7 vachat.) Hem aiz koxem ghoddtta? Aiz sonvsarbhor aslolea lokank jw.org website-icher asloli mahiti 1,000-a poros chodd bhasamnim vachunk melltta! Toxench, Bible obheas korunk amchem mukhel sadhon, tem mhunnttlear, Sasnak Khuxalkaien Jieiat! hem prokaxon, Sonchalon Monddollan, 700 poros chodd bhasamnim bhaxantor korunk maniotai dilea. Itlench nhoi, aikonk iena tea lokank Devachea Utrantlean xikonk amche songottnnen zaite video toiar keleat. Tea bhair, dixtti poddona tanchea pasot Braille bhaxent zaitim prokaxonam toiar keleant. Tor khorench, Bible-antleo bhasaunneo purnn zatat tem amkam dison ieta. Karonn, aiz “sogllea bhasanchea raxttrantle” lok “xudʼdh bhas,” tem mhunnttlear, Bible-antlem sot xiktat. (Zek. 8:23; Zef. 3:9, NW) Tor ami zata titlea lokank bori khobor kollounk proitn kortat. Ani hem soglem, Jezu Krist porgottnnechea kamant bore toren fuddakar gheta dekhunuch zaunk pavta.

8. Porgottnnechea kama udexim aiz kitem zaunk pavlam?

⁸ Aiz 240 desantle, 80,00,000 poros chodd lok Jehovachea songottnneche bhag zaun asat ani dor vorsa 1,00,000-a poros chodd lok bautizm gheta. Punn hache poros chodd mhotvachem mhunnttlear, aiz lokamnim aplea sobhavant bodol kela. Zoxem, tannim pozoddponn, hinsa, bhedbhav ani des-bhoktechim bhavnam soddun dileant. Hea toren tannim Kristi gunn vaddoileat ani “novea monxacho” akar ghetla. (Kol. 3:8-10) Oxem kelolean, Izaias 2:4-antli bhasaunni purnn zata tem amkam dison ieta, zoim mhunnttlam: “Hea fuddem konnuch zhuzachi toiari korcho na.” Tor ami novo sobhav apnnaunk vavr kortat tednam, amchi vagnnuk polloun Jehova Deva vixim xikonk lokanchi umed vaddtta, toxench ami amcho fuddari Jezuchi dekh ghetat mhunn dakhoun ditat. (Juanv 13:35; 1 Ped. 2:12) Tor hem soglem bexttench zaunk pavona, punn Jezuchea modotin zaunk pavta.

JEZUN EK CHAKOR NEMLA

9. Matev 24:45-47-a pormonnem, nimannea disam vixim Jezun kitem sanglolem?

⁹ Matev 24:45-47 vachat. Nimannea disamnim Devachea lokank xikounn diunk apunn ek “visvaxi ani xannea chakrak” uzar kortolo mhunn Jezun sanglolem. Ani aiz Jezu oxench korta tem amkam dison ieta. To Devachea lokank, ani Devachem Utor xikonk umed dakhoitoleank ‘vogtar vo sarkea vellar jevonn diunk,’ makhloleanchea eka lhanxea zomeak uzar korta. He makhlole munis Somiachea sevent khub vavr kortat. Te zobordosten amcher odhikar cholounk sodhinant. (2 Kor. 1:24) Punn Jezu Krist amcho “fuddari ani odhipoti” mhunn te vollkhon ghetat.—Iz. 55:4.

10. Chitrant dakhoilʼlea khoinchea prokaxona thaun tuka sota vixim zannam zaunk modot zali?

¹⁰ 1919-a thaun, aikonk umed dakhoitoleank Bible-antlem sot zannam zaunk modot korunk xannea ani visvaxi chakran zaitim prokaxonam toiar keleant. Lokancheo gorzo monant dovrun tannim him prokaxonam toiar keleant. Oslem toiar kelʼlem poilem pustok mhunnttlear, The Harp of God, jem 1921-ant chhaplolem. Hea pustokantlean, xikonk umed asa tankam Bible-antlim mullavim sotam zannam zaunk modot zatali. Punn vell soron gelo toso, hea chakran anikui prokaxonam toiar kelim. Zoxem, “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Bible Khorench Kitem Xikoita?, What Can the Bible Teach Us?, ani Sasnak Khuxalkaien Jieiat! jem halinch toiar kelam. Tor amchea sorginchea Bapa vixim zannam zaunk ani tacho mog korunk, tumkam khoinchea prokaxona thaun modot zali?

11. Ami sogleamnim Jehova Deva vixim ani Bible-a vixim kholaiechi zannvai ghevop kiteak gorjechem?

¹¹ Punn fokot aikonk umed dakhoitat tanninch Jehova Deva vixim ani Bible-a vixim kholaiechi zannvai gheunchi goroz asa kai? Na. Ami sogleamnim oxem korunk zai. Karonn apostl Paulun sanglem: “Vaddlolim monxam nibor jevonn jevtat.” Ani ami xiktat tem apnnaitat tednam, ami “borea ani vaitta modem ontor vollkhunk” pavtolim oxem Paulun sanglem. (Heb. 5:14) Tor aiz amchea disamnim noitik dorje ekdom khala poddleat tednam, Jehovachea dorjeam pormonnem cholonk amkam khub kotthin zaunk xokta. Punn Jezu, xannea ani visvaxi chakra udexim Devachea Utrantlean amkam xikoita ani hea vorvim Jehovachea dorjeam pormonnem jieunk amkam ghottai melltta.

12. Jezu bhaxen, Jehovachea nanvak favo asa to man ami koso dila?

¹² Jezu bhaxen ami pasun Jehovachea nanvak favo to man ditat. (Juanv 17:6, 26) Udharonnak, 1931-ant Bible-acher adarit aslolem Jehovachim Sakxi, hem nanv ami apnnailem. Hea udexim, Devachem nanv amkam kitlem mhotvachem asa ani lokamnim amkam tea nanvan vollkholʼlem zai mhunn ami dakhoun dilem. (Iz. 43:10-12) Toxench, tea vorsachea Otumbr mhoinea thaun Jehovachem nanv Pahrogopur masikechea fuddlea panar chhapun ieunk laglem. Tea bhair, apunn Kristanv mhunnttat tea her dhormamnim tanchea Bible-a thaun Devachem nanv kaddun uddoilem. Punn ami New World Translation of the Holy Scriptures, hea Bible-ant jea-jea zagear Devachem nanv aslem, tea-tea zagear tem ghatlem.

JEZU APLEA PATTLAVDARANCHI MANDDAVOLL KORTA

13. Aplea pattlavdaranchi manddavoll korunk Jezu aiz “visvaxi ani xannea chakrak” uzar korta mhunn tumkam kiteak khatri asa? (Juanv 6:68)

¹³ Jezun aplea pattlavdaranchi manddavoll kelea. Aplea pattlavdaramnim Jehovachi khori bhokti korunk tannem ‘visvaxi ani xannea chakra’ udexim hea prithumer ek songotton ghoddoun haddlam. Tor, ‘hem songotton naslem zalear ami khoim mhunn astolim aslim?’ hea prosna vixim chintʼtat tednam amkam ghoddie apostl Pedruchim utram ugddas ieunk puro. Tannem Jezuk mhunnttlolem, “Saiba, konna-xim mhonn vetoleanv ami? Tujim utram Sasnnik Jivitachim!” (Juanv 6:68) Khorench, Jezu hea songottnne udexim amcho bhavarth ghott korunk amkam goroz tem soglem xikoita. Toxench, bore toren porgottnni korunk ani Jehovak manvota toslo “novo sobhav” apnnaunk to amkam modot korta.—Ef. 4:24, NW.

14. Jehovache songottnnecho bhag zalolean, COVID-19 pidde vellar mellʼllolea margdorxonak lagon tumkam koso faido zalo?

¹⁴ Tea bhair, hea songottnne udexim Jezu Krist amkam kotthin vellar pasun borem margdorxon dita. Udharonnak, COVID-19 pidde vellar, sonvsarantlea lokank kitem korchem tem kollonaslem. Punn amkam surokxit ravchea vixim songottnne thaun borem margdorxon mellʼllem. Zoxem, ghora bhair voitana mask ghalchea vixim, dusrea lokam thaun favo titlo ontor dovorchea vixim amkam suchounneo mellʼlleo. Toxench, vhoddilankui borem margdorxon mellʼllem. Bhav-bhoinnam surokxit asat kai, tanchi bholaiki bori asa kai, ani Jehova Deva sangata tanchi ixttagot ghott asa kai, hachi khatri korun gheunk tankam sanglem. (Iz. 32:1, 2) Tea bhair, Sonchalon Monddolla thaun novi mahiti video-ntlean amkam zaitem margdorxon ani urba mellʼlli.

15. Pidde vellar, mittingek hajir zaunche vixim ani porgottnni korche vixim amkam koslem margdorxon mellʼllem, ani hacho kitem porinnam zalo?

¹⁵ Toxench, hea pidde vellar mittingek koxem hajir zaunchem ani porgottnni koxi korchi, hea vixim amkam borem margdorxon mellʼllem. Ani hea pasot, video-conferencing sadhonam uzar korun ami rokddinch sobhechea mittingenk, sorkitt zomatink ani odhivexonank hajir zaunk laglim. Toxench, ami chitti boroun ani fon-a udexim porgottnni korunk laglim. Ani Jehovan amchea hea vavracher khub besanv ghatlem. Karonn zaitea xakhamnim porgottnnarancho ankddo vaddlo. Tea bhair, hea pidde vellar zaiteank porgottnnechea kamant bore onubhov pasun mellʼlle.—“Jehovan Amchea Porgottnnechea Kamacher Besanv Ghatlem,” hem boks polloiat.

16. Ami kosli khatri dovrunk zata?

¹⁶ Punn amchea modlea thoddea zannank, hea pidde vixim songotton amkam chodduch chotrai dovrunk laita oxem ghoddie dislem zait. Tori astana, amkam mellʼllolem margdorxon khorench xanneponnachem aslem mhunn amkam kollon ailem. (Mt. 11:19) Ani Jezu aplea pattlavdarank mogall toren margdorxon dita hea vixim ami niall kortat tednam, fuddarak kitem-i zaum, Jehova ani Jezu sodanch amchea sangata astole mhunn amkam khatri melltta.—Hebrevank 13:5, 6 vachat.

17. Jezu fuddakar gheta tea songottnnecho bhag aslolean tumkam koxem dista?

¹⁷ Tor Jezu fuddakar gheta tea songottnnecho ami bhag zaun asat mhunn ami kitlim khuxal asat nhoi! Karonn ami khoinchea-i sonskrutaiechim, desachim, vo bhaxechim aslear pasun, amche modem ekvott asa. Toxench, amkam Devachea Utrantlean zaiti xikounn melltta ani porgottnni koxi korchi tea vixim proxikxonn melltta. Tea bhair, novo sobhav apnnaunche vixim ani eka-mekacho mog korche vixim ami xiktat. Khorench, Jezu amcho fuddari mhunn amkam khub gorv bhogta!