Tornnatteamno—Bautizm Ghetlea Uprant Pasun Vaddavoll Korit Ravat

1. Aiz zaitim tornnattim kitem korunk pavleant?

DOR vorsak, hozaramnim tornnattim bautizm ghetat. Tumi pasun bautizm ghetla kai? Hoi zalear, tumchea sobhentlim bhav-bhoinnam ani Jehova Dev ekdom khuxal asat! (Mho. 27:11) Atam meren tumi kitem korunk pavleant tea vixim chintat. Tumi ghoddie zaitim vorsam porian kholaien Bible-acho obheas kela. Oxem kelolean, Bible Devachem Utor mhunn tumchi khatri vaddli. Ani ekdom mhotvachem mhunnttlear, tumi Jehova Deva vixim zannam zaunk pavlim. Toxench, tachea pasot tumcho mog itlo vaddlo ki tumi somorponn korun bautizm ghetlo. Khorench, oxem korun tumi ek ekdom boro nirnnoi ghetlo!

2. Hea lekhant ami kitem polloitolim?

² Bautizm gheunche poilim tumkam zaitea oddchonneancho fuddo korcho poddlo astolo. Ani Jehovak visvaxi ravonk tumkam khub kotthin zalem astolem. Punn atam tumi vaddot voitat toxim, tumkam anikui oddchonneancho fuddo korcho poddttolo. Karonn Soitan, Jehova pasot aslolo tumcho mog unno zaunk ani tumkam Jehova koddlean pois vhoronk proitn korit ravtolo. (Ef. 4:14) Punn oxem zaunk dium nakat! Tor Jehovak visvaxi ravonk ani tachi seva kortolim mhunn dilʼli bhas pallunk, tumkam koxi modot zaunk xokta? Tumi vaddavoll korun ‘fuddem sorotʼ ravonk zai. (Heb. 6:1) Hem tumi koxem korunk zata?

TUMI KOXI VADDAVOLL KORIT RAVONK ZATA?

3. Bautizm ghetlea uprant soglea Kristanvamnim kitem korunk zai?

³ Bautizm ghetlea uprant ami sogleamnim, apostl Paulun Efezant aslolea Kristanvank dilʼlo solʼlo apnnaunk zai. Tannem tankam “vaddlolim” Kristanvam zaunk urba dili. (Ef. 4:13) Hacho orth, tannim vaddavoll korit ravonk zai asli. Apostl Paulun, eka Kristanvache vaddavollik ek bhurgo koso vaddtta taka sor kelo. Ek bhurgo zolmak ieta tednam tachea avoi-bapaik khub gorv bhogta ani tim tacho khub mog kortat. Punn to bhurgo sodankal ek bhurgoch uronk xokona. Karonn vell voita toso, “bhurgeponnachem sogllem” tannem soddun diunk zai. (1 Kor. 13:11) Ami pasun oxench korunk zai. Bautizm ghetlea uprant ami vaddavoll korit ravonk zai. Tor hem korunk amkam koxi modot zaunk xokta tea vixim thoddeo vatto polloum-ia.

4. Vaddavoll korit ravonk amkam khoincho gunn modot korunk xokta? Somzaiat. (Filipkarank 1:9)

⁴ Jehova pasot tumcho mog vaddoit ravat. Tumi Jehovacho khub mog kortat tem khorem. Punn Jehova pasot aslolo tumcho mog tumi anik vaddounk zata. Hem tumi koxem korunk zata? Hea vixim Filipkarank 1:9-ant amkam kitem tori kollon ieta. (Vachat.) Thoim apostl Paulun, Filipint aslolea Kristanvancho mog “odik-odik vaddom” mhunn magnnem kelem. Tor amcho mog vaddonk, ami “sotachi odik unch vollokh ani odik khol onnbhov” gheunk zai. Oxem kelolean, ami Jehova vixim zannam zaunk pavtolim. Ani jitlim ami Jehova vixim zannam zaunk pavtat, titloch tache pasot amcho mog vaddtta. Tachea gunnancho ani to koso vagta tacho ami valor korunk pavtolim. Toxench, ami taka manvota tench korunk sodhtolim ani taka dukhoita toslem kainch korchimnant. Tea bhair, ami kitem kelʼlem Jehovak zai ani ami tem koxem korunk zata tem zannam zaunk, amchean zata tem soglem ami kortolim.

5-6. Ami Jehova pasot amcho mog koso vaddounk zata? Somzaiat.

⁵ Jehova vixim zannam zaunk ek ekdom bori vatt mhunnttlear, Jezu vixim zannam zavop. (Heb. 1:3) Karonn Jezun aplea Bapaiche gunn ekdom bore toren dakhoun dileat. Tor Jezu vixim zannam zaunk ami kitem korunk zata? Ek boreantli-bori vatt mhunnttlear, ami Matev tem Juanv him pustokam vachunk zatat. Tumi azun porian, dor disa Bible vachpachi sonvoim korunk na zalear tumi him char pustokam vachunk suru korunk zata. Oxem kortat tednam, khas korun Jezuk kosle gunn asle tacher dhean diat. Lokank, Jezu lagim ieunk ani tache lagim ulounk khub avoddttalem. Toxench, Jezu mogan lhan bhurgeank pasun aplea vengent ghetalo. (Marku 10:13-16) Itlench nhoi, Jezu khub doiall aslo. Hea pasot, tache xis pasun tache lagim ukteponnim uloitale. (Mt. 16:22) Jezu sarko aplea Bapa bhaxen zaun asa. Tor ami Jehova Deva lagim magnnem kortat tednam amchea kallzant kitem asa tem soglem ami taka sangonk xoktat. Ani to kednanch amchi nit korchona mhunn ami khatri dovrunk zata. Karonn to amcho mog korta ani amchi kallji gheta.—1 Ped. 5:7.

⁶ Toxench, Jezuk lokanchi doia-maia asli. Tache vixim apostl Matevan oxem boroilem: “Tannem lokanchi gordi polloili tednam, taka tanchem churchure dislem, karonn te gonvlli naslolea menddram bhaxen ghavo zalʼle ani adar naslole asle.” (Mt. 9:36) Ani Jehova vixim kitem? Jezun aplea Bapa vixim oxem sanglem: “Teach bhaxen, mhojea sorginchea Bapak hea lhanantlea ekleacho pasun nas zalʼlo naka.” (Mt. 18:14) Khorench, hea utrantlean Jehova amcho khub mog korta mhunn amkam kollon ieta! Ani hem zannam zalolean ami khub khuxal zatat. Tor Jezuk ami jitle bore toren zannam zatat, titloch Jehova pasot amcho mog anik vaddtta.

7. Sotant ghott aslolea bhav-bhoinnam sangata ixttagot kelear tumkam koxi modot zaunk xokta?

⁷ Sotant ghott aslolea bhav-bhoinnam sangata ami vell sartat, ani tankam vollkhon ghetat tednam ami anik chodd mogall zaunk pavtolim ani sotant vaddavoll korunk pavtolim. Udharonnak, tim Jehovachi seva korun kitlim khuxal asat tem tumkam dison ietolem. Tankam Jehovache sevent khub onubhov asa. Tor ami tankam tanchea thoddea onubhovam vixim vicharunk zata. Tednam, Jehovachi seva korop tanchea jivitantlo sogleam-von boro nirnnoi kiteak zaun asa tem ami zannam zatolim. Ani amkam ek mhotvacho nirnnoi gheuncho poddtta tednam ami tancho solʼlo magonk zata. Karonn “zaiteanchi budh ghetlear ies melltta” oxem Bible-ant sanglam.—Mho. 11:14, NW.

8. Bible-achi xikounn sarki asa kai na mhunn tumkam dubhav asa zalear tumi kitem korunk zata?

⁸ Tumkam aslole dubhav pois korat. Ami peregraf 2-ant polloilem toxem, ami vaddavoll korun Jehovacher amcho bhavarth ghott kelʼlo Soitanak naka. Oxem korunk to kitem korta? To uzar korta ti ek vatt mhunnttlear, Bible-antleo thoddeo xikounneo sarkeo asat kai na, mhunn to amchea monant dubhav ghalta. Udharonnak, Devan amkam rochunk nant, punn vikasvadak lagon vo soglem apxinch ailam mhunn thodde lok amkam sangonk puro. Lhan astana tumi hea vixim kednanch chintunk na astolem. Punn atam he xikounne vixim tumkam iskolant xikoitat astolim, ani tumcheo ttichereo sangtat tem ghoddie sarkem mhunn tumkam disonk puro. Tea vellar, tumi Mhonnʼnneo 18:17-nt sanglolem totv ugddas dovrunk zata: “Nitisobent poilo uloita tachem sot dista. Punn, virodhi uloitoch tachem polkeponn uktem zata.” Ghoddie tumchea tticherimnim pasun, ek Rochnnar asa mhunn purave sodhunk vell gheunk na astolo. Tor dolle dhampun tumkam iskolant xikoitat tem sot mhunn manun gheunchea bodlek, Devachea Utracher kholaien obheas korat ani Bible-acher adarit aslolea prokaxonamnim sodh korat. Toxench, vikasvadachi xikounn sarki asa mhunn adim patietalim tea bhav-bhoinnam sangata uloiat ani ek Rochnnar asa mhunn tankam koxi khatri zali tem vicharat. Oxem kelolean, khoreaninch ek Rochnnar asa mhunn tumi khatri korun gheunk pavtolim.

9. Melissa-chea onubhovantlean tumi kitem xiklim?

⁹ Hea vixim amkam Melissab nanvachea eke bhoinnicho onubhov asa. Tachea iskolant vikasvadachi xikounn xikoitalim. Punn, rochnna hea vixoi-acher sodh kelolean Melissa-k aple dubhav pois korunk modot zali. Melissa sangta: “Iskolant ttichereo vikasvadachi xikounn oxe toren xikoitat, ki tim sangtat tem khoreanich sot oxem dusreank dista. Haka lagon mhojea-i monant dubhav ailo. Punn poilim hanv sodh korunk fattim sorlem. Karonn hanvem sodh kelo zalear vikasvadachi xikounn sarki asa mhunn mhaka kollon ietolem, oxem mhaka dislem. Punn hanvem dolle dhampun bexttoch kiteacherui visvas dovorlolo Jehova Devak naka. Tachea bodlek, ami kitem patietat tache pasot amche lagim purave aslole taka zai. Tor hanvem sodh kelo. Hanvem Is There a Creator Who Cares About You? hem pustok, ani Was Life Created? toxench, The Origin of Life—Five Questions Worth Asking, heo pustika vachleo. Him prokaxonam vachlea uprant, hanvem tim poilim kiteak vachunk nant oxem mhaka dislem. Karonn mhozo dubhav pois zalo.”

10-11. Onoitik kamam korchi tallnni pois korunk tumkam koxi modot zaunk xokta? (1 Tesalonikekarank 4:3, 4)

¹⁰ Vaitt kamam ani vaitt chintop pois korat. Tornnattim vaddttat toxim, tanche loingik anvdde anik chodd vaddot voitat. Toxench thodde pavtti, onoitik kamam korunk dusrim tancher dobhav ghaltat. Ani tornnatteamnim oslinch vaitt kamam kelʼlim Soitanak zai. Tor heo tallnneo pois korunk tumkam koxi modot zatoli? (1 Tesalonikekarank 4:3, 4 vachat.) Tumi magnnem kortat tednam tumkam koxem bhogta tem Jehovak ukteponnim sangat ani tachi modot magat. (Mt. 6:13) Jehova tumkam modot korunk sodhta, tumkam khast lavunk sodhina mhunn ugddas dovrat. (St. 103:13, 14) Toxench, tumkam Devachea Utrantlean pasun modot mellonk xokta. Melissa, zache vixim ami poilim uloilʼlim, taka pasun onoitik chintnam pois korunk khub kotthin zalem. Tem mhunntta: “Dor disak Bible vachlolean vaitt anvdde pois korunk mhaka modot zali. Toxench hanv Jehovachem, ani mhaka Jehovachi seva korunk zai hem ugddas dovrunk mhaka modot zali.”—St. 119:9.

¹¹ Tumcheo oddchonneo svota zaun suttaveo korunk proitn korinakat. Tache bodlek, tea vixim tumchea avoi-bapai lagim uloiat. Oslea vixoi-ancher tanche lagim ulounk sompem na tem khorem. Punn oxem korop ekdom gorjechem. Melissa sangta: “Hanvem Jehova lagim mhaka dhir di mhunn magnnem kelem, ani mhoji oddchonn mhojea daddy-ik sangli. Tea uprant, mhaka ekdom borem dislem, ani Jehova pasun khuxal zalo mhunn hanv zannam.”

12. Tumi kitem kelear tumkam bore nirnnoi gheunk modot zaunk xokta?

¹² Tumchea jivitant Bible-achim totvam apnnaiat. Ami bhurgim astat tednam amchea pasot amchim avoi-bapui nirnnoi ghetat. Punn ami tornnattim zatat toxim, amkam svota zaun thodde nirnnoi gheunk poddttat. Punn amkam titlo onubhov asona. Tor Jehova sangata amchi ixttagot piddʼddear korinant tosle bore nirnnoi gheunk amkam koxi modot zaun xokta? (Mho. 22:3) Kari nanvache bhoinnik bore nirnnoi gheunk koxi modot zali tea vixim tem sangta. Sotant ghott aslolea Kristanvank dor eke poristhitint kaideanchi goroz na mhunn taka kollon ailem. Tem mhunntta: “Hanvem fokot kaidech pallchea bodlek, umkeach vixoi-a vixim Jehova kitem chintʼta, tem zannam zaunk zai aslem.” Tor tumi Bible vachtat tednam tumkanch he prosn vicharat: ‘Hea vachpantlean Jehovachea chintpa vixim mhaka kitem kollon ieta? Sarkem tem korunk mhaka modot kortolim toslim totvam hantunt asat kai? Hoi zalear, tim apnnailolean mhaka koso faido zaunk xokta?’ (St. 19:7; Iz. 48:17, 18) Tumi Bible vachtat ani tantunt aslolea totvancher niall kortat tednam, tumkam Jehovak manvota tosle bore nirnnoi gheunk sompem zatolem. Hea toren tumi vaddavoll korit ravtat toxim, tumkam dor eke poristhitint kaideanchi goroz poddchi na. Karonn tea poristhiti vixim Jehova kitem chintʼta tem tumi somzonk pavtolim. Ani hem tumkam bore nirnnoi gheunk modot kortolem.

13. Borim ixttam tumkam koxi modot korunk xoktat? (Mhonnʼnneo 13:20)

¹³ Jehovacho mog kortat toslim ixttam vinchun kaddat. Ami poilim polloilʼlem toxem, borim ixttam amkam vaddavoll korunk modot korunk xoktat. (Mhonnʼnneo 13:20 vachat.) Hea vixim amkam Sara nanvache bhoinnicho onubhov asa. Jehovache sevent tachi khuxalkai unni zali. Punn uprant taka tachi khuxalkai porot mellonk koxi modot zali? Sara sangta: “Mhaka goroz asli tednanch mhaka borim ixttam mellʼllim. Ek tornnatti bhoinn ani hanv, dor sumanak, sangata mellon Pahrogopur-acho obheas korunk laglim. Ani mhojea anik eka ixttan, mhaka mittingek zobab diunk suru korunk modot keli. Hea ixttank lagon, hanv svotacho obheas ani magnneak chodd mhotv diunk laglem. Hea vorvim, Jehova Deva sangata mhoji ixttagot anik ghott zali ani mhaka mhoji khuxalkai porot mellʼlli.”

14. Bhav Julien borim ixttam koso korunk pavlo?

¹⁴ Tor Jehova sangata tumchi ixttagot ghott korunk modot kortolim toslim ixttam tumkam koxim mellonk xoktat? Bhav Julien, zo atam ek vhoddil mhunn seva korta, to oxem sangta: “Hanv tornnatto aslo tednam hanv porgottnni korunk voitalo tea bhav-bhoinnam sangata hanvem bori ixttagot keli. Tim urben Jehovachi seva kortalim ani tannim mhaka porgottnnechem kam kitlem khuxalkaiechem tem zannam zaunk modot keli. Tea pasot, hanvem purnn vellachi seva korunk dhei dovorlo. Poilim-poilim mhaka pasun chodd ixttam naslim. Karonn hanv mhojeach piraiechea tornnatteam sangata ixttagot korunk sodhtalo. Punn uprant hanv Bethel-ant gelo, ani thoim hanvem zaitea bhav-bhoinnam sangata ixttagot keli. Tanchea udharonnantlean borem monoronjon vinchun kaddunk mhaka modot zali. Ani hea vorim Jehova sangata mhoji ixttagot anik ghott zali.”

15. Ixttam vinchun kaddche vixim Paulun Timotak kosli xittkaunni dili? (2 Timotak 2:20-22)

¹⁵ Punn tumchim ixttam aslolim sobhentlim thoddim bhav-bhoinnam, Jehova sangata tumchi ixttagot piddʼddear korunk xoktat mhunn tumkam kollon ailem zalear kitem? Hea vellar, apostl Paulun Timotak dilʼlo solʼlo tumi ugddas korunk zata. Poilea xekddeantle Kristi sobhent, thoddim Kristanvam Jehova sangata asloli Timotachi ixttagot piddʼddear korunk xoktalim. Karonn tanchem chintop ani vagnnuk bori nasli. Ani hea pasot Paulun Timotak tanche thaun pois ravonk sanglem. (2 Timotak 2:20-22 vachat.) Aiz ami pasun Jehova sangata amchi ixttagot samballunk khub vavr kortat. Karonn amkam ti ekdom moladik zaun asa. Tor ti ixttagot piddʼddear korunk xoktat toslea ixttam thaun ami pois ravum-ia.—St. 26:4.

DHEI DOVORLOLEAN TUMKAM VADDAVOLL KORUNK KOXI MODOT ZAUNK XOKTA?

16. Tumi vaddavoll korunk kosle dhei dovrunk zatat?

¹⁶ Tumkam vaddavoll korunk modot kortat tosle dhei dovrat. Tumcho bhavarth ghott korunk ani Jehovache sevent vaddavoll korunk tumi umkech dhei dovrunk zatat. (Ef. 3:16) Udharonnak, tumi chukonastana Bible vachunk ani svotacho Bible obheas korunk dhei dovrunk zata. (St. 1:2, 3) Vo tumi anik chodd pavtti ani kallzantlean magnnem korunk dhei dovrunk zata. Vo tumi koslem monoronjon vinchun kaddttat ani tumcho vell koso sartat tea vixim chotrai dovrunk zata. (Ef. 5:15, 16) Tumi osle dhei dovrun vaddavoll korunk khub proitn kortat tem Jehova polloita tednam to khub khuxal zata.

17. Dusreank modot kelolean kitem zaunk pavtolem?

¹⁷ Toxench, tumi dusreank modot korunk dhei dovorlo zalear tumi vaddavoll korunk pavtolim. Jezun mhunnttlolem: “Dusream koddchem gheunche poros dusreank divop odik vhodd bhag.” (Itihas 20:35) Tor tornnattim zalolean, tumi tumcho vell ani takot dusreank modot korunk uzar korunk xoktat kai? Oxem kelolean tumi khuxal astolim ani tumkanch faido zatolo. Tor tumi dusreank koxi modot korunk zata? Tumi tumchea sobhentlea zanntteank ani oskotank modot korunk dhei dovrunk zata. Tumi ghoddie tanche pasot bazar korunk vo tankam electronic sadhonam uzar korunk modot korunk zata. Tornnattea bhavamnim sahaiok sevok zaunk dhei dovrunk zata. Karonn oxem kelolean, tumi anik bore toren tumchea bhav-bhoinnanchi seva korunk pavtole. (Filp. 2:4) Tea bhair, Devachea Rajeachi bori khobor porgottun tumi dusreank pasun mog dakhounk zata. (Mt. 9:36, 37) Toxench, ghoddtta zalear, pioneer seva, Bethel seva vo songottnnechem bandkam korunk tumi dhei dovrunk zata.

18. Purnn vellachi seva kelolean Jehova sangata ghott ixttagot korunk tumkam koxi modot zaunk xokta?

¹⁸ Tumi purnn vellachi seva korunk fuddem sortat tednam tumi Jehova sangata tumchi ixttagot anik ghott korunk pavtolim. Udharonnak, tumi pioneer seva keli zalear tumkam Raj Porgottnnarancho Kors, Bethel seva vo songottnnechem bandkam korunk sondhi mellonk xokta. Ekvis vorsanchem, pioneer seva korpi bhoinn Kaitlyn sangta: “Mhozo bautizm zalea uprant, porgottnnent onubhov aslolea bhav-bhoinnam sangata kam kelolean, Jehova sangata mhoji ixttagot ghott korunk mhaka modot zali. Tanchea borea udharonnak lagon, hanv Bible-acho kholaien obheas korunk ani mhoji xikoupachi kola vaddounk pavlem.”

19. Vaddavoll korit ravlear tumi koslim besanvam onubhovunk pavtolim?

¹⁹ Tornnatteamno, tumi vaddavoll korit ravtat tednam tumi zaitim besanvam onubhovunk pavtolim. Zoxem, faideak poddonant tosleo vostu korun tumi tumchem tornnattponn ibadd korchimnant. (1 Juanv 2:17) Toxench, tumi chukiche nirnnoi gheunchim nant ani tancho vaitt porinnam tumkam bhogunk poddchona. Tachea bodlek, tumkam khori khuxalkai ani ies mellttolem. (Mho. 16:3) Tea bhair, tumchem borem udharonn polloun sobhentlea sogleank, tornnatteank toxench zanntteank urba mellttoli. (1 Tim. 4:12) Ani sogleam-von mhotvachem mhunnttlear, Jehova Devak manvota tem korun ani tache lagim ghott ixttagot aslolean melltta ti xanti ani dhadosponn tumi onubhovunk pavtolim.—Mho. 23:15, 16.