‘Sota Pormonnem Cholot Ravat’

1. Ami Jehovachim Sakxi kiteak zaunk pavlim hea vixim uloilolean amkam koso faido zata?

AMI amchea bhav-bhoinnank bore toren vollkhon gheunk sodhtat tednam ami tankam sogleant poilim, “Tumkam sot koxem mellʼllem?” ho prosn vicharunk puro. Ani tannim pasun amkam ghoddie hoch prosn vicharlo zait. Tor tim Jehovak koxim vollkhonk pavlim ani tacho mog koso korunk pavlim tem ami aikotat tednam amkam khub khuxalkai bhogta. Toxench, amkam Jehovachim Sakxi zaunk kiteak itlem avoddtta tem tankam sangonk amkam khub borem dista. (Rom. 1:11) Oxem korun ami eka-meka lagim uloitat tednam Jehovachim Sakxi zalolean amkam kitlo gorv bhogta ani ami xikleant tem sot amkam kitlem moladik zaun asa tem ugddas dovrunk amkam modot zata. Toxench, ‘sota pormonnem cholot ravonk,’ tem mhunnttlear, Jehovachim besanvam ani maniotai melltta te toren amchem jivit jieunk amcho nichov ghott zaunk pavta.—3 Juanv 4.

2. Hea lekhant ami kitem polloitolim?

² Tor hea lekhant, ami sotacho mog kiteak kortat tea vixim thoddim karonnam ami polloitolim. Toxench, ami sotacho mog kortat mhunn ami koxem dakhounk zata tem pasun ami polloitolim. Oxem kelolean, Jehovan amkam sotant oddun haddleant mhunn tache pasot amchem upkariponn anik vaddttolem. (Juanv 6:44) Toxench, sota vixim dusreank sangonk amchi itsa pasun vaddttoli.

AMI ‘SOTACHO’ MOG KITEAK KORTAT?

3. Ami khoinchea mhotvachea karonnank lagon sotacho mog kortat?

³ Ami zaitea karonnank lagon sotacho mog kortat. Punn sogleam-von mhotvachem karonn mhunnttlear, sotachi Zhor zaun aslolo, Jehova Devacho ami mog kortat. Jehovachem Utor, Bible-a udexim to fokot sorg ani prithumecho podvedar Rochnnaruch nhoi, punn amchi kallji gheta toslo ek mogall Bapui zaun asa mhunn amkam kollon ailam. (1 Ped. 5:7) Toxench, Jehova ek “doiall-movall Kallzacho Dev! To rokddoch ragar zaina, punn bhov dulob ani visvaxi” mhunn ami zannam zaleant. (Sutt. 34:6) Tea bhair, Jehova neai-niticho mog korta. (Iz. 61:8) Toxench, amkam tras zatat tem polloun taka dukh bhogta ani beginuch apnnem tharailʼlea vellar to sogle tras kabar korun uddounk axeun ravla. (Jer. 29:11) Ani ami pasun tea disachi vatt polloitat. Khorench, hea soglea pasot ami Jehovacho khub mog kortat!

4-5. Amcho bhorvonso nangra sarko zaun asa oxem apostl Paulun kiteak mhunnttlem?

⁴ Sotacho mog korunk anik ek karonn mhunnttlear, sot zannam zalolean amkam khub faido zata. Udharonnak, ami Bible-antlem sot xiktat tednam amkam fuddara pasot ek bhorvonso melltta. Ani apostl Paulun jem mhunnttlem tantuntlean ho bhorvonso kitlo moladik asa tem amkam kollon ieta. Tannem mhunnttlem: “Zoxem nangor doriant hoddem surokxit dovorta, toxem ho bhorvanso amchem jivit surokxit samballta.” (Heb. 6:19) Tor Bible-acho bhorvonso trasanchea vellar amkam xant ravonk modot korta.

⁵ Paulun him utram boroilʼlim tednam to makhlolea Kristanvank aslolea sorginchea bhorvonxea vixim uloitalo. Punn tachim utram prithumer sasnak jieuncho bhorvonso aslolea Kristanvank pasun lagu zatat. (Juanv 3:16) Khorench, sasnik jivitachea bhorvonxea vixim xiklolean amchea jivitak ek orth melltta.

6-7. Fuddara vixim sot xiklolean Yvonne nanvache eke bhoinnik koso faido zalo?

⁶ Sot xiklolean, Yvonne nanvache eke bhoinnik koso faido zalo tea vixim polloum-ia. Tem vaddlea uprant sot xiklem. Tem lhan aslem tednam taka mornnachi bhirant asli. Tannem vachloli ek voll tachea monant urli. Ti mhunnttlear, “Ek-na-ek dis ami soglim mortolim.” Yvonne sangta: “Mhaka faleanchea disa vixim usko zatalo ani tea vixim chintun-chintun mhaka ratchi nhiduch poddonasli.” ‘Ami thoddeach vella pasot jieun, uprant kiteak mortat?’ mhunn Yvonne chintʼtalem. ‘Jivitacho orth kitem ani amkam kiteak rochleant?’ tem Yvonne zannam zaunk sodhtalem. Punn taka moronk naka aslem.

⁷ Yvonne vaddlea uprant, tem Jehovachea Sakxeank mellʼllem. Tea vixim tem sangta: “Sobit Bag zalʼlea hea prithumer hanv sasnak jieunk xoktolem mhunn hanv manunk laglem. Atam mhaka mornna vixim vo fuddara vixim usko zaina ani ratchi mhaka bori nhid poddtta.” Khorench, Yvonne Bible-antlea sotancho khub mog korta ani fuddarachea bhorvonxea vixim dusreank sangonk taka ekdom borem dista, hantunt dubhavuch na!—1 Tim. 4:16.

8-9. (a) Jezun sanglole eke voparint, tea munxak to liplolo thevo kitlo moladik zaun aslo? (b) Tumkam Bible-antlem sot kitlem moladik zaun asa?

⁸ Bible-antlem sot ami xiktat tednam ami Devachea Rajeachi bori khobor pasun zannam zatat. Jezun Rajeachea sotak, eka liplolea theveak sor kelo. Matev 13:44-ant Jezun oxem mhunnttlem: “Sorginchem Raj xetant lipoun dovorlolea thevea bhaxen asa zo eka munxak melltta. To munis to thevo porot teach zagear lipoun dovorta ani khuxalkaien vochon aplea lagim asat teo sogleo vostu vikta ani ti zomin vikti gheta.” Ho munis to thevo sodhinaslo. Punn taka to mellʼllea uprant, to melloun gheunk aplea lagim aslem tem soglem tannem viklem. Karonn tachea lagim aslolea khoinchea-i vostum poros ho thevo khub moladik mhunn to zannam aslo.

⁹ Amkam pasun Bible-antlem sot hea thevea sarkench zaun asa. Aiz Jehovachi seva korunk amkam khub khuxalkai melltta. Ani fuddarak, Devachea Rajea khala amkam sasnak jieuncho bhorvonso asa. Sonvsarant aslolem kitem-i, amkam hi khuxalkai ani bhorvonso diunk xokona. Jehova sangata ixttagot korop, amkam mellʼllolo vhoddantlo-vhodd sueog zaun asa. Ani hea sueoga pasot, atam amkam kitem-i fattim soddun diunk poddlear pasun amkam kainch dukh zaina. Karonn, ‘soglea vattamnim Jehovak manvota tem korunk’ amkam vhodd khuxalkai bhogta.—Kol. 1:10.

10-11. Michael aplea jivitant vhodd bodlav kiteak korunk pavlo?

¹⁰ Ami sot zannam zaunche poilim, amchea modlea zaitea zannank hea sonvsarant ek vhodd nanv aslem zait vo ami ek vhodd pagarachi sirvis kortalim astolim. Vo amchea modlim thoddim zannam girest zaunk sodhtalim zait, vo hea sonvsarachea dorjeam pormonnem ami amchem jivit jietalim astolim. Punn amkam sot mellʼllem ani ami Jehova vixim xikonk laglim tednam tachi maniotai melloun gheunk ami hem soglem soddun dilem. Michael nanvachea eka munxan oxench kelem. To tornnattponna thaun karate-chem proxikxonn ghetalo. To sangta: “Sodanch fit ravop, mhaka sogleam-von chodd mhotvachem aslem. Hanv itli bori karate zannam aslo ki thodde pavtti mhaka konn harounkuch xokona oxem mhaka distalem.” Punn uprant, Michael Bible-antlem sot xikonk laglo tednam Jehovak hinvsa avoddna mhunn taka kollon ailem. (St. 11:5) Apnnak Bible xikoitolea zoddpea vixim tannem oxem sanglem: “Hanvem karate soddun diunk poddttoli mhunn tannim mhaka kednanch sangonk na. Punn tim mhaka Bible-antlean sot xikoit ravlim.”

¹¹ Michael Jehova vixim xikonk laglo toso, Jehova pasot tacho mog vaddot gelo. Jehova aplea sevokank kitli doia-maia dakhoita tem Michael xiklo tednam, tem tachea kallzak laglem. Michael sangta: “Karate soddun diunk mhaka ekdom kotthin zalem. Punn hanvem oxem kelear, tem Jehovak manvotolem mhunn hanv zannam aslo. Ani Jehovak khuxal korunk hanv kitem-i soddun diunk toiar aslo.” Tor Michael-an, apleak mellʼllolea sotacho itlo valor kelo ki tem melloun gheunk tannem aplea jivitant khub vhoddle bodlav kele.—Jak. 1:25.

12-13. Bible-antlea sotak lagon Mayli-k koxi modot zali?

¹² Bible-antlem sot ekdom moladik zaun asa. Tea pasot, hea sotak, kallokhant uzvadd ditolea eka diveak sor kelam. (St. 119:105; Ef. 5:8) Azerbaijan-ant ravtolea Mayli-k, hem sot diveachea uzvadda sarkem koxem zaunk pavlem tem atam polloum-ia. Mayli-cho bapui ek Muslim aslo ani tachi avoi ek Judev asli. Tem sangta: “Dev asa mhunn mhaka kosloch dubhav naslo. Punn mhaka zaite prosn asle. Hanv chintʼtalem, ‘Devan munxak kiteak rochla? Ami jivim astana amkam itle tras sosunk poddttat, ani melea uprant pasun amkam ifernant tras sosunk poddttat zalear jivitacho orth kitem?’ Toxench, kitem-i zalem zalear, ti Devachi khuxi mhunn lok sangta. Tor ‘munxancher tabo cholounk ani tankam tras zatat tem pollounk Devak borem dista kai’ mhunn hanv chintʼtalem.”

¹³ Punn Mayli aplea prosnanche zobab sodhit ravlem. Ani vell soron gelo toso, tem Bible obheas korunk laglem ani Jehovachem Sakxi zalem. Tea vixim tem sangta: “Bible-ant jea toren sot somzailam, taka lagon hanv mhojea jivitant khuxal zaunk pavlem ani mhaka monachi xanti mellʼlli.” Mayli bhaxen, ami soglim Jehovak vakhannttat. Karonn, ‘tannench amkam patkachea kallokhantlim bhair kaddun aplea mhoimebhorit uzvaddak pavoileant.’—1 Ped. 2:9.

14. Sota pasot amcho mog ami anikui koso vaddounk zata? (“Bible-achem Sot Anik Kiteak Sor Kelam?” hem boks pasun polloiat.)

¹⁴ Khorench, Bible-achem sot khub moladik asa ani amchea pasot khub faideachem asa. Zoxem ami polloilem, hea sotak ek nangor, ek thevo ani eka diveak sor kelam. Punn Bible-achea sotak anik khoinchea vostum sangata sor kelam, ani ami anik khoinchea karonnank lagon Bible-achea sotacho mog korunk zai? Hea vixim tumi tumchea svotachea Bible obheasa vellar sodh korunk zata. Oxem kelolean, sota pasot tumcho mog anikui vaddttolo. Tor ami sotacho mog kortat mhunn ami khoinchea vattamnim dakhounk zata?

AMI SOTACHO MOG KORTAT MHUNN KOXEM DAKHOUNK ZATA?

15. Ami sotacho mog kortat mhunn koxem dakhounk zata?

¹⁵ Ami sodanch Bible ani Bible-acher adarit aslolea prokaxonancho obheas korun ami sotacho mog kortat mhunn dakhounk zata. Pahrogopur masik poilech pavtti chhaplem tednam tantunt oxem boroilʼlem aslem: “Sot, jivitachea oronneant aslolea eka lhan fula bhaxen zaun asa. Ani hea oronneant khub ner asa dekhun tem ful samkem damun urta. Tor hem sotachem ful sodhunk ami khub vavr korunk zai . . . Ani hem ful amkam dixtti poddtta tednam ami voddov ghalun tem kaddunk zai. Punn amkam sotachem ekuch ful mellʼllear puro nhoi . . . ami anikui fulam sodhit ravonk zai.” Tor ami kitlim-i vorsam sotant aslear pasun, sota vixim amchem xikop kednanch kabar zaunchem na. Amkam khub vavr korunk poddttolo tem khorem. Tori astana, oxem kelear amkam sodanch faido zatolo.

16. Tumkam khoinchea toren Bible-acho obheas korunk avoddtta? (Mhonnʼnneo 2:4-6)

¹⁶ Punn amkam sogleankuch vachunk ani obheas korunk avoddtta oxem na. Tori astana, Jehova amkam sota vixim kholaien ‘sodhunk’ ani tachea ‘sodhik lagonk’ apounnem dita. (Mhonnʼnneo 2:4-6 vachat.) Ami oxem kortat tednam amkam sodanch faido zata. Corey nanvacho ek bhav svotachem Bible vachop korta tednam, to dor eka versacher dhean dita mhunn sangta. To mhunntta: “Hanv dor ek futtnott ani cross-reference vachtam. Tea bhair hanv anikui sodh kortam . . . Oxem kelolean hanv anik zaiteo vostu xikonk pavtam.” Tor ami khoinche-i toren Bible-acho obheas korum, oxem korunk ami vell kaddttat ani vavr kortat tednam ami sotacho kitlo valor kortat tem dakhoun ditat.—St. 1:1-3.

17. Sota pormonnem jievop mhunnttlear kitem? (Jakob 1:25)

¹⁷ Punn ami sota vixim obheas kelearuch puro kai? Na. Amkam purnn toren faido zaunk ami xiktat tea sota pormonnem ami jieunk zai. Tem mhunnttlear, ami xiktat tem amchea jivitant apnnaunk zai. Oxem kelearuch amkam khori khuxalkai mellttoli. (Jakob 1:25 vachat.) Punn ami sota pormonnem jietat mhunn ami koxi khatri korun gheunk zata? Hea vixim eka bhavan sanglem ki, ami xiktat tem ami koxem apnnailam ani ami khoim sudharnni korchi goroz asa, tea vixim ami svotachi choukoxi korunk zai. Heach vixim apostl Paulun oxem mhunnttlem: “Kitem-i zaum, ami aiz porian pavleanv thoim thaun teach rostean fuddem vochum-ia.”—Filp. 3:16.

18. Ami ‘sota pormonnem cholot ravonk’ amchean zata tem soglem kiteak korunk zai?

¹⁸ ‘Sota pormonnem cholot ravonk’ ami amchean zata tem soglem kortat tednam amkam kitlo faido zata tea vixim chintat! Ami bore toren jieunk xiktat, toxench Jehovak ani amchea bhav-bhoinnank pasun ami khub khuxalkai haddttat. (Mho. 27:11; 3 Juanv 4) Khorench, sotacho mog korunk ani tea pormonnem jieunk amche lagim kitlim borim karonnam asat nhoi!